Read La Sankta Biblio 1926 esparanto Psalmaro 147 Bible Online

Psalmaro 147 - La Sankta Biblio 1926 esparanto bible

Psalmaro 147

¹Haleluja! Ĉar estas bone kanti al nia Dio, Ĉar agrabla estas la glorkantado.

²La Eternulo konstruas Jerusalemon, La elpelitojn de Izrael Li kolektas.

³Li sanigas la korprematojn Kaj bandaĝas iliajn vundojn.

⁴Li kalkulas la stelojn, Kaj al ili ĉiuj Li donas nomojn.

⁵Granda estas nia Sinjoro kaj tre forta; Lia saĝo estas nemezurebla.

⁶La Eternulo altigas la humilulojn; Sed la malvirtulojn Li malaltigas ĝis la tero.

⁷Kantu al la Eternulo gloradon, Muziku al nia Dio per harpo.

⁸Li kovras la ĉielon per nuboj, Pretigas por la tero pluvon, Kreskigas sur la montoj herbon.

⁹Li donas al la bruto ĝian nutraĵon, Kaj al la korvidoj, kiuj krias.

¹⁰Ne la forton de ĉevalo Li ŝatas; Ne la femuroj de homo al Li plaĉas:

¹¹Plaĉas al la Eternulo Liaj timantoj, Kiuj fidas Lian bonecon.

¹²Laŭdu, ho Jerusalem, la Eternulon; Gloru vian Dion, ho Cion.

¹³Ĉar Li fortikigis la riglilojn en viaj pordegoj, Li benis viajn filojn interne de vi.

¹⁴Li donas pacon al viaj limoj, Li satigas vin per la plej bona el la tritiko.

¹⁵Li sendas Sian ordonon al la tero; Tre rapide kuras Lia vorto.

¹⁶Li donas neĝon kiel lanon, Li ŝutas prujnon kiel cindron.

¹⁷Li ĵetas Sian glacion kiel pecojn; Kiu kontraŭstaros al Lia frosto?

¹⁸Li sendas Sian vorton, kaj ĉio degelas; Li blovas per Sia vento, kaj ekfluas akvo.

¹⁹Li sciigas al Jakob Sian vorton, Siajn leĝojn kaj decidojn al Izrael.

²⁰Tiel Li ne faras al iu alia popolo; Kaj Liajn decidojn ili ne scias. Haleluja!