Read La Sankta Biblio 1926 esparanto Johano 10 Bible Online

Johano 10 - La Sankta Biblio 1926 esparanto bible

Johano 10

¹Vere, vere, mi diras al vi: Kiu eniras en la ŝafejon ne tra la pordo, sed aliloke suprengrimpas, tiu estas ŝtelisto kaj rabisto.

²Sed kiu eniras tra la pordo, tiu estas la paŝtisto de la ŝafoj.

³Al tiu la pordisto malfermas; kaj la ŝafoj aŭskultas lian voĉon, kaj li alvokas laŭ nomoj siajn proprajn ŝafojn, kaj elkondukas ilin.

⁴Kaj kiam li kondukis eksteren siajn ŝafojn, li iras antaŭ ili, kaj la ŝafoj lin sekvas, ĉar ili konas lian voĉon.

⁵Kaj fremdulon ili ne sekvos, sed forkuros de li, ĉar ili ne konas la voĉon de fremduloj.

⁶Tiun alegorion Jesuo diris al ili; sed ili ne komprenis, kiajn aferojn li parolas al ili.

⁷Jesuo do diris denove al ili: Vere, vere, mi diras al vi: Mi estas la pordo de la ŝafoj.

⁸Ĉiuj, kiuj venis pli frue ol mi, estas ŝtelistoj kaj rabistoj; sed la ŝafoj ne aŭskultis ilin.

⁹Mi estas la pordo; se iu tra mi eniras, tiu estos savita; kaj li eniros kaj eliros, kaj trovos paŝtaĵon.

¹⁰La ŝtelisto ne venas, krom por ŝteli kaj buĉi kaj pereigi; mi venis, por ke ili havu vivon, kaj havu ĝin abunde.

¹¹Mi estas la bona paŝtisto; la bona paŝtisto demetas sian vivon por la ŝafoj.

¹²La dungito, kaj tiu, kiu ne estas paŝtisto, kies propraĵo la ŝafoj ne estas, ekvidas la lupon venanta kaj lasas la ŝafojn kaj forkuras; kaj la lupo ilin kaptas kaj dispelas;

¹³li forkuras tial, ke li estas dungito kaj ne zorgas pri la ŝafoj.

¹⁴Mi estas la bona paŝtisto, kaj mi konas la miajn, kaj la miaj min konas

¹⁵tiel same, kiel la Patro min konas, kaj mi konas la Patron; kaj mi demetas mian vivon por la ŝafoj.

¹⁶Kaj aliajn ŝafojn mi havas, kiuj ne estas de ĉi tiu gregejo; ilin ankaŭ mi devas alkonduki, kaj ili aŭskultos mian voĉon; kaj estos unu grego, unu paŝtisto.

¹⁷Pro tio la Patro min amas, ke mi demetas mian vivon, por ke mi ĝin reprenu.

¹⁸Neniu ĝin forprenas de mi, sed mi ĝin demetas memvole. Mi havas la rajton ĝin demeti, kaj mi havas la rajton ĝin repreni. Ĉi tiun ordonon mi ricevis de mia Patro.

¹⁹Denove fariĝis malkonsento inter la Judoj pro tiuj diroj.

²⁰Kaj multaj el ili diris: Li havas demonon kaj estas freneza; kial vi lin aŭskultas?

²¹Aliaj diris: Tiuj ne estas diroj de demonhavanto. Ĉu demono povas malfermi la okulojn de blinduloj?

²²Okazis la festo de inaŭguro en Jerusalem, kaj estis vintro;

²³kaj Jesuo promenis en la templo, en la portiko de Salomono.

²⁴La Judoj do ĉirkaŭis lin, kaj diris al li: Ĝis kiam vi tenas en dubo nian animon? Se vi estas la Kristo, diru al ni malkaŝe.

²⁵Jesuo respondis al ili: Mi diris al vi, kaj vi ne kredas; la faroj, kiujn mi faras en la nomo de mia Patro, atestas pri mi.

²⁶Sed vi ne kredas, ĉar vi ne estas el miaj ŝafoj.

²⁷Miaj ŝafoj aŭskultas mian voĉon, kaj mi ilin konas, kaj ili min sekvas;

²⁸kaj mi donas al ili eternan vivon; kaj ili neniam pereos, kaj neniu ilin forkaptos el mia mano.

²⁹Mia Patro, kiu donis ilin al mi, superas ĉion; kaj neniu povas ion forkapti el la mano de mia Patro.

³⁰Mi kaj la Patro estas unu.

³¹Tiam la Judoj denove prenis ŝtonojn, por ŝtonmortigi lin.

³²Jesuo respondis al ili: Multajn bonajn farojn mi montris al vi de mia Patro; pro kiu el ili vi volas ŝtonmortigi min?

³³La Judoj respondis: Ne pro bona faro ni volas ŝtonmortigi vin, sed pro blasfemo, kaj ĉar vi, estante homo, pretendas esti Dio.

³⁴Jesuo respondis: Ĉu ne estas skribite en via leĝo: Mi diris: Vi estas dioj?

³⁵Se li nomis dioj tiujn, al kiuj venis la vorto de Dio (kaj la Skribo ne povas esti nuligita),

³⁶ĉu vi diras pri tiu, kiun la Patro konsekris kaj sendis en la mondon: Vi blasfemas; ĉar mi diris: Mi estas Filo de Dio?

³⁷Se mi ne faras la farojn de mia Patro, ne kredu al mi.

³⁸Sed se mi faras ilin, kvankam vi ne kredas al mi, kredu la farojn, por ke vi sciu kaj komprenu, ke la Patro estas en mi, kaj mi en la Patro.

³⁹Ili denove celis kapti lin, sed li iris for de ilia mano.

⁴⁰Li foriris denove trans Jordanon tien, kie Johano unue baptis, kaj tie li restadis.

⁴¹Kaj multaj venis al li, kaj diris: Johano ja ne faris signon; sed ĉio, kion Johano diris pri ĉi tiu, estis vera.

⁴²Kaj tie multaj kredis al li.