Read La Sankta Biblio 1926 esparanto Psalmaro 94 Bible Online

Psalmaro 94 - La Sankta Biblio 1926 esparanto bible

Psalmaro 94

¹Dio de venĝo, ho Eternulo, Dio de venĝo, aperu!

²Leviĝu, Juĝanto de la tero; Redonu la meritaĵon al la fieruloj.

³Kiel longe la malvirtuloj, ho Eternulo, Kiel longe la malvirtuloj triumfos?

⁴Ili estas malhumilaj, parolas arogantaĵon; Fanfaronas ĉiuj malbonaguloj.

⁵Vian popolon, ho Eternulo, ili premas, Kaj Vian heredon ili turmentas.

⁶Vidvinon kaj fremdulon ili mortigas, Kaj orfojn ili buĉas.

⁷Kaj ili diras: La Eternulo ne vidas, Kaj la Dio de Jakob ne scias.

⁸Komprenu, senprudentuloj en la popolo; Kaj vi, malsaĝuloj, kiam vi saĝiĝos?

⁹Ĉu ne aŭdas Tiu, kiu aranĝis orelon? Ĉu ne vidas Tiu, kiu kreis okulon?

¹⁰Ĉu ne punas la ĝustiganto de la popoloj, Kiu instruas al homo scion?

¹¹La Eternulo scias la pensojn de homo, Ke ili estas vantaj.

¹²Bone estas al la homo, kiun Vi, ho Eternulo, ĝustigas, Kaj al kiu Vi instruas Vian leĝon,

¹³Por trankviligi lin en la malbonaj tagoj, Ĝis estos pretigita la foso por la malvirtulo.

¹⁴Ĉar la Eternulo ne forpuŝos Sian popolon, Kaj Sian heredon Li ne forlasos.

¹⁵Ĉar juĝo revenos al vero, Kaj ĝin sekvos ĉiuj virtkoruloj.

¹⁶Kiu helpas min kontraŭ malbonuloj? Kiu staras apud mi kontraŭ malbonaguloj?

¹⁷Se la Eternulo ne estus mia helpanto, Mia animo preskaŭ kuŝus jam silenta.

¹⁸Kiam mi diris, ke mia piedo ŝanceliĝas, Via boneco, ho Eternulo, min subtenis.

¹⁹Kiam mi havas interne multe da maltrankvilaj pensoj, Viaj konsoloj karesas mian animon.

²⁰Ĉu aliĝos al Vi trono de maljusteco, Kiu aranĝas maljustaĵon en la nomo de la leĝo?

²¹Ili sin armas kontraŭ la animo de virtulo, Kaj sangon senkulpan ili akuzas.

²²Sed la Eternulo estos mia rifuĝejo; Kaj mia Dio estos la roko de mia ŝirmo.

²³Kaj Li redonos al ili por iliaj malbonagoj, Kaj por ilia malboneco Li ilin ekstermos; Ilin ekstermos la Eternulo, nia Dio.