Read La Sankta Biblio 1926 esparanto Sentencoj 15 Bible Online

Sentencoj 15 - La Sankta Biblio 1926 esparanto bible

Sentencoj 15

¹Milda respondo kvietigas koleron; Sed malmola vorto ekscitas koleron.

²La lango de saĝuloj bonigas la instruon; Sed la buŝo de malsaĝuloj elparolas sensencaĵon.

³Sur ĉiu loko estas la okuloj de la Eternulo; Ili vidas la malbonulojn kaj bonulojn.

⁴Milda lango estas arbo de vivo; Sed malbonparola rompas la spiriton.

⁵Malsaĝulo malŝatas la instruon de sia patro; Sed kiu plenumas la admonon, tiu estas prudenta.

⁶En la domo de virtulo estas multe da trezoroj; Sed en la profito de malvirtulo estas pereo.

⁷La buŝo de saĝuloj semas instruon; Sed la koro de malsaĝuloj ne estas tia.

⁸Oferdono de malvirtuloj estas abomenaĵo por la Eternulo; Sed la preĝo de virtuloj al Li plaĉas.

⁹Abomenaĵo por la Eternulo estas la vojo de malvirtulo; Sed kiu celas virton, tiun Li amas.

¹⁰Malbona puno atendas tiun, kiu forlasas la vojon; Kaj la malamanto de admono mortos.

¹¹Ŝeol kaj la abismo estas antaŭ la Eternulo: Tiom pli la koroj de la homidoj.

¹²Mokanto ne amas tiun, kiu lin admonas; Al saĝuloj li ne iras.

¹³Ĝoja koro faras la vizaĝon ĝoja; Sed ĉe ĉagreno de la koro la spirito estas malgaja.

¹⁴La koro de saĝulo serĉas instruon; Sed la buŝo de malsaĝuloj nutras sin per malsaĝeco.

¹⁵Ĉiuj tagoj de malfeliĉulo estas malbonaj; Sed kontenta koro estas festenado.

¹⁶Pli bona estas malmulto kun timo antaŭ la Eternulo, Ol granda trezoro kun maltrankvileco ĉe ĝi.

¹⁷Pli bona estas manĝo el verdaĵo, sed kun amo, Ol grasa bovo, sed kun malamo.

¹⁸Kolerema homo kaŭzas malpacon; Kaj pacienculo kvietigas disputon.

¹⁹La vojo de maldiligentulo estas kiel dornarbeto; Sed la vojo de virtuloj estas ebenigita.

²⁰Saĝa filo ĝojigas la patron; Sed homo malsaĝa estas malhonoro por sia patrino.

²¹Malsaĝeco estas ĝojo por malsaĝulo; Sed homo prudenta iras ĝustan vojon.

²²Kie ne estas konsilo, tie la entreprenoj neniiĝas; Sed ĉe multe da konsilantoj ili restas fortikaj.

²³Plezuro por homo estas en la respondo de lia buŝo; Kaj kiel bona estas vorto en la ĝusta tempo!

²⁴La vojo de la vivo por saĝulo iras supren, Por ke li evitu Ŝeolon malsupre.

²⁵La domon de fieruloj la Eternulo ruinigas; Sed Li gardas la limojn de vidvino.

²⁶Abomenaĵo por la Eternulo estas la intencoj de malnoblulo; Sed agrablaj estas la paroloj de puruloj.

²⁷Profitemulo malĝojigas sian domon; Sed kiu malamas donacojn, tiu vivos.

²⁸La koro de virtulo pripensas respondon; Sed la buŝo de malvirtuloj elfluigas malbonon.

²⁹La Eternulo estas malproksima de la malvirtuloj; Sed la preĝon de la virtuloj Li aŭskultas.

³⁰Luma okulo ĝojigas la koron; Bona sciigo fortikigas la ostojn.

³¹Orelo, kiu aŭskultas la instruon de la vivo, Loĝos inter saĝuloj.

³²Kiu forpuŝas admonon, tiu malestimas sian animon; Sed kiu aŭskultas instruon, tiu akiras saĝon.

³³La timo antaŭ la Eternulo instruas saĝon, Kaj humileco troviĝas antaŭ honoro.