Read La Sankta Biblio 1926 esparanto Psalmaro 140 Bible Online

Psalmaro 140 - La Sankta Biblio 1926 esparanto bible

Psalmaro 140

¹Al la ĥorestro. Psalmo de David. Liberigu min, ho Eternulo, de malbona homo, Gardu min kontraŭ perfortulo;

²Kontraŭ tiuj, kiuj elpensas malbonon en la koro, Ĉiutage kaŭzas militojn;

³Kiuj akrigas sian langon, kiel serpento; Veneno de vipuro estas sub iliaj lipoj. Sela.

⁴Gardu min, ho Eternulo, kontraŭ la manoj de malvirtuloj, Gardu min kontraŭ perfortuloj, Kiuj intencas renversi miajn paŝojn.

⁵Fieruloj kaŝis kaptilon por mi kaj ŝnurojn, Ili etendis reton ĉe la vojo, implikilon ili metis por mi. Sela.

⁶Mi diris al la Eternulo: Vi estas mia Dio; Atentu, ho Eternulo, la voĉon de mia petego.

⁷Ho Eternulo, mia Sinjoro, forto de mia savo, Vi ŝirmas mian kapon en la tago de batalo.

⁸Ne donu, ho Eternulo, al malvirtulo lian dezirataĵon, Lian intencon ne efektivigu, ke ili ne fieriĝu. Sela.

⁹La veneno de miaj ĉirkaŭantoj, La malicaĵo de iliaj lipoj kovru ilin.

¹⁰Falu sur ilin brulantaj karboj; Ili ĵetiĝu en fajron, En abismojn, ke ili ne leviĝu.

¹¹Kalumnianto ne staros forte sur la tero; Perfortulon la malbono entiros en pereon.

¹²Mi scias, ke la Eternulo defendos la aferon de mizerulo, La rajton de malriĉuloj.

¹³Kaj virtuloj ja gloros Vian nomon; Piuloj restos antaŭ Via vizaĝo.