Read La Sankta Biblio 1926 esparanto Johano 15 Bible Online

Johano 15 - La Sankta Biblio 1926 esparanto bible

Johano 15

¹Mi estas la vera vinberarbo, kaj mia Patro estas la kultivisto.

²Ĉiun nefruktodonan branĉon en mi Li forprenas; kaj ĉiun fruktodonan branĉon Li purigas, por ke ĝi donu pli da frukto.

³Jam vi estas puraj pro la vorto, kiun mi parolis al vi.

⁴Restadu en mi, kaj mi en vi. Kiel la branĉo ne povas de si mem doni frukton, se ĝi ne restas en la vinberarbo, tiel ankaŭ vi ne povas, se vi ne restas en mi.

⁵Mi estas la vinberarbo; vi estas la branĉoj; kiu restadas en mi, kaj mi en li, tiu donas multe da frukto; ĉar sen mi vi nenion povas fari.

⁶Se iu ne restas en mi, tiu estas elĵetita, kiel la branĉo, kaj sekiĝas; kaj oni ilin kolektas kaj ĵetas en fajron, kaj ili brulas.

⁷Se vi restadas en mi, kaj miaj vortoj restadas en vi, petu kion ajn vi volos, kaj tio estos farita por vi.

⁸En tio mia Patro estas glorata, ke vi donas multe da frukto; kaj vi estos miaj disĉiploj.

⁹Kiel la Patro min amis, tiel mi ankaŭ vin amis; restadu en mia amo.

¹⁰Se vi observos miajn ordonojn, vi restados en mia amo tiel same, kiel mi observis la ordonojn de mia Patro kaj restadas en Lia amo.

¹¹Tion mi parolis al vi, por ke mia ĝojo en vi restadu, kaj via ĝojo estu plena.

¹²Jen estas mia ordono: ke vi amu unu alian tiel same, kiel mi vin amis.

¹³Neniu havas amon pli grandan ol tio, ke iu demetus sian vivon por siaj amikoj.

¹⁴Vi estas miaj amikoj, se vi faras tion, kion mi al vi ordonas.

¹⁵Mi jam ne nomas vin sklavoj, ĉar la sklavo ne scias, kion lia sinjoro faras; sed mi nomis vin amikoj, ĉar ĉion, kion mi aŭdis de mia Patro, mi sciigis al vi.

¹⁶Vi ne elektis min, sed mi elektis vin, kaj starigis vin, por ke vi iru kaj donu frukton, kaj ke via frukto daŭru; por ke la Patro donu al vi ĉion ajn, kion vi petos de Li en mia nomo.

¹⁷Tion mi ordonas al vi, por ke vi amu unu la alian.

¹⁸Se la mondo malamas vin, vi scias, ke ĝi malamis min pli frue, ol vin.

¹⁹Se vi estus el la mondo, la mondo amus siajn proprajn; sed ĉar vi ne estas el la mondo, kaj mi elektis vin for de la mondo, tial la mondo vin malamas.

²⁰Memoru la vorton, kiun mi diris al vi: Sklavo ne estas pli granda ol lia sinjoro. Se ili min persekutis, vin ankaŭ ili persekutos; se ili observis mian vorton, ankaŭ vian ili observos.

²¹Sed ĉion ĉi tion ili faros al vi pro mia nomo, ĉar ili ne konas Tiun, kiu min sendis.

²²Se mi ne estus veninta kaj parolinta al ili, ili ne havus pekon; sed nun ili ne havas pretekston por sia peko.

²³Tiu, kiu min malamas, malamas ankaŭ mian Patron.

²⁴Se mi ne estus farinta inter ili farojn, kiajn neniu alia faris, ili ne havus pekon; sed nun ili vidis kaj malamis min kaj ankaŭ mian Patron.

²⁵Sed tio okazas, por ke plenumiĝu la vorto skribita en ilia leĝo: Ili malamis min senkaŭze.

²⁶Sed kiam venos la Parakleto, kiun mi sendos de la Patro al vi, la Spirito de la vero, kiu devenas de la Patro, tiu pri mi atestos;

²⁷kaj vi ankaŭ atestas, ĉar vi estis kun mi de la komenco.