Read La Sankta Biblio 1926 esparanto Psalmaro 81 Bible Online

Psalmaro 81 - La Sankta Biblio 1926 esparanto bible

Psalmaro 81

¹Al la ĥorestro. Por la gitito. De Asaf. Laŭte kantu al Dio, nia forto; Ĝoje kriu al la Dio de Jakob.

²Sonigu kanton, donu tamburinon, Ĉarman harpon, kaj psalteron.

³Muziku per korno en novmonato, Je la plenluno, en la tago de nia festo.

⁴Ĉar ĝi estas leĝo por Izrael Kaj ordono de la Dio de Jakob.

⁵Li aranĝis ĝin kiel ateston por Jozef, Kiam Li eliris kontraŭ la landon Egiptan. Lingvon, kiun mi ne konas, mi aŭdis:

⁶Mi liberigis lian dorson de ŝarĝo, Liaj manoj liberiĝis de korboj.

⁷En la mizero vi vokis, kaj Mi vin helpis; Mi respondis al vi en mistera loko de tondro; Mi esploris vin ĉe la akvo de Malpaco. Sela.

⁸Aŭdu, ho Mia popolo, Mi atestos al vi; Ho Izrael, se vi Min aŭskultus!

⁹Ne estu ĉe vi alia dio; Kaj ne adoru fremdan dion.

¹⁰Mi estas la Eternulo, via Dio, Kiu elkondukis vin el la lando Egipta; Malfermu larĝe vian buŝon, kaj Mi ĝin plenigos.

¹¹Sed Mia popolo ne aŭskultis Mian voĉon, Izrael ne obeis Min.

¹²Kaj Mi lasis ilin al la kaprico de ilia koro, Ke ili iru laŭ siaj intencoj.

¹³Ho, se Mia popolo aŭskultus Min, Se Izrael irus per Miaj vojoj!

¹⁴Rapide Mi faligus iliajn malamikojn, Kaj kontraŭ iliajn premantojn Mi direktus Mian manon.

¹⁵La malamantoj de la Eternulo humiliĝus antaŭ Li, Kaj ilia bonstato estus eterna.

¹⁶Kaj Mi manĝigus al ili grason de tritiko, Kaj Mi satigus vin per mielo el roko.