Read La Sankta Biblio 1926 esparanto Sentencoj 20 Bible Online

Sentencoj 20 - La Sankta Biblio 1926 esparanto bible

Sentencoj 20

¹La vino estas blasfemanto, ebriiga trinkaĵo estas sovaĝa; Kaj kiu delogiĝas per ili, tiu ne estas prudenta.

²Minaco de reĝo estas kiel kriego de leono; Kiu lin kolerigas, tiu pekas kontraŭ sia animo.

³Estas honoro por homo ĉesigi malpacon; Sed ĉiu malsaĝulo estas malpacema.

⁴En la malvarma tempo mallaborulo ne plugas; Li petos en aŭtuno, kaj li nenion ricevos.

⁵Intenco en la koro de homo estas profunda akvo; Sed homo saĝa ĝin elĉerpos.

⁶Multaj homoj proklamas pri sia boneco; Sed kiu trovos homon fidelan?

⁷Virtulo iras en sia senpekeco; Feliĉaj estas liaj infanoj post li.

⁸Reĝo, kiu sidas sur trono de juĝo, Disventumas per siaj okuloj ĉion malbonan.

⁹Kiu povas diri: Mi purigis mian koron, Mi estas libera de mia peko?

¹⁰Neegalaj peziloj, neegalaj mezuroj, Ambaŭ estas abomenaĵo por la Eternulo.

¹¹Eĉ knabon oni povas ekkoni laŭ liaj faroj, Ĉu estas pura kaj justa lia konduto.

¹²Orelon aŭdantan kaj okulon vidantan: Ilin ambaŭ kreis la Eternulo.

¹³Ne amu dormon, por ke vi ne malriĉiĝu; Malfermu viajn okulojn, kaj vi satiĝos de pano.

¹⁴Malbona, malbona, diras la aĉetanto; Sed kiam li foriris, tiam li fanfaronas.

¹⁵Oni povas havi oron kaj multe da perloj; Sed buŝo prudenta estas multevalora ilo.

¹⁶Prenu la veston de tiu, kiu garantiis por aliulo; Kaj pro la fremduloj prenu de li garantiaĵon.

¹⁷Malhonesta pano estas bongusta por homo; Sed lia buŝo poste estos plena de ŝtonetoj.

¹⁸Intencoj fortikiĝas per konsilo; Kaj militon oni faru prudente.

¹⁹Kiu malkaŝas sekreton, tiu estas kiel kalumnianto; Ne komunikiĝu kun tiu, kiu havas larĝan buŝon.

²⁰Kiu malbenas sian patron kaj sian patrinon, Ties lumilo estingiĝos meze de profunda mallumo.

²¹Heredo, al kiu oni komence tro rapidas, Ne estas benata en sia fino.

²²Ne diru: Mi repagos malbonon; Fidu la Eternulon, kaj Li vin helpos.

²³Neegalaj peziloj estas abomenaĵo por la Eternulo, Kaj malvera pesilo estas ne bona.

²⁴La irado de homo dependas de la Eternulo; Kiel homo povus kompreni sian vojon?

²⁵Ĝi estas reto por homo, se li rapidas nomi ion sankta Kaj esploras nur post faro de promeso.

²⁶Saĝa reĝo dispelas malvirtulojn, Kaj venigas radon sur ilin.

²⁷La animo de homo estas lumilo de la Eternulo; Ĝi esploras ĉiujn internaĵojn de la korpo.

²⁸Favorkoreco kaj veremeco hardas reĝon; Kaj per favorkoreco li subtenas sian tronon.

²⁹Gloro por junuloj estas ilia forto, Kaj ornamo por maljunuloj estas grizeco.

³⁰Vundoj de batoj devas penetri en malbonulon, Kaj frapoj devas iri profunde en lian korpon.