Read La Sankta Biblio 1926 esparanto Ijob 32 Bible Online

Ijob 32 - La Sankta Biblio 1926 esparanto bible

Ijob 32

¹Kaj tiuj tri viroj ĉesis respondi al Ijob, ĉar li opiniis sin prava.

²Tiam ekflamis la kolero de Elihu, filo de Baraĥel, Buzano, el la familio de Ram. Kontraŭ Ijob ekflamis lia kolero pro tio, ke li opiniis sin pli prava ol Dio;

³kaj kontraŭ liaj tri amikoj ekflamis lia kolero pro tio, ke ili ne trovis respondon kaj akuzis Ijobon.

⁴Elihu atendis, dum ili parolis kun Ijob, ĉar ili estis pli aĝaj ol li.

⁵Sed kiam Elihu vidis, ke ne troviĝas respondo en la buŝo de la tri viroj, ekflamis lia kolero.

⁶Kaj ekparolis Elihu, filo de Baraĥel, la Buzano, kaj diris: Mi estas juna, kaj vi estas maljunuloj; Tial mi hezitis kaj timis eldiri al vi mian opinion.

⁷Mi pensis: La aĝo parolu, Kaj la jarmulto montru saĝon.

⁸Sed la spirito en la homoj kaj la spiro de la Plejpotenculo Donas al ili prudenton.

⁹Ne la grandaj estas la plej prudentaj, Kaj ne la maljunuloj sole scias juĝi,

¹⁰Tial mi diras: Aŭskultu min; Mi ankaŭ eldiros mian opinion.

¹¹Jen mi atendis viajn vortojn, Mi atentis vian kompetentecon, Ĝis vi trovos la ĝustan parolon.

¹²Sed atentante vin, mi vidis, Ke neniu el vi donas al Ijob moralinstruon, Respondante al liaj paroloj.

¹³Ne diru: Ni trovis la saĝon. Dio instruu lin, ne homo.

¹⁴Li ne direktis al mi siajn vortojn, Kaj per viaj diroj mi ne respondos al li.

¹⁵Ili perdis la kuraĝon, ili ne plu respondis; Mankas al ili vortoj.

¹⁶Mi atendis, ĝis ili ĉesos paroli; Sed ĉar ili haltis kaj ne plu respondis,

¹⁷Tial ankaŭ mi de mia flanko respondos, Mi ankaŭ eldiros mian opinion.

¹⁸Ĉar mi estas plena de vortoj; La spirito de mia interno min premas.

¹⁹Mia interno estas kiel vino ŝtopfermita, Kiu krevigas novan felsakon.

²⁰Mi ekparolos, kaj tiam fariĝos al mi pli facile; Mi malfermos mian buŝon, kaj mi respondos.

²¹Mi ne atentos la vizaĝon de persono, Kaj mi ne flatos al homo;

²²Ĉar mi ne povoscias flati; Aliokaze pereigu min mia Kreinto.