Read La Sankta Biblio 1926 esparanto Psalmaro 103 Bible Online

Psalmaro 103 - La Sankta Biblio 1926 esparanto bible

Psalmaro 103

¹De David. Benu, ho mia animo, la Eternulon, Kaj mia tuta internaĵo Lian sanktan nomon.

²Benu, ho mia animo, la Eternulon, Kaj ne forgesu ĉiujn Liajn bonfarojn.

³Li pardonas ĉiujn viajn pekojn, Li sanigas ĉiujn viajn malsanojn;

⁴Li savas de la tombo vian vivon, Li kronas vin per boneco kaj favorkoreco;

⁵Li satigas per bonaĵoj vian maljunan aĝon, Ke via juneco renoviĝas kiel ĉe aglo.

⁶La Eternulo faras justecon kaj juĝon al ĉiuj prematoj.

⁷Li sciigis Siajn vojojn al Moseo, Siajn farojn al la Izraelidoj.

⁸Favorkora kaj kompatema estas la Eternulo, Longetolerema kaj tre bona.

⁹Ne eterne Li indignas, Kaj ne por ĉiam Li koleras.

¹⁰Ne laŭ niaj pekoj Li agis kun ni, Kaj ne laŭ niaj krimoj Li redonis al ni.

¹¹Ĉar kiel alte estas la ĉielo super la tero, Tiel granda estas Lia boneco por tiuj, kiuj Lin timas.

¹²Kiel malproksime estas la oriento de la okcidento, Tiel Li malproksimigis de ni niajn pekojn.

¹³Kiel patro korfavoras filojn, Tiel la Eternulo korfavoras tiujn, kiuj Lin timas.

¹⁴Ĉar Li scias nian esencon; Li memoras, ke ni estas polvo.

¹⁵La tagoj de homo estas kiel herbo; Kiel floro de kampo, tiel li floras.

¹⁶Pasas super ĝi vento, kaj ĝi jam ne ekzistas; Kaj ĝia loko ĝin jam ne rekonas.

¹⁷Sed la boneco de la Eternulo daŭras eterne al tiuj, kiuj Lin timas, Kaj Lia bonfaremeco iras ĝis la pranepoj,

¹⁸Kiuj observas Lian interligon Kaj memoras Liajn ordonojn por ilin plenumi.

¹⁹La Eternulo starigis en la ĉielo Sian tronon; Kaj Lia reĝeco regas ĉion.

²⁰Benu la Eternulon Liaj anĝeloj, potencaj per sia forto, Kiuj plenumas Lian vorton, Por ke oni obeu la voĉon de Lia vorto.

²¹Benu la Eternulon ĉiuj Liaj ĉirkaŭantoj, Liaj servantoj, kiuj plenumas Lian volon.

²²Benu la Eternulon ĉiuj Liaj kreitaĵoj, En ĉiuj lokoj de Lia regado. Benu, ho mia animo, la Eternulon.