Read La Sankta Biblio 1926 esparanto Ijob 34 Bible Online

Ijob 34 - La Sankta Biblio 1926 esparanto bible

Ijob 34

¹Elihu parolis plue, kaj diris:

²Aŭskultu, saĝuloj, miajn vortojn; Kaj vi, kompetentuloj, atentu min.

³Ĉar la orelo esploras la parolon, Kiel la palato gustumas la manĝaĵon.

⁴Decidon ni elektu al ni; Ni esploru inter ni, kio estas bona.

⁵Ĉar Ijob diris: Mi estas prava, Sed Dio forigis mian rajton;

⁶En mia juĝa afero mi estas refutata; Turmentas min mia sago, kvankam mi estas senkulpa.

⁷Kiu homo estas simila al Ijob, Kiu trinkas mokojn kiel akvon?

⁸Kaj li estas preta aliĝi al malbonaguloj Kaj iri kun malpiuloj;

⁹Ĉar li diras: Homo ne havas utilon, Se li serĉas favoron de Dio.

¹⁰Tial aŭskultu min, ho saĝaj homoj: Dio estas malproksima de malbonagoj, Kaj la Plejpotenculo estas malproksima de maljusteco;

¹¹Sed Li repagas al homo laŭ liaj agoj, Kaj laŭ la vojo de ĉiu Li renkontas lin.

¹²Vere, Dio ne malbonagas, Kaj la Plejpotenculo ne kurbigas la veron.

¹³Kiu komisiis al Li la teron? Kaj kiu starigis Lin super la tuta mondo?

¹⁴Se Li pensus nur pri Si, Se Li prenus al Si Sian spiriton kaj spiron,

¹⁵Tiam pereus absolute ĉiu karno, Kaj homo refariĝus polvo.

¹⁶Se vi havas prudenton, aŭskultu ĉi tion; Atentu la voĉon de miaj paroloj.

¹⁷Ĉu povas regi malamanto de justeco? Ĉu vi povas akuzi la Plejjustulon?

¹⁸Ĉu oni povas diris al reĝo: Sentaŭgulo; Aŭ al altranguloj: Malpiulo?

¹⁹Sed Li ne atentas la vizaĝon de princoj, Kaj ne preferas riĉulon antaŭ malriĉulo; Ĉar ĉiuj estas faritaĵo de Liaj manoj.

²⁰Momente ili mortas, noktomeze ili tumultiĝas kaj malaperas; Ne de homa mano estas forigataj la potenculoj.

²¹Ĉar Liaj okuloj estas super la vojoj de homo, Kaj ĉiujn liajn paŝojn Li vidas.

²²Ne ekzistas mallumo nek ombrego, Kie povus sin kaŝi malbonaguloj.

²³Li ne bezonas multe klopodi kun homo, Ke li iru al Dio por juĝo.

²⁴Li pereigas la fortulojn sennombre Kaj starigas sur ilia loko aliajn;

²⁵Ĉar Li scias iliajn farojn; Li renversas ilin en la nokto, kaj ili frakasiĝas.

²⁶Kiel malpiulojn Li frapas ilin sur loko, kie ĉiuj vidas;

²⁷Pro tio, ke ili forturniĝis de Li Kaj ne penis kompreni ĉiujn Liajn vojojn,

²⁸Sed venigis al Li la kriadon de malriĉulo, Kaj Li aŭdis la kriadon de mizeruloj.

²⁹Se Li kvietigas, tiam kiu povas ribeligi? Se Li kaŝas Sian vizaĝon, tiam kiu povas Lin vidi? Tiel estas egale kun nacio kaj kun aparta homo,

³⁰Por ke ne regu homo hipokrita, El la pekigantoj de popolo.

³¹Al Dio oni devas diri: Mi fieriĝis, mi ne plu faros malbonon;

³²Kion mi ne vidas, pri tio instruu min; Se mi faris maljustaĵon, mi ne plu faros.

³³Ĉu konforme al via opinio Li devas repagi? Al vi ja ne plaĉis. Vi elektu, ne mi; Kaj kion vi scias, tion diru.

³⁴Saĝaj homoj diros al mi, Kaj prudenta homo, kiu min aŭskultas:

³⁵Ijob parolas malsaĝe, Kaj liaj vortoj estas malprudentaj.

³⁶Ho, se Ijob estus elprovita ĝis la fino, Pro tio, ke li aliĝas al homoj pekaj;

³⁷Ĉar al sia peko li aldonas blasfemon; Inter ni li mokas, kaj multe parolas kontraŭ Dio.