Read La Sankta Biblio 1926 esparanto Psalmaro 145 Bible Online

Psalmaro 145 - La Sankta Biblio 1926 esparanto bible

Psalmaro 145

¹Glorkanto de David. Mi altigos Vin, mia Dio, ho Reĝo, Kaj mi benos Vian nomon ĉiam kaj eterne.

²Ĉiutage mi Vin benos, Kaj mi gloros Vian nomon ĉiam kaj eterne.

³Granda estas la Eternulo kaj tre glorinda, Kaj Lia grandeco estas nemezurebla.

⁴Generacio al generacio laŭdos Viajn farojn Kaj rakontos pri Via potenco.

⁵Pri la majesto de Via granda gloro Kaj pri Viaj mirindaj faroj mi meditos.

⁶La forton de Viaj timindaĵoj oni priparolos, Kaj Vian grandecon mi rakontos.

⁷Oni gloros la renomon de Via granda boneco, Kaj oni prikantos Vian justecon.

⁸Kompatema kaj favorkora estas la Eternulo, Longetolera kaj kun granda boneco.

⁹La Eternulo estas bona por ĉiuj; Lia favorkoreco estas super ĉiuj Liaj kreitaĵoj.

¹⁰Gloros Vin, ho Eternulo, ĉiuj Viaj kreitaĵoj, Kaj Viaj fideluloj Vin benos.

¹¹Ili raportos pri la gloro de Via regno Kaj parolos pri Via potenco,

¹²Por sciigi al la homidoj Lian potencon Kaj la majestan gloron de Lia regno.

¹³Via reĝeco estas reĝeco eterna, Kaj Via regado estas por ĉiuj generacioj.

¹⁴La Eternulo subtenas ĉiujn falantojn Kaj restarigas ĉiujn kurbigitojn.

¹⁵Ĉies okuloj estas turnitaj al Vi, Kaj Vi donas al ili ilian manĝon en ĝia tempo.

¹⁶Vi malfermas Vian manon Kaj satigas favore ĉion vivantan.

¹⁷Justa estas la Eternulo en ĉiuj Siaj vojoj Kaj bona en ĉiuj Siaj faroj.

¹⁸Proksima estas la Eternulo por ĉiuj, kiuj Lin vokas, Por ĉiuj, kiuj vokas Lin sincere.

¹⁹La deziron de Siaj respektantoj Li plenumas, Kaj ilian krion Li aŭdas kaj helpas ilin.

²⁰La Eternulo gardas ĉiujn Sian amantojn, Kaj ĉiujn malvirtulojn Li ekstermas.

²¹La gloron de la Eternulo eldiros mia buŝo, Kaj ĉiu karno benu Lian sanktan nomon ĉiam kaj eterne.