Read La Sankta Biblio 1926 esparanto Efesanoj 2 Bible Online

Efesanoj 2 - La Sankta Biblio 1926 esparanto bible

Efesanoj 2

¹Kaj vin li vivigis, kiam vi estis malvivaj per eraroj kaj pekoj,

²en kiuj vi iam iradis laŭ la vojo de ĉi tiu mondo, laŭ la estro de la potenco de la aero, de la spirito, kiu nun energias en la filoj de malobeo;

³inter kiuj ni ĉiuj iam ankaŭ vivis, plenumante la dezirojn de nia karno, farante la volojn de la karno kaj de la menso, kaj ni estis laŭ naturo infanoj de kolerego, kiel ankaŭ la aliaj.

⁴Sed Dio, estante riĉa en kompateco, pro Sia granda amo, per kiu Li amis nin,

⁵eĉ kiam ni estis malvivaj en niaj eraroj, nin vivigis en Kristo (per graco vi saviĝis),

⁶kaj nin levis, kaj nin kunsidigis en la ĉielejoj en Kristo Jesuo;

⁷por montri en la mondaĝoj estontaj la superabundan riĉecon de Sia graco en korfavoro al ni en Kristo Jesuo:

⁸ĉar per graco vi saviĝis per fido; ne per vi mem: ĝi estas dono de Dio;

⁹ne el faroj, por ke neniu fanfaronu.

¹⁰Ĉar ni estas Lia faritaĵo, kreitaj en Kristo Jesuo por bonaj faroj, kiujn antaŭaranĝis Dio, por ke ni iradu en ili.

¹¹Kaj pro tio rememoru, ke iam vi, nacianoj laŭ la karno, nomataj la Necirkumcido ĉe la tiel nomata Cirkumcido, mane farita sur la karno —

¹²ke vi estis tiam sen Kristo, fremdigitaj for de la komunumo de Izrael, kaj eksteruloj de la interligoj de la promeso, esperon ne havantaj kaj sen Dio en la mondo.

¹³Sed nun en Kristo Jesuo vi, iam malproksimaj, proksimiĝis en la sango de Kristo.

¹⁴Ĉar nia paco estas li, kiu unuigis ambaŭ kaj rompis la intermuron de disigo,

¹⁵en sia karno neniiginte la malamon, la leĝon de ordonoj en dekretoj; por krei en si el la du unu novan homon, tiel farante pacon;

¹⁶kaj por kunakordigi ambaŭ en unu korpo al Dio per la kruco, mortiginte per tio la malamon;

¹⁷kaj li venis kaj predikis pacon al vi malproksimaj kaj al la proksimaj;

¹⁸ĉar per li ni ambaŭ havas en unu Spirito alkondukon al la Patro.

¹⁹Sekve vi jam estas ne fremduloj kaj pasloĝantoj, sed samregnanoj kun la sanktuloj, kaj el la domanaro de Dio,

²⁰konstruitaj sur la fundamento de la apostoloj kaj profetoj, kies bazangula ŝtono estas Kristo Jesuo mem;

²¹en kiu ĉiu aparta konstruaĵo, bone kunigita, kreske fariĝas sankta templo en Kristo;

²²en kiu vi ankaŭ estas kunkonstruitaj por sanktejo de Dio en la Spirito.