Read La Sankta Biblio 1926 esparanto Johano 7 Bible Online

Johano 7 - La Sankta Biblio 1926 esparanto bible

Johano 7

¹Kaj post tio Jesuo iradis en Galileo; ĉar li ne volis iradi en Judujo, ĉar la Judoj celis mortigi lin.

²La festo de la Judoj, nomata la festo de laŭboj, proksimiĝis.

³Liaj fratoj do diris al li: Transiru de ĉi tie, kaj iru en Judujon, por ke viaj disĉiploj ankaŭ vidu viajn farojn, kiujn vi faras.

⁴Ĉar neniu faras ion sekrete, kaj celas mem esti publike konata. Se vi faras tiajn farojn, montru vin al la mondo.

⁵Ĉar liaj fratoj mem ne kredis al li.

⁶Jesuo do diris al ili: Mia tempo ankoraŭ ne venis; sed via tempo ĉiam estas preta.

⁷La mondo ne povas vin malami; sed min ĝi malamas, ĉar mi atestas pri ĝi, ke ĝiaj faroj estas malbonaj.

⁸Supreniru vi al la festo; mi ankoraŭ ne supreniras al la festo, ĉar mia tempo ankoraŭ ne maturiĝis.

⁹Dirinte tion al ili, li restis ankoraŭ en Galileo.

¹⁰Sed kiam liaj fratoj supreniris al la festo, tiam li ankaŭ supreniris, ne malkaŝe, sed kvazaŭ sekrete.

¹¹La Judoj do serĉis lin ĉe la festo, kaj diris: Kie li estas?

¹²Kaj fariĝis multe da murmurado inter la homamasoj pri li. Unuj diris: Li estas bonulo; aliaj diris: Ne, sed li erarigas la amason.

¹³Tamen neniu parolis malkaŝe pri li, pro timo antaŭ la Judoj.

¹⁴Sed ĉirkaŭ la mezo de la festo, Jesuo supreniris en la templon kaj instruis.

¹⁵Kaj la Judoj miris, dirante: Kiel ĉi tiu scias skribojn, neniam lerninte?

¹⁶Jesuo respondis al ili kaj diris: Mia instruado estas ne mia, sed Ties, kiu min sendis.

¹⁷Se iu volas plenumi Lian volon, tiu scios pri la instruado, ĉu ĝi estas de Dio, aŭ ĉu mi parolas nur el mi mem.

¹⁸Kiu parolas el si mem, tiu celas sian propran gloron; sed kiu celas la gloron de Tiu, kiu lin sendis, tiu estas verema, kaj maljusteco ne estas en li.

¹⁹Ĉu Moseo ne donis al vi la leĝon? kaj neniu el vi observas la leĝon. Kial vi celas mortigi min?

²⁰La homamaso respondis: Vi havas demonon; kiu celas mortigi vin?

²¹Jesuo respondis kaj diris al ili: Mi faris unu faron, kaj vi ĉiuj miras pro tio.

²²Moseo donis al vi cirkumcidon (tamen ĝi estas ne de Moseo, sed de la patroj); kaj vi en la sabato cirkumcidas viron.

²³Se viro estas cirkumcidata en la sabato, por ke oni ne malobeu al la Mosea leĝo, ĉu vi koleras kontraŭ mi pro tio, ke mi tute sanigis viron en sabato?

²⁴Ne juĝu laŭ ŝajno, sed juĝu justan juĝon.

²⁵Tiam kelkaj el la Jerusalemanoj diris: Ĉu li ne estas tiu, kiun oni celas mortigi?

²⁶Kaj jen li parolas maltime, kaj ili diras al li nenion. Ĉu eble la estraro certe scias, ke ĉi tiu estas la Kristo?

²⁷Tamen ni scias, de kie ĉi tiu estas; sed kiam la Kristo venos, neniu scios, de kie li estas.

²⁸Jesuo do, instruante en la templo, ekkriis kaj diris: Vi jam min konas, kaj vi ankaŭ scias, de kie mi estas; kaj mi ne venis de mi mem; sed Tiu, kiu min sendis, estas vera, sed Lin vi ne konas.

²⁹Mi Lin konas, ĉar mi estas de Li; kaj Li min sendis.

³⁰Oni do celis kapti lin; sed neniu metis sur lin sian manon, ĉar lia horo ankoraŭ ne venis.

³¹Kaj multaj el la homamaso kredis al li, kaj diris: Kiam la Kristo venos, ĉu li faros pli multe da signoj, ol ĉi tiu faris?

³²La Fariseoj aŭdis la amason murmuranta tion pri li, kaj la ĉefpastroj kaj la Fariseoj sendis oficistojn, por kapti lin.

³³Jesuo do diris al ili: Ankoraŭ iom da tempo mi estas kun vi, kaj mi foriras al Tiu, kiu min sendis.

³⁴Vi min serĉos kaj ne trovos; kaj kie mi estas, vi ne povas tien veni.

³⁵Tial la Judoj inter si diris: Kien ĉi tiu iros, ke ni lin ne trovos? ĉu li iros al la disĵetitoj inter la Grekoj kaj instruos la Grekojn?

³⁶Kia diro estas tio, kion li diris: Vi min serĉos kaj ne trovos, kaj: Kie mi estas, vi ne povas tien veni?

³⁷En la lasta tago, la granda tago de la festo, Jesuo staris kaj kriis, dirante: Se iu soifas, tiu venu al mi kaj trinku.

³⁸Kiu kredas al mi, kiel la Skribo diris, el ties ventro fluos riveroj da viva akvo.

³⁹Sed tion li diris pri la Spirito, kiun estis ricevontaj tiuj, kiuj kredis al li; ĉar la Spirito ankoraŭ ne estis donita, ĉar Jesuo ankoraŭ ne estis glorita.

⁴⁰Iuj do el la homamaso, aŭdinte tiujn vortojn, diris: Vere ĉi tiu estas la Profeto.

⁴¹Aliaj diris: Ĉi tiu estas la Kristo. Sed kelkaj diris: Tamen ĉu el Galileo la Kristo venas?

⁴²Ĉu la Skribo ne diris, ke la Kristo venas el la idaro de David kaj el la vilaĝo Bet-Leĥem, kie David estis?

⁴³Tiel fariĝis pro li malkonsento inter la homamaso.

⁴⁴Kaj iuj el ili volis kapti lin, sed neniu metis sur lin la manojn.

⁴⁵Tiam la oficistoj revenis al la ĉefpastroj kaj Fariseoj, kaj ĉi tiuj diris al ili: Kial vi lin ne alkondukis?

⁴⁶Respondis la oficistoj: Ankoraŭ neniam tiel parolis homo.

⁴⁷La Fariseoj do respondis al ili: Ĉu vi ankaŭ estas erarigitaj?

⁴⁸Ĉu kredis al li iu el la regantoj, aŭ el la Fariseoj?

⁴⁹Sed tiu homamaso, kiu ne scias la leĝon, estas malbenita.

⁵⁰Tiam Nikodemo (tiu, kiu venis nokte al Jesuo, estante unu el ili) diris al ili:

⁵¹Ĉu nia leĝo juĝas iun, se antaŭe oni ne aŭskultis lin, kaj ne sciiĝis, kion li faras?

⁵²Ili respondis kaj diris al li: Ĉu vi ankaŭ estas el Galileo? Esploru, kaj vidu, ke neniam el Galileo venas profeto.

⁵³Kaj ĉiu iris al sia domo;