Read La Sankta Biblio 1926 esparanto Psalmaro 64 Bible Online

Psalmaro 64 - La Sankta Biblio 1926 esparanto bible

Psalmaro 64

¹Al la ĥorestro. Psalmo de David. Aŭdu, ho Dio, mian krion en mia malĝojo; De la teruro pri malamiko gardu mian vivon.

²Ŝirmu min kontraŭ la konspiro de maliculoj, Kontraŭ la amaso de krimuloj,

³Kiuj akrigis sian langon kiel glavon, Direktis vortojn maldolĉajn, kvazaŭ siajn sagojn,

⁴Por pafi kaŝe kontraŭ senkulpulon; Subite ili pafas kontraŭ lin kaj ne timas.

⁵Ili fortikigas sin en malbona intenco, Ili konsiliĝas, por meti sekrete retojn; Ili diras: Kiu ilin vidos?

⁶Ili elpensas krimojn, kaŝas ilin tre zorge interne en si, En la profundeco de la koro.

⁷Sed Dio pafos kontraŭ ilin; Per sago subita ili estos frapitaj.

⁸Kaj ili falos per sia propra lango; Ĉiuj, kiuj ilin vidos, balancos la kapon.

⁹Kaj ektimos ĉiuj homoj, Kaj ili rakontos la agon de Dio Kaj komprenos Liajn farojn.

¹⁰La virtulo ĝojos per la Eternulo, kaj fidos Lin; Kaj triumfos ĉiuj, kiuj havas pian koron.