Read La Sankta Biblio 1926 esparanto Ijob 38 Bible Online

Ijob 38 - La Sankta Biblio 1926 esparanto bible

Ijob 38

¹La Eternulo el ventego ekparolis al Ijob, kaj diris:

²Kiu estas tiu, kiu mallumigas la plej altan decidon Per vortoj sensencaj?

³Zonu kiel viro viajn lumbojn; Mi vin demandos, kaj vi sciigu al Mi.

⁴Kie vi estis, kiam Mi fondis la teron? Diru, se vi havas scion.

⁵Kiu starigis ĝiajn mezurojn, se vi tion scias? Aŭ kiu etendis super ĝi rektoŝnuron?

⁶Sur kio estas enfortikigitaj ĝiaj bazoj, Aŭ kiu kuŝigis ĝian angulŝtonon,

⁷Dum komuna glorkantado de la matenaj steloj Kaj ĝojkriado de ĉiuj filoj de Dio?

⁸Kiu fermis la maron per pordoj, Kiam ĝi elpuŝiĝis kvazaŭ el la ventro de patrino;

⁹Kiam Mi faris la nubon ĝia vesto Kaj mallumon ĝiaj vindaĵoj,

¹⁰Kaj starigis al ĝi limon Kaj faris riglilojn kaj pordojn,

¹¹Kaj diris: Ĝis ĉi tie aliru, sed ne plu, Kaj ĉi tie rompiĝados viaj majestaj ondoj?

¹²Ĉu vi en via vivo iam ordonis al la mateno, Montris al la matenruĝo ĝian lokon,

¹³Ke ĝi kaptu la randojn de la tero, Kaj ke la malpiuloj deskuiĝu el ĝi;

¹⁴Ke ilia internaĵo renversiĝu kiel koto, Kaj ke ili tute konfuziĝu;

¹⁵Ke de la malpiuloj forpreniĝu ilia lumo, Kaj ilia malhumila brako estu rompita?

¹⁶Ĉu vi venis ĝis la fontoj de la maro? Kaj ĉu vi iradis sur la fundo de la abismo?

¹⁷Ĉu malfermiĝis antaŭ vi la pordego de la morto? Kaj ĉu vi vidis la pordegon de la mallumego?

¹⁸Ĉu vi pririgardis la larĝon de la tero? Diru, ĉu vi scias ĉion ĉi tion?

¹⁹Kie estas la vojo al la loĝejo de la lumo, Kaj kie estas la loko de la mallumo,

²⁰Ke vi konduku ĝin al ĝia limo, Kaj ke vi rimarku la vojetojn al ĝia domo?

²¹Ĉu vi sciis, kiam vi naskiĝos Kaj kiel granda estos la nombro de viaj tagoj?

²²Ĉu vi venis al la devenejo de la neĝo, Kaj ĉu vi vidis la devenejon de la hajlo,

²³Kiujn Mi konservas por la tempo de suferado, Por la tago de batalo kaj milito?

²⁴Kie estas la vojo, laŭ kiu dividiĝas la lumo, Diskuras la orienta vento super la teron?

²⁵Kiu destinis direkton por la fluo Kaj vojon por la tondra fulmo,

²⁶Por doni pluvon sur teron, kie neniu troviĝas, Sur dezerton senhoman,

²⁷Por nutri dezerton kaj stepon Kaj kreskigi verdan herbon?

²⁸Ĉu la pluvo havas patron? Aŭ kiu naskigis la gutojn de roso?

²⁹El kies ventro eliris la glacio? Kaj kiu naskis la prujnon sub la ĉielo?

³⁰Simile al ŝtono malmoliĝas la akvo, Kaj la supraĵo de la abismo kunfirmiĝas.

³¹Ĉu vi povas ligi la ligilon de la Plejadoj? Aŭ ĉu vi povas malligi la ligon de Oriono?

³²Ĉu vi povas elirigi iliatempe la planedojn, Kaj konduki la Ursinon kun ĝiaj infanoj?

³³Ĉu vi konas la leĝojn de la ĉielo? Aŭ ĉu vi povas aranĝi ĝian regadon super la tero?

³⁴Ĉu vi povas levi al la nubo vian voĉon, Ke abundo da akvo vin kovru?

³⁵Ĉu vi povas sendi fulmojn, Ke ili iru kaj diru al vi: Jen ni estas?

³⁶Kiu metis en la internon la saĝon? Kaj kiu donis al la koro la prudenton?

³⁷Kiu estas tiel saĝa, ke li povu kalkuli la nubojn? Kaj kiu elverŝas la felsakojn de la ĉielo,

³⁸Kiam la polvo kunfandiĝas Kaj la terbuloj kungluiĝas?

³⁹Ĉu vi ĉasas kaptaĵon por la leonino, Kaj satigas la leonidojn,

⁴⁰Kiam ili kuŝas en la nestegoj, Sidas embuske en la laŭbo?

⁴¹Kiu pretigas al la korvo ĝian manĝaĵon, Kiam ĝiaj idoj krias al Dio, Vagflugas, ne havante, kion manĝi?