Read La Sankta Biblio 1926 esparanto Ijob 35 Bible Online

Ijob 35 - La Sankta Biblio 1926 esparanto bible

Ijob 35

¹Elihu parolis plue, kaj diris:

²Ĉu tion vi opinias justa, ke vi diras: Mi estas pli prava ol Dio?

³Ĉar vi diras: Kiom tio utilas al vi? Kian profiton mi havas kompare kun tiu okazo, se mi pekus?

⁴Mi respondos al vi, Kaj kune ankaŭ al viaj amikoj:

⁵Rigardu la ĉielon, kaj vidu; Rigardu la nubojn, kiel tro alte ili estas por vi.

⁶Se vi pekas, kiom vi malutilas al Li? Kaj se viaj malbonagoj estas multaj, kion vi faras al Li?

⁷Se vi estas virta, kion vi donas al Li? Aŭ kion Li prenas el via mano?

⁸Al homo, simila al vi, povas ion fari via malbonago, Kaj via virteco havas signifon nur por homido.

⁹Pro multe da premado oni krias; Oni ĝemas pro la brako de potenculoj.

¹⁰Sed oni ne diras: Kie estas Dio, kiu min kreis, Kiu donas kantojn en la nokto,

¹¹Kiu instruas nin pli ol la brutojn sur la tero, Prudentigas nin pli ol la birdojn de la ĉielo?

¹²Tie ili krias pri la fiereco de la malbonuloj, Sed Li ne respondas.

¹³Tamen malvere estas, ke Dio ne aŭdas Kaj ke la Plejpotenculo ne vidas.

¹⁴Kvankam vi diras, ke vi Lin ne vidas, Ekzistas tamen juĝo ĉe Li; Kaj vi atendu Lin.

¹⁵Sed ĉar Li nun ne montras Sian koleron Kaj ne atentas la tro grandan malvirtecon,

¹⁶Tial Ijob vante malfermis sian buŝon Kaj tre multe parolas malprudente.