Read La Sankta Biblio 1926 esparanto Psalmaro 83 Bible Online

Psalmaro 83 - La Sankta Biblio 1926 esparanto bible

Psalmaro 83

¹Kanto-psalmo de Asaf. Ho Dio, ne silentu; Ne estu senparola kaj ne restu trankvila, ho Dio!

²Ĉar jen Viaj malamikoj ekbruis, Kaj Viaj malamantoj levis la kapon.

³Kontraŭ Via popolo ili sekrete konspiras, Kaj ili konsiliĝas kontraŭ Viaj gardatoj.

⁴Ili diris: Ni iru, kaj ni ekstermu ilin el inter la popoloj, Ke oni ne plu rememoru la nomon de Izrael.

⁵Ĉar ili unuanime interkonsentis, Ili faris interligon kontraŭ Vi:

⁶La tendoj de Edom kaj la Iŝmaelidoj, Moab kaj la Hagaridoj,

⁷Gebal kaj Amon kaj Amalek, La Filiŝtoj kun la loĝantoj de Tiro;

⁸Ankaŭ Asirio aliĝis al ili Kaj fariĝis helpo al la idoj de Lot. Sela.

⁹Faru al ili, kiel al Midjan, Kiel al Sisera, kiel al Jabin ĉe la torento Kiŝon,

¹⁰Kiuj estis ekstermitaj en En-Dor Kaj fariĝis sterko por la tero.

¹¹Agu kun iliaj princoj kiel kun Oreb kaj Zeeb, Kaj kun ĉiuj iliaj estroj kiel kun Zebaĥ kaj Calmuna,

¹²Kiuj diris: Ni ekposedu la loĝejon de Dio!

¹³Ho mia Dio, similigu ilin al turniĝanta polvo, Al pajlrestaĵo antaŭ vento.

¹⁴Kiel fajro bruligas arbaron, Kaj kiel flamo bruldezertigas montojn,

¹⁵Tiel pelu ilin per Via ventego, Kaj per Via fulmotondro ilin timigu.

¹⁶Plenigu ilian vizaĝon per malhonoro, Por ke ili turniĝu al Via nomo, ho Eternulo.

¹⁷Ili estu hontigitaj kaj timigitaj por ĉiam, Ili malhonoriĝu kaj pereu.

¹⁸Kaj ili eksciu, ke Vi, kies nomo estas ETERNULO, Estas sola Plejaltulo super la tuta tero.