Read La Sankta Biblio 1926 esparanto Psalmaro 51 Bible Online

Psalmaro 51 - La Sankta Biblio 1926 esparanto bible

Psalmaro 51

¹Al la ĥorestro. Psalmo de David, kiam venis al li la profeto Natan post lia aliĝo al Bat-Ŝeba. Korfavoru min, ho Dio, laŭ Via boneco; Laŭ Via granda kompatemeco elstreku miajn pekojn.

²Lavu min tute pure de mia krimo, Kaj purigu min de mia peko.

³Ĉar miajn kulpojn mi konsciadas; Kaj mia peko estas ĉiam antaŭ mi.

⁴Antaŭ Vi sola mi pekis, Kaj mi faris tion, kio estas malbona antaŭ Viaj okuloj; Tial Vi estas justa en Via vorto Kaj pura en Via juĝo.

⁵Mi estas ja naskita en krimo; Kaj en peko gravediĝis per mi mia patrino.

⁶Vi amas ja veron en la koro, Kaj en kaŝiteco Vi aperigas al mi saĝon.

⁷Senpekigu min per hisopo, kaj mi fariĝos pura; Lavu min, kaj mi estos pli blanka ol neĝo.

⁸Aŭdigu al mi ĝojon kaj gajecon, Kaj regajiĝos la ostoj, kiujn Vi batis.

⁹Kaŝu Vian vizaĝon de miaj pekoj, Kaj ĉiujn miajn krimojn elstreku.

¹⁰Koron puran kreu al mi, ho Dio, Kaj spiriton fidelan novigu en mi.

¹¹Ne forpuŝu min de Via vizaĝo, Kaj Vian sanktan spiriton ne forprenu de mi.

¹²Redonu al mi la ĝojon de Via helpo; Kaj spirito bonfara fortikigu min.

¹³Mi instruos al la krimuloj Vian vojon; Kaj pekuloj revenos al Vi.

¹⁴Liberigu min de sango, ho Dio, Dio de mia savo; Mia lango kantos Vian justecon.

¹⁵Ho, mia Sinjoro, malfermu miajn lipojn; Kaj mia buŝo rakontos Vian gloron.

¹⁶Ĉar Vi ne deziras oferdonon, alie mi ĝin donus; Brulofero ne plaĉas al Vi.

¹⁷Oferdonoj al Dio estas spirito suferanta; Koron suferantan kaj humilan Vi, ho Dio, ne malŝatas.

¹⁸Bonfaru al Cion laŭ Via favoro, Konstruu la murojn de Jerusalem;

¹⁹Tiam plaĉos al Vi oferdonoj de pieco, brulofero kaj plenofero; Tiam oni metos sur Vian altaron junajn bovojn.