Read La Sankta Biblio 1926 esparanto Sentencoj 29 Bible Online

Sentencoj 29 - La Sankta Biblio 1926 esparanto bible

Sentencoj 29

¹Se homo ofte admonita restos obstina, Li subite pereos sen ia helpo.

²Kiam altiĝas virtuloj, la popolo ĝojas; Sed kiam regas malvirtulo, la popolo ĝemas.

³Homo, kiu amas saĝon, ĝojigas sian patron; Sed kiu komunikiĝas kun malĉastulinoj, tiu disperdas sian havon.

⁴Reĝo per justeco fortikigas la landon; Sed donacamanto ĝin ruinigas.

⁵Homo, kiu flatas al sia proksimulo, Metas reton antaŭ liaj piedoj.

⁶Per sia pekado malbona homo sin implikas; Sed virtulo triumfas kaj ĝojas.

⁷Virtulo penas ekkoni la aferon de malriĉuloj; Sed malvirtulo ne povas kompreni.

⁸Homoj blasfemantaj indignigas urbon; Sed saĝuloj kvietigas koleron.

⁹Se saĝa homo havas juĝan aferon kun homo malsaĝa, Tiam, ĉu li koleras, ĉu li ridas, li ne havas trankvilon.

¹⁰Sangaviduloj malamas senkulpulon; Sed virtuloj zorgas pri lia vivo.

¹¹Sian tutan koleron aperigas malsaĝulo; Sed saĝulo ĝin retenas.

¹²Se reganto atentas mensogon, Tiam ĉiuj liaj servantoj estas malvirtuloj.

¹³Malriĉulo kaj procentegisto renkontiĝas; La Eternulo donas lumon al la okuloj de ambaŭ.

¹⁴Se reĝo juĝas juste malriĉulojn, Lia trono fortikiĝas por ĉiam.

¹⁵Kano kaj instruo donas saĝon; Sed knabo, lasita al si mem, hontigas sian patrinon.

¹⁶Kiam altiĝas malvirtuloj, tiam multiĝas krimoj; Sed virtuloj vidos ilian falon.

¹⁷Punu vian filon, kaj li vin trankviligos, Kaj li donos ĝojon al via animo.

¹⁸Se ne ekzistas profetaj predikoj, tiam popolo fariĝas sovaĝa; Sed bone estas al tiu, kiu observas la leĝojn.

¹⁹Per vortoj sklavo ne instruiĝas; Ĉar li komprenas, sed ne obeas.

²⁰Ĉu vi vidas homon, kiu tro rapidas kun siaj vortoj? Estas pli da espero por malsaĝulo ol por li.

²¹Se oni de infaneco kutimigas sklavon al dorlotiĝado, Li poste fariĝas neregebla.

²²Kolerema homo kaŭzas malpacojn, Kaj flamiĝema kaŭzas multajn pekojn.

²³La fiereco de homo lin malaltigos; Sed humilulo atingos honoron.

²⁴Kiu dividas kun ŝtelisto, tiu malamas sian animon; Li aŭdas la ĵuron kaj nenion diras.

²⁵Timo antaŭ homoj faligas en reton; Sed kiu fidas la Eternulon, tiu estas ŝirmita.

²⁶Multaj serĉas favoron de reganto; Sed la sorto de homo dependas de la Eternulo.

²⁷Maljusta homo estas abomenaĵo por virtuloj; Kaj kiu iras la ĝustan vojon, tiu estas abomenaĵo por malvirtulo.