Read La Sankta Biblio 1926 esparanto Psalmaro 92 Bible Online

Psalmaro 92 - La Sankta Biblio 1926 esparanto bible

Psalmaro 92

¹Psalmo-kanto por la tago sabata. Bone estas glori la Eternulon Kaj prikanti Vian nomon, ho Plejaltulo;

²Rakonti matene pri Via boneco Kaj nokte pri Via fideleco,

³Sur dekkorda instrumento kaj sur psaltero, Per solenaj sonoj de harpo.

⁴Ĉar Vi ĝojigis min, ho Eternulo, per Viaj agoj; La farojn de Viaj manoj mi prikantos.

⁵Kiel grandaj estas Viaj faroj, ho Eternulo! Tre profundaj estas Viaj pensoj.

⁶Malklerulo ne scias, Kaj malsaĝulo tion ne komprenas.

⁷Kiam malvirtuloj verdestas kiel herbo Kaj ĉiuj malbonaguloj floras, Tio kondukas al ilia ekstermiĝo por eterne.

⁸Kaj Vi estas alta eterne, ho Eternulo.

⁹Ĉar jen Viaj malamikoj, ho Eternulo, Jen Viaj malamikoj pereas, Diskuras ĉiuj malbonaguloj.

¹⁰Sed mian kornon Vi altigas kiel la kornon de bubalo; Mi estas oleita per freŝa oleo.

¹¹Kaj mia okulo rigardas miajn malamikojn; Pri la malbonaguloj, miaj kontraŭuloj, aŭdas miaj oreloj.

¹²Virtulo verdestas, kiel palmo, Staras alte, kiel cedro sur Lebanon.

¹³Plantitaj en la domo de la Eternulo, Ili verdestas en la kortoj de nia Dio.

¹⁴Ili floras ankoraŭ en la maljuneco, Estas sukplenaj kaj freŝaj,

¹⁵Por sciigi, ke la Eternulo estas justa, Mia fortikaĵo, kaj ne ekzistas en Li maljusteco.