Read La Sankta Biblio 1926 esparanto Sentencoj 23 Bible Online

Sentencoj 23 - La Sankta Biblio 1926 esparanto bible

Sentencoj 23

¹Kiam vi sidiĝos, por manĝi kun reganto, Rigardu bone, kio estas antaŭ vi;

²Kaj vi metu tranĉilon al via gorĝo, Se vi estas avidulo.

³Ne deziru liajn bongustajn manĝojn; Ĉar ĝi estas trompa pano.

⁴Ne penu riĉiĝi; Forlasu vian pripensadon.

⁵Ĉu vi direktos viajn okulojn al ĝi? ĝi jam ne ekzistos; Ĉar riĉeco faras al si flugilojn kiel aglo, kaj forflugas al la ĉielo.

⁶Ne manĝu panon de malbondeziranto, Kaj ne deziru liajn bongustajn manĝojn.

⁷Ĉar kiaj estas la pensoj en lia animo, tia li ankaŭ estas: Manĝu kaj trinku, li diros al vi, Sed lia koro ne estas kun vi.

⁸La pecon, kiun vi manĝis, vi elvomos; Kaj vane vi perdis viajn agrablajn vortojn.

⁹En la orelojn de malsaĝulo ne parolu; Ĉar li malŝatos la saĝecon de viaj vortoj.

¹⁰Ne forŝovu la antikvajn limojn, Kaj sur la kampon de orfoj ne iru.

¹¹Ĉar ilia Liberiganto estas forta; Li defendos ilian aferon kontraŭ vi.

¹²Elmetu vian koron al instruo Kaj viajn orelojn al paroloj de prudento.

¹³Ne malvolu puni knabon: Se vi batos lin per kano, li ne mortos.

¹⁴Vi batos lin per kano, Kaj lian animon vi savos de Ŝeol.

¹⁵Mia filo, se via koro estos saĝa, Tiam ĝojos ankaŭ mia koro.

¹⁶Kaj mia internaĵo ĝojos, Kiam viaj lipoj parolos ĝustaĵon.

¹⁷Via koro sin tiru ne al pekuloj, Sed al timo antaŭ la Eternulo ĉiutage.

¹⁸Ĉar ekzistas estonteco, Kaj via espero ne perdiĝos.

¹⁹Aŭskultu vi, mia filo, kaj estu saĝa, Kaj direktu vian koron al la ĝusta vojo.

²⁰Ne estu inter la drinkantoj de vino, Inter tiuj, kiuj manĝas tro da viando;

²¹Ĉar drinkemulo kaj manĝegemulo malriĉiĝos, Kaj dormemulo havos sur si ĉifonaĵojn.

²²Aŭskultu vian patron, kiu vin naskigis, Kaj ne malŝatu vian patrinon, kiam ŝi maljuniĝos.

²³Veron aĉetu, kaj ne vendu saĝon Kaj instruon kaj prudenton.

²⁴Grandan ĝojon havas patro de virtulo, Kaj naskinto de saĝulo ĝojos pro li.

²⁵Via patro kaj via patrino ĝojos, Kaj via naskintino triumfos.

²⁶Donu, mia filo, vian koron al mi, Kaj al viaj okuloj plaĉu miaj vojoj.

²⁷Ĉar malĉastulino estas profunda foso, Kaj fremda edzino estas malvasta puto.

²⁸Ŝi embuskas kiel rabisto, Kaj kolektas ĉirkaŭ si perfidulojn.

²⁹Ĉe kiu estas ploro? ĉe kiu estas ĝemoj? ĉe kiu estas malpaco? Ĉe kiu estas plendoj? ĉe kiu estas senkaŭzaj batoj? Ĉe kiu estas malklaraj okuloj?

³⁰Ĉe tiuj, kiuj sidas malfrue ĉe vino, Ĉe tiuj, kiuj venas, por gustumi aroman trinkaĵon.

³¹Ne rigardu la vinon, kiel ruĝa ĝi estas, Kiel ĝi brilas en la pokalo, kiel glate ĝi eniras:

³²En la fino ĝi mordas kiel serpento Kaj pikas kiel vipuro.

³³Viaj okuloj vidos fremdaĵojn, Kaj via koro parolos malĝustaĵojn.

³⁴Kaj vi estos kiel dormanto meze de la maro, Kaj kiel dormanto sur la supro de masto.

³⁵Ili batis min, sed ĝi min ne doloris; Ili frapis min, sed mi ne sentis; Kiam mi vekiĝos, mi denove tion serĉos.