Read La Sankta Biblio 1926 esparanto Psalmaro 97 Bible Online

Psalmaro 97 - La Sankta Biblio 1926 esparanto bible

Psalmaro 97

¹La Eternulo reĝas; ĝoju la tero; Estu gajaj la multaj insuloj.

²Nubo kaj mallumo estas ĉirkaŭ Li; Vero kaj justeco estas la fundamento de Lia trono.

³Fajro iras antaŭ Li, Kaj bruligas ĉirkaŭe Liajn malamikojn.

⁴Liaj fulmoj lumigas la mondon; La tero vidas, kaj tremas.

⁵Montoj fandiĝas kiel vakso antaŭ la vizaĝo de la Eternulo, Antaŭ la vizaĝo de la Sinjoro de la tuta tero.

⁶La ĉielo rakontas Lian veron, Kaj ĉiuj popoloj vidas Lian gloron.

⁷Hontiĝu ĉiuj, kiuj servas al idoloj, Kiuj laŭdas sin pro diaĉoj. Kliniĝu antaŭ Li ĉiuj dioj.

⁸Aŭdis kaj ekĝojis Cion, Kaj ektriumfis la filinoj de Jehuda Pro Viaj juĝoj, ho Eternulo.

⁹Ĉar Vi, ho Eternulo, estas Plejalta super la tuta tero, Vi tre alte leviĝis super ĉiuj dioj.

¹⁰Amantoj de la Eternulo, malamu malbonon. Li gardas la animojn de Siaj fideluloj; Li savos ilin de la mano de malvirtuloj.

¹¹Lumo verŝiĝas sur virtulon, Kaj ĝojo sur purkorulojn.

¹²Ĝoju, virtuloj, pro la Eternulo, Kaj gloru Lian sanktan nomon.