Read La Sankta Biblio 1926 esparanto Sentencoj 18 Bible Online

Sentencoj 18 - La Sankta Biblio 1926 esparanto bible

Sentencoj 18

¹Kiu apartiĝas, tiu serĉas sian volupton Kaj iras kontraŭ ĉiu saĝa konsilo.

²Malsaĝulo ne deziras prudenton, Sed nur malkovri sian koron.

³Kiam venas malvirtulo, Venas ankaŭ malestimo kun honto kaj moko.

⁴La vortoj de homa buŝo estas profunda akvo; La fonto de saĝo estas fluanta rivero.

⁵Ne estas bone favori malvirtulon, Por faligi virtulon ĉe la juĝo.

⁶La lipoj de malsaĝulo kondukas al malpaco, Kaj lia buŝo venigas batojn.

⁷La buŝo de malsaĝulo estas pereo por li, Kaj liaj lipoj enretigas lian animon.

⁸La vortoj de kalumnianto estas kiel frandaĵoj, Kaj ili penetras en la profundon de la ventro.

⁹Kiu estas senzorga en sia laborado, Tiu estas frato de pereiganto.

¹⁰La nomo de la Eternulo estas fortika turo: Tien kuras virtulo, kaj estas ŝirmata.

¹¹La havo de riĉulo estas lia fortika urbo, Kaj kiel alta muro en lia imago.

¹²Antaŭ la pereo la koro de homo fieriĝas, Kaj antaŭ honoro estas humileco.

¹³Kiu respondas, antaŭ ol li aŭdis, Tiu havas malsaĝon kaj honton.

¹⁴La spirito de homo nutras lin en lia malsano; Sed spiriton premitan kiu povas elporti?

¹⁵La koro de saĝulo akiras prudenton, Kaj la orelo de saĝuloj serĉas scion.

¹⁶Donaco de homo donas al li vastecon Kaj kondukas lin al la grandsinjoroj.

¹⁷La unua estas prava en sia proceso; Sed venas lia proksimulo kaj ĝin klarigas.

¹⁸La loto ĉesigas disputojn Kaj decidas inter potenculoj.

¹⁹Malpaciĝinta frato estas pli obstina, ol fortikigita urbo; Kaj disputoj estas kiel rigliloj de turo.

²⁰De la fruktoj de la buŝo de homo satiĝas lia ventro; Li manĝas la produktojn de siaj lipoj.

²¹Morto kaj vivo dependas de la lango; Kaj kiu ĝin amas, tiu manĝos ĝiajn fruktojn.

²²Kiu trovis edzinon, tiu trovis bonon Kaj ricevis favoron de la Eternulo.

²³Per petegado parolas malriĉulo; Kaj riĉulo respondas arogante.

²⁴Havi multajn amikojn estas embarase; Sed ofte amiko estas pli sindona ol frato.