Read La Sankta Biblio 1926 esparanto Psalmaro 50 Bible Online

Psalmaro 50 - La Sankta Biblio 1926 esparanto bible

Psalmaro 50

¹Psalmo de Asaf. Dio de la dioj, la Eternulo, ekparolis, Kaj vokis la teron de la sunleviĝo ĝis la sunsubiro.

²El Cion, la perfektaĵo de beleco, Dio ekbrilis.

³Nia Dio venas kaj ne silentas; Fajro ekstermanta estas antaŭ Li, Ĉirkaŭ Li estas granda ventego.

⁴Li vokas la ĉielon supre kaj la teron, Por juĝi Sian popolon:

⁵Kolektu al Mi Miajn fidelulojn, Kiuj faris kun Mi interligon ĉe oferdono.

⁶Kaj la ĉielo proklamis Lian justecon, Ĉar Dio estas tiu juĝanto. Sela.

⁷Aŭskultu, ho Mia popolo, kaj Mi parolos; Ho Izrael, Mi atestos pri vi; Mi estas Dio, via Dio.

⁸Ne pro viaj oferdonoj Mi vin riproĉos, Ĉar viaj bruloferoj estas ĉiam antaŭ Mi.

⁹Mi ne prenos el via domo bovidon, Nek el viaj kortoj kaprojn:

¹⁰Ĉar al Mi apartenas ĉiuj bestoj en la arbaroj, Miloj da brutoj sur la montoj;

¹¹Mi konas ĉiujn birdojn sur la montoj, Kaj ĉiuj bestoj de la kampoj estas antaŭ Mi.

¹²Se Mi fariĝus malsata, Mi ne dirus al vi, Ĉar al Mi apartenas la mondo, kaj ĉio, kio ĝin plenigas.

¹³Ĉu Mi manĝas viandon de bovoj, Kaj ĉu Mi trinkas sangon de kaproj?

¹⁴Oferdonu al Dio dankon, Kaj plenumu antaŭ la Plejaltulo viajn promesojn.

¹⁵Voku Min en la tago de mizero; Mi vin liberigos, kaj vi Min gloros.

¹⁶Sed al la malpiulo Dio diris: Por kio vi parolas pri Miaj leĝoj Kaj portas Mian interligon en via buŝo,

¹⁷Dum vi malamas moralinstruon Kaj ĵetas Miajn vortojn malantaŭen de vi?

¹⁸Kiam vi vidas ŝteliston, vi aliĝas al li, Kaj kun adultuloj vi estas partoprenanto;

¹⁹Vian buŝon vi uzas por malbono, Kaj via lango plektas falsaĵon;

²⁰Vi sidas kaj parolas kontraŭ via frato, Pri la filo de via patrino vi kalumnias.

²¹Tion vi faris, kaj Mi silentis; Kaj vi pensis, ke Mi estas tia, kiel vi. Mi punos vin, kaj Mi metos ĉion antaŭ viajn okulojn.

²²Komprenu ĉi tion, vi, kiuj forgesas Dion; Alie Mi disŝiros, kaj neniu savos.

²³Kiu oferdonas dankon, tiu Min honoras; Kaj kiu estas singarda en la vojo, Al tiu Mi aperigos Dian helpon.