Read La Sankta Biblio 1926 esparanto Psalmaro 98 Bible Online

Psalmaro 98 - La Sankta Biblio 1926 esparanto bible

Psalmaro 98

¹Psalmo. Kantu al la Eternulo novan kanton, Ĉar miraklojn Li faris; Helpis Lin Lia dekstra mano kaj Lia sankta brako.

²La Eternulo aperigis Sian savon; Antaŭ la okuloj de la popoloj Li malkaŝis Sian justecon.

³Li memoras Sian bonecon kaj Sian fidelecon al la domo de Izrael. Vidis ĉiuj finoj de la tero la helpon de nia Dio.

⁴Ĝoje kriu al la Eternulo la tuta tero; Kantu, gloru, kaj muziku.

⁵Muziku al la Eternulo per harpo, Per harpo kaj per sonoj de psalmo.

⁶Per trumpetoj kaj per sono de korno Ĝoje kriu antaŭ la Reĝo, la Eternulo.

⁷Bruu la maro, kaj ĉio, kio ĝin plenigas, La mondo kaj ĝiaj loĝantoj.

⁸La riveroj plaŭdu per la manoj, La montoj kune kantu ĝoje,

⁹Antaŭ la Eternulo, ĉar Li venas, por juĝi la teron; Li juĝos la mondon kun justeco kaj la popolojn kun vereco.