Read La Sankta Biblio 1926 esparanto Psalmaro 2 Bible Online

Psalmaro 2 - La Sankta Biblio 1926 esparanto bible

Psalmaro 2

¹Kial tumultas popoloj, Kaj gentoj pripensas vanaĵon?

²Leviĝas reĝoj de la tero, Kaj eminentuloj konsiliĝas kune, Kontraŭ la Eternulo kaj kontraŭ Lia sanktoleito, dirante:

³Ni disŝiru iliajn ligilojn, Kaj ni deĵetu de ni iliajn ŝnurojn!

⁴La loĝanta en la ĉielo ridas, La Sinjoro mokas ilin.

⁵Tiam Li parolos al ili en Sia kolero, Kaj per Sia furiozo Li ilin ektimigos, dirante:

⁶Mi starigis ja Mian reĝon Super Cion, Mia sankta monto.

⁷Mi raportos pri la decido: La Eternulo diris al mi: Vi estas Mia filo, Hodiaŭ Mi vin naskis.

⁸Petu Min, kaj Mi donos al vi popolojn por heredo, Kaj por posedo limojn de tero.

⁹Vi disbatos ilin per fera sceptro, Kiel potan vazon vi ilin dispecigos.

¹⁰Kaj nun, ho reĝoj, prudentiĝu; Instruiĝu, juĝistoj de la tero!

¹¹Servu al la Eternulo kun timo, Kaj ĝoju kun tremo.

¹²Kisu la filon, ke Li ne koleru, kaj vi ne pereu sur la vojo, Ĉar baldaŭ ekbrulos Lia kolero. Feliĉaj estas ĉiuj, kiuj fidas Lin.