Read La Sankta Biblio 1926 esparanto Alt Kanto 2 Bible Online

Alt Kanto 2 - La Sankta Biblio 1926 esparanto bible

Alt Kanto 2

¹Mi estas la lilio de Ŝaron, La rozo de la valoj.

²Kiel rozo inter la dornoj, Tiel estas mia amatino inter la knabinoj.

³Kiel pomarbo inter arboj nefruktaj, Tiel estas mia amato inter la junuloj. Mi sopiris al lia ombro, jen mi sidiĝis; Kaj liaj fruktoj estas bongustaj al mia palato.

⁴Li enkonduku min en vindomon, Kaj lia standardo super mi estu la amo.

⁵Plifortigu min per vinberkuko, Refreŝigu min per pomsuko; Ĉar mi estas malsana de amo.

⁶Lia maldekstra mano estu sub mia kapo, Lia dekstra ĉirkaŭprenu min.

⁷Mi ĵurligas vin, ho filinoj de Jerusalem, Je la gazeloj aŭ la cervoj de la kampo: Ne veku nek sendormigu la amatinon, Ĝis ŝi mem volos.

⁸Ho, jen estas la voĉo de mia amato! Ho, jen li venas, Rapidante sur la montoj, saltante sur la altaĵoj.

⁹Mia amato similas al gazelo aŭ al cervo. Ho, jen li staras post nia muro, Rigardante tra la fenestro, Sin montrante ĉe la krado.

¹⁰Mia amato vokas, li parolas al mi: Leviĝu, mia amatino, mia belulino, ho venu;

¹¹Ĉar la vintro jam forpasis, La pluvo pasis kaj malaperis;

¹²La floroj jam estas sur la tero; La kantosezono jam alvenis, Kaj la voĉo de la turto jam aŭdiĝas en nia lando;

¹³La figarbo jam maturigas siajn fruktetojn, La vinbertrunkoj siajn vinberetojn, Kiuj jam bonodoras. Leviĝu, mia amatino, mia belulino, kaj venu.

¹⁴Ho mia kolombino, en la krevaĵoj de la roko, en la kaŝejo de la rokkrutaĵo, Montru al mi vian aspekton, aŭdigu al mi vian voĉon; Ĉar via voĉo estas dolĉa, kaj via aspekto estas bela.

¹⁵Kaptu al ni la ŝakalojn, la malgrandajn ŝakalojn, La detruantojn de la vinberĝardenoj, Kiam niaj vinberĝardenoj burĝonas.

¹⁶Mia amato apartenas al mi, Kaj mi apartenas al li, Kiu paŝtas inter la rozoj.

¹⁷Ĝis la tago malvarmetiĝos kaj la ombroj forkuros, Turnu vin, ho amato, similiĝu al gazelo aŭ al cervo Sur la montoj de aromaĵoj.