Read La Sankta Biblio 1926 esparanto Sentencoj 26 Bible Online

Sentencoj 26 - La Sankta Biblio 1926 esparanto bible

Sentencoj 26

¹Kiel neĝo en somero, kaj kiel pluvo en tempo de rikolto, Tiel ne konvenas honoro por malsaĝulo.

²Kiel birdo forleviĝas, kiel hirundo forflugas, Tiel senkaŭza malbeno ne efektiviĝas.

³Vipo estas por ĉevalo, brido por azeno, Kaj bastono por la dorso de malsaĝuloj.

⁴Ne respondu al malsaĝulo laŭ lia malsaĝeco, Por ke vi mem ne fariĝu egala al li.

⁵Respondu al malsaĝulo laŭ lia malsaĝeco, Por ke li ne estu saĝulo en siaj propraj okuloj.

⁶Kiu komisias aferon al malsaĝulo, Tiu tranĉas al si la piedojn kaj sin suferigas.

⁷Kiel la kruroj de lamulo pendas peze, Tiel estas sentenco en la buŝo de malsaĝuloj.

⁸Kiel iu, kiu alligas ŝtonon al ĵetilo, Tiel estas tiu, kiu faras honoron al malsaĝulo.

⁹Kiel dorna kano en la mano de ebriulo, Tiel estas sentenco en la buŝo de malsaĝuloj.

¹⁰Kompetentulo ĉion bone faras; Sed kiu dungas pasantojn, tiu dungas malsaĝulojn.

¹¹Kiel hundo revenas al sia vomitaĵo, Tiel malsaĝulo ripetas sian malsaĝaĵon.

¹²Ĉu vi vidas homon, kiu estas saĝa en siaj okuloj? Estas pli da espero por malsaĝulo ol por li.

¹³Maldiligentulo diras: Leono estas sur la vojo, Leono estas sur la stratoj.

¹⁴Pordo turniĝas sur sia hoko, Kaj maldiligentulo sur sia lito.

¹⁵Maldiligentulo ŝovas sian manon en la poton, Kaj ne volas venigi ĝin al sia buŝo.

¹⁶Maldiligentulo estas en siaj okuloj pli saĝa, Ol sep veraj saĝuloj.

¹⁷Pasanto, kiu sin miksas en malpropran disputon, Estas kiel iu, kiu kaptas hundon je la oreloj.

¹⁸Kiel frenezulo, kiu ĵetas fajron, Sagojn, kaj morton,

¹⁹Tiel estas homo, kiu trompas sian proksimulon, Kaj diras: Mi ja ŝercas.

²⁰Kie ne estas ligno, estingiĝas la fajro; Kaj se ne estas kalumnianto, ĉesiĝas malpaco.

²¹Karbo servas por ardaĵo, ligno por fajro, Kaj homo malpacema por provoki malpacon.

²²La vortoj de kalumnianto estas kiel frandaĵoj, Kaj ili penetras en la profundon de la ventro.

²³Varmegaj lipoj kun malica koro Estas nepurigita arĝento, kiu kovras argilaĵon.

²⁴Malamanto havas maskitajn parolojn, Kaj en sia koro li preparas malicon.

²⁵Kiam li ĉarmigas sian voĉon, ne kredu al li; Ĉar sep abomenaĵoj estas en lia koro.

²⁶Kiu trompe kaŝas malamon, Tiu aperigos sian malbonecon en popola kunveno.

²⁷Kiu fosas foson, tiu falos en ĝin; Kaj kiu rulas ŝtonon, al tiu ĝi revenos.

²⁸Mensogema lango malamas tiujn, kiujn ĝi dispremis; Kaj hipokrita buŝo kaŭzas pereon.