Read La Sankta Biblio 1926 esparanto Psalmaro 76 Bible Online

Psalmaro 76 - La Sankta Biblio 1926 esparanto bible

Psalmaro 76

¹Al la ĥorestro. Por kordaj instrumentoj. Psalmo de Asaf. Kanto. Dio estas konata en Judujo; Granda estas Lia nomo en Izrael.

²En Salem estas Lia tendo, Kaj Lia loĝejo sur Cion.

³Tie Li rompis la sagojn de pafarko, Ŝildon, glavon, kaj militon. Sela.

⁴Vi estas majesta kaj potenca sur la sovaĝbestaj montoj.

⁵Senarmiĝis la fortkoruloj, endormiĝis; Kaj ĉiuj militistoj restis kvazaŭ sen manoj.

⁶De Via minaco, ho Dio de Jakob, Paraliziĝis rajdisto kaj ĉevalo.

⁷Vi, Vi estas timinda; Kaj kiu restos staranta antaŭ Vi, kiam ekflamas Via kolero?

⁸El la ĉielo Vi aŭdigis juĝon; La tero ektimis kaj eksilentis,

⁹Kiam Dio leviĝis, por juĝi, Por savi ĉiujn humilulojn sur la tero. Sela.

¹⁰Ĉar la kolero de homo fariĝas Via gloro, Kiam Vi zonas Vin per la resto de Via kolero.

¹¹Faru kaj plenumu promesojn al la Eternulo, via Dio; Vi ĉiuj, kiuj Lin ĉirkaŭas, alportu donacojn al la Timindulo.

¹²Li humiligis la spiriton de potenculoj; Li estas timinda por la reĝoj de la tero.