Read La Sankta Biblio 1926 esparanto Psalmaro 136 Bible Online

Psalmaro 136 - La Sankta Biblio 1926 esparanto bible

Psalmaro 136

¹Gloru la Eternulon, ĉar Li estas bona, Ĉar eterna estas Lia boneco.

²Gloru la Dion de la dioj, Ĉar eterna estas Lia boneco.

³Gloru la Sinjoron de la sinjoroj, Ĉar eterna estas Lia boneco.

⁴La sola faranto de grandaj mirakloj, Ĉar eterna estas Lia boneco;

⁵Kiu saĝege kreis la ĉielon, Ĉar eterna estas Lia boneco;

⁶Kiu etendis la teron super la akvo, Ĉar eterna estas Lia boneco;

⁷Kiu kreis grandajn lumojn, Ĉar eterna estas Lia boneco;

⁸La sunon, por regi en la tago, Ĉar eterna estas Lia boneco;

⁹La lunon kaj la stelojn, por regi en la nokto, Ĉar eterna estas Lia boneco;

¹⁰Kiu batis Egiptujon en ĝiaj unuenaskitoj, Ĉar eterna estas Lia boneco;

¹¹Kaj elkondukis el ĝia mezo Izraelon, Ĉar eterna estas Lia boneco;

¹²Per forta mano kaj etendita brako, Ĉar eterna estas Lia boneco;

¹³Kiu fendis la Ruĝan Maron en du partojn, Ĉar eterna estas Lia boneco;

¹⁴Kaj trairigis Izraelon tra ĝi, Ĉar eterna estas Lia boneco;

¹⁵Kaj enĵetis Faraonon kaj lian militistaron en la Ruĝan Maron, Ĉar eterna estas Lia boneco;

¹⁶Kiu kondukis Sian popolon tra la dezerto, Ĉar eterna estas Lia boneco;

¹⁷Kiu batis grandajn reĝojn, Ĉar eterna estas Lia boneco;

¹⁸Kaj mortigis reĝojn potencajn, Ĉar eterna estas Lia boneco;

¹⁹Siĥonon, reĝon de la Amoridoj, Ĉar eterna estas Lia boneco;

²⁰Kaj Ogon, reĝon de Baŝan, Ĉar eterna estas Lia boneco;

²¹Kaj donis ilian landon kiel heredon, Ĉar eterna estas Lia boneco;

²²Heredon al Lia sklavo Izrael, Ĉar eterna estas Lia boneco;

²³Kiu rememoris nin, kiam ni estis humiligitaj, Ĉar eterna estas Lia boneco;

²⁴Kaj liberigis nin de niaj premantoj, Ĉar eterna estas Lia boneco;

²⁵Kiu donas panon al ĉiu karno, Ĉar eterna estas Lia boneco.

²⁶Gloru la Dion de la ĉielo, Ĉar eterna estas Lia boneco.