Read La Sankta Biblio 1926 esparanto Ijob 20 Bible Online

Ijob 20 - La Sankta Biblio 1926 esparanto bible

Ijob 20

¹Ekparolis Cofar, la Naamano, kaj diris:

²Pro tio miaj pensoj devigas min respondi, Pro tio, kion mi sentas.

³Hontindan riproĉon mi aŭdis, Kaj la spirito de mia prudento respondos por mi.

⁴Ĉu vi scias, ke tiel estis de eterne, De post la apero de homo sur la tero,

⁵Ke la triumfado de malvirtuloj estas mallongatempa, Kaj la ĝojo de hipokritulo estas nur momenta?

⁶Se lia grandeco eĉ atingus ĝis la ĉielo, Kaj lia kapo tuŝus la nubon,

⁷Li tamen pereos por ĉiam, kiel lia sterko; Tiuj, kiuj lin vidis, diros: Kie li estas?

⁸Kiel sonĝo li forflugos, kaj oni lin ne trovos; Li malaperos, kiel nokta vizio.

⁹Okulo, kiu rigardis lin, ne plu vidos lin; Lia loko lin ne plu vidos.

¹⁰Liaj filoj kurados almozpetante, Kaj liaj manoj redonos lian havaĵon.

¹¹Liaj ostoj estos punitaj pro la pekoj de lia juneco, Kaj tio kuŝiĝos kune kun li en la polvo.

¹²Se la malbono estas dolĉa en lia buŝo, Li kaŝas ĝin sub sia lango,

¹³Li flegas ĝin kaj ne forlasas ĝin, Kaj retenas ĝin sur sia palato:

¹⁴Tiam lia manĝaĵo renversiĝos en liaj internaĵoj, Fariĝos galo de aspidoj interne de li.

¹⁵Li englutis havaĵon, sed li ĝin elvomos; El lia ventro Dio ĝin elpelos.

¹⁶Venenon de aspidoj li suĉos; Lango de vipuro lin mortigos.

¹⁷Li ne vidos fluojn nek riverojn, Torentojn de mielo kaj de butero.

¹⁸Li redonos tion, kion li pene akiris, kaj li tion ne englutos; Kiel ajn granda estas lia havaĵo, li ĝin fordonos kaj ne ĝuos ĝin.

¹⁹Ĉar li premis kaj forlasis la senhavulojn, Li rabis al si domon, kiun li ne konstruis.

²⁰Ĉar lia interno ne estis trankvila, Tial li ne savos tion, kio estis por li kara.

²¹Nenion restigis lia manĝemeco; Tial lia bonstato ne estos longedaŭra.

²²Malgraŭ lia abundeco, li estos premata; Ĉiaspecaj suferoj trafos lin.

²³Por plenigi lian ventron, Li sendos sur lin la flamon de Sia kolero, Kaj pluvigos sur lin Sian furiozon.

²⁴Se li forkuros de batalilo fera, Trafos lin pafarko kupra.

²⁵Nudigita glavo trairos lian korpon, Kaj la fulmo de lia turmentilo venos sur lin kun teruro.

²⁶Nenia mallumo povos kaŝi liajn trezorojn; Lin konsumos fajro ne disblovata; Malbone estos al tiu, kiu restos en lia tendo.

²⁷La ĉielo malkovros liajn malbonagojn, Kaj la tero leviĝos kontraŭ lin.

²⁸Malaperos la greno el lia domo, Disŝutita ĝi estos en la tago de Lia kolero.

²⁹Tia estas de Dio la sorto de homo malpia, Kaj la heredaĵo destinita por li de Dio.