Read La Sankta Biblio 1926 esparanto Ijob 28 Bible Online

Ijob 28 - La Sankta Biblio 1926 esparanto bible

Ijob 28

¹La arĝento havas lokon, kie oni ĝin elakiras; Kaj la oro havas lokon, kie oni ĝin fandas.

²La fero estas ricevata el polvo, Kaj el ŝtono oni fandas la kupron.

³Oni faras finon al la mallumo, Kaj rezulte oni trovas la ŝtonojn el grandega mallumo.

⁴Oni fosas kavon tie, kie oni loĝas; Kaj tie, kie paŝas neniu piedo, ili laboras pendante, forgesitaj de homoj.

⁵La tero, el kiu devenas pano, Estas trafosata sube kvazaŭ per fajro.

⁶Ĝiaj ŝtonoj estas loko de safiroj, Kaj terbuloj enhavas oron.

⁷La vojon ne konas rabobirdo, Kaj la okulo de falko ĝin ne vidis.

⁸Ne paŝis sur ĝi sovaĝaj bestoj, Ne iris sur ĝi leono.

⁹Sur rokon oni metas sian manon, Oni renversas montojn de ilia bazo.

¹⁰En rokoj oni elhakas riverojn, Kaj ĉion grandvaloran vidis la okulo de homo.

¹¹Oni haltigas la fluon de riveroj, Kaj kaŝitaĵon oni eltiras al la lumo.

¹²Sed kie oni trovas la saĝon? Kaj kie estas la loko de prudento?

¹³La homo ne scias ĝian prezon; Kaj ĝi ne estas trovata sur la tero de vivantoj.

¹⁴La abismo diras: Ne en mi ĝi estas; La maro diras: Ĝi ne troviĝas ĉe mi.

¹⁵Oni ne povas doni por ĝi plej bonan oron, Oni ne pesas arĝenton page por ĝi.

¹⁶Oni ne taksas ĝin per oro Ofira, Nek per multekosta onikso kaj safiro.

¹⁷Ne valoregalas al ĝi oro kaj vitro; Kaj oni ne povas ŝanĝi ĝin kontraŭ vazoj el pura oro.

¹⁸Koraloj kaj kristalo ne estas atentataj; Kaj posedo de saĝo estas pli valora ol perloj.

¹⁹Ne valoregalas al ĝi topazo el Etiopujo; Pura oro ne povas esti ĝia prezo.

²⁰De kie venas la saĝo? Kaj kie estas la loko de prudento?

²¹Kaŝita ĝi estas antaŭ la okuloj de ĉio vivanta, Nevidebla por la birdoj de la ĉielo.

²²La abismo kaj la morto diras: Per niaj oreloj ni aŭdis nur famon pri ĝi.

²³Dio komprenas ĝian vojon, Kaj Li scias ĝian lokon;

²⁴Ĉar Li rigardas ĝis la fino de la tero, Li vidas sub la tuta ĉielo.

²⁵Kiam Li donis pezon al la vento Kaj aranĝis la akvon laŭmezure,

²⁶Kiam Li starigis leĝon por la pluvo Kaj vojon por la fulmo kaj tondro:

²⁷Tiam Li vidis ĝin kaj anoncis ĝin, Pretigis ĝin kaj esploris ĝin;

²⁸Kaj Li diris al la homoj: Vidu, timo antaŭ Dio estas saĝo, Kaj evitado de malbono estas prudento.