Read La Sankta Biblio 1926 esparanto Psalmaro 55 Bible Online

Psalmaro 55 - La Sankta Biblio 1926 esparanto bible

Psalmaro 55

¹Al la ĥorestro. Por kordaj instrumentoj. Instruo de David. Aŭskultu, ho Dio, mian preĝon, Kaj ne kaŝu Vin de mia petego.

²Atentu min, kaj respondu al mi; Mi ĝemas en mia malĝojo, kaj mi ploregas,

³Pro la kriado de la malamiko, Pro la premado de la malbonulo, Ĉar ili preparas kontraŭ mi malicon Kaj kolere min malamas.

⁴Mia koro tremas en mi; Kaj teruroj de morto min atakis;

⁵Timo kaj tremo venis sur min, Kaj konsternego min kovris.

⁶Kaj mi diris: Ho, se mi havus flugilojn kiel kolombo! Mi forflugus kaj mi ie ekloĝus;

⁷Malproksimen mi foriĝus, Mi ekloĝus en dezerto. Sela.

⁸Mi rapidus al rifuĝejo For de ventego kaj fulmotondro.

⁹Pereigu, ho mia Sinjoro, disigu ilian langon; Ĉar mi vidas rabadon kaj malpacon en la urbo.

¹⁰Tage kaj nokte ili ĉirkaŭas ĝiajn murojn; Kaj malbonfaroj estas interne de ĝi;

¹¹Pereigemo estas interne de ĝi, Kaj trompo kaj falso ne forlasas ĝian straton.

¹²Ne malamiko min ja insultas — mi tion tolerus; Ne mia malamanto tenas sin grande kontraŭ mi — mi kaŝus min de li;

¹³Sed vi, kiu estas tia sama homo, kiel mi, Mia amiko, mia kamarado,

¹⁴Vi, kun kiu ni kune intime paroladis, Iradis en la domon de Dio en la homamaso.

¹⁵La morto ilin kaptu, Ili iru vivaj en Ŝeolon; Ĉar malbonagado estas en iliaj loĝejoj, en ilia mezo.

¹⁶Mi vokas al Dio, Kaj la Eternulo min savos.

¹⁷Vespere kaj matene kaj tagmeze mi plendas kaj ĝemas; Kaj Li aŭskultas mian voĉon.

¹⁸Li liberigis pace mian animon de atako kontraŭ mi, Kiam ili grandanombre estis kontraŭ mi.

¹⁹Dio aŭskultos, kaj Li humiligos ilin, La vivanto de eterne; Sela. Ĉar ili ne ŝanĝiĝas Kaj ili ne timas Dion.

²⁰Li metis sian manon sur siajn amikojn, Li rompis sian interligon;

²¹Pli glata ol butero estas lia buŝo, Sed milito estas en lia koro; Liaj vortoj estas pli delikataj ol oleo, Sed ili estas nudigitaj glavoj.

²²Metu vian ŝarĝon sur la Eternulon, Kaj Li vin subtenos; Neniam Li lasos fali piulon.

²³Vi, ho Dio, malsuprenigos ilin en la foson de pereo; La homoj de sango kaj falso ne atingos la duonon de siaj tagoj; Sed mi fidas Vin.