Read La Sankta Biblio 1926 esparanto Hoŝea 8 Bible Online

Hoŝea 8 - La Sankta Biblio 1926 esparanto bible

Hoŝea 8

¹Metu trumpeton al via buŝo! Li flugas kiel aglo al la domo de la Eternulo, pro tio, ke ili agis kontraŭ Mia interligo kaj defalis de Mia instruo.

²Al Mi ili vokos: Ho mia Dio, ni, Izraelidoj, ekkonis Vin.

³Izrael forpuŝis la bonon; malamiko lin persekutos.

⁴Ili starigis reĝojn, sed ne de Mi; ili starigis princojn, sed sen Mia scio; el sia arĝento kaj oro ili faris al si idolojn, por pereigi sin.

⁵Forpuŝita estas via bovido, ho Samario; ekflamis kontraŭ ili Mia kolero; kiel longe ankoraŭ ili ne povos puriĝi?

⁶Ĉar ĝi estas faritaĵo de Izrael; artisto ĝin faris, kaj ĝi ne estas dio; dispecetiĝos la bovido de Samario.

⁷Ĉar ili semas venton, ili rikoltos ventegon; grenon li ne havos; la kreskantaĵo ne donos farunon; se ĝi eĉ donos, fremduloj ĝin formanĝos.

⁸Izrael estas formanĝata; nun ili fariĝis inter la popoloj kiel senvalora vazo.

⁹Ĉar ili iris en Asirion, kiel sovaĝa azeno solece vaganta; la Efraimidoj donis amajn donacojn.

¹⁰Kvankam ili donis donacojn al la nacioj, Mi nun kolektus ilin, por ke ili iom ripozu de la ŝarĝo de la reĝo de la princoj.

¹¹Sed multe da altaroj konstruis Efraim, por peki; ili fariĝis por li altaroj pekigaj.

¹²Mi skribis por li la multon de Miaj leĝoj; sed li rigardas ilin kiel fremdaĵon.

¹³La oferojn, donacatajn al Mi, ili buĉas nur pro viando, por ĝin manĝi; la Eternulo ne deziras ilin; nun Li rememoros iliajn malbonagojn kaj punos iliajn pekojn; ili revenos en Egiptujon.

¹⁴Izrael forgesis sian Kreinton, kaj konstruas palacojn; Jehuda konstruis multe da fortikigitaj urboj; sed Mi sendos fajron sur liajn urbojn, kaj ĝi ekstermos liajn palacojn.