Read La Sankta Biblio 1926 esparanto Psalmaro 26 Bible Online

Psalmaro 26 - La Sankta Biblio 1926 esparanto bible

Psalmaro 26

¹De David. Juĝu min, ho Eternulo, ĉar mi iris en sincereco kaj la Eternulon mi fidis; Mi ne ŝanceliĝos.

²Esploru min, ho Eternulo, kaj elprovu min; Refandu mian internaĵon kaj mian koron.

³Ĉar Via favorkoreco estas antaŭ miaj okuloj; Kaj mi marŝas en Via vero.

⁴Mi ne sidas kun homoj malveremaj, Kaj kun falsemuloj mi ne iros.

⁵Mi malamas societon de malbonfarantoj, Kaj kun malpiuloj mi ne sidos.

⁶Mi lavas miajn manojn per senkulpeco; Kaj mi moviĝas ĉirkaŭ Via altaro, ho Eternulo,

⁷Por aŭdigi laŭte gloradon Kaj famigi ĉiujn Viajn miraklojn.

⁸Ho Eternulo, mi amas la ejon de Via domo, Kaj la lokon, en kiu loĝas Via gloro.

⁹Ne pereigu mian animon kune kun la pekuloj, Nek mian vivon kun la sangaviduloj,

¹⁰En kies manoj estas krimo Kaj kies dekstra mano estas plena de subaĉetaj donacoj.

¹¹Kaj mi iras en senkulpeco; Liberigu min kaj korfavoru min.

¹²Mia piedo staras sur ebena loko; En kunvenoj mi benos la Eternulon.