Read La Sankta Biblio, sen Ĉapelo esparanto Genezo 38 Bible Online

Genezo 38 - La Sankta Biblio, sen Ĉapelo esparanto bible

Genezo 38

¹En tiu tempo Jehuda apartigxis for de siaj fratoj, kaj eklogxis apud iu Adulamano, kiu estis nomata Hxira.

²Kaj Jehuda vidis tie filinon de iu Kanaanido, nomata Sxua, kaj li prenis sxin kaj envenis al sxi.

³Kaj sxi gravedigxis kaj naskis filon; kaj li donis al li la nomon Er.

⁴Kaj sxi denove gravedigxis kaj naskis filon, kaj sxi donis al li la nomon Onan.

⁵Kaj ankoraux plue sxi naskis filon, kaj donis al li la nomon Sxela. Sed Jehuda estis en Kezib, kiam sxi naskis tiun.

⁶Kaj Jehuda prenis edzinon por sia unuenaskito Er, kaj sxia nomo estis Tamar.

⁷Sed Er, la unuenaskito de Jehuda, estis malbona antaux la okuloj de la Eternulo, kaj la Eternulo lin mortigis.

⁸Tiam Jehuda diris al Onan: Envenu al la edzino de via frato, kaj boedzigxu kun sxi kaj naskigu idaron al via frato.

⁹Sed Onan sciis, ke ne por li estos la idaro; tial, envenante al la edzino de sia frato, li elversxadis la semon sur la teron, por ne doni idaron al sia frato.

¹⁰Kaj malplacxis al la Eternulo tio, kion li faris, kaj Li mortigis ankaux lin.

¹¹Tiam Jehuda diris al sia bofilino Tamar: Restu kiel vidvino en la domo de via patro, gxis grandigxos mia filo Sxela. Cxar li timis, ke eble li ankaux mortos, kiel liaj fratoj. Kaj Tamar iris kaj eklogxis en la domo de sia patro.

¹²Pasis multe da tempo, kaj mortis la filino de Sxua, la edzino de Jehuda. Kiam Jehuda konsoligxis, li iris Timnan, al la tondantoj de liaj sxafoj, li kaj lia amiko, Hxira la Adulamano.

¹³Kaj oni sciigis al Tamar, dirante: Jen via bopatro iras Timnan, por tondi siajn sxafojn.

¹⁴Tiam sxi demetis de si siajn vestojn de vidvineco kaj kovris sin per kovrotuko kaj vualis sin, kaj sidigxis apud la pordo de Enaim, kiu trovigxas sur la vojo al Timna. Cxar sxi vidis, ke Sxela grandigxis kaj sxi ne estas donita al li kiel edzino.

¹⁵Kaj Jehuda sxin vidis, kaj li pensis, ke sxi estas publikulino, cxar sxi kovris sian vizagxon.

¹⁶Kaj li turnis sin al sxi cxe la vojo, kaj diris: Lasu min enveni al vi. Cxar li ne sciis, ke tio estas lia bofilino. Kaj sxi diris: Kion vi donos al mi, se vi envenos al mi?

¹⁷Kaj li diris: Mi sendos al vi kapron el la brutaro. Sed sxi diris: Donu al mi garantiajxon, gxis vi sendos.

¹⁸Kaj li diris: Kian garantiajxon mi donu al vi? Sxi diris: Vian sigelilon kaj vian sxnureton, kaj vian bastonon, kiu estas en via mano. Kaj li donis al sxi kaj envenis al sxi, kaj sxi gravedigxis de li.

¹⁹Kaj sxi levigxis kaj iris, kaj formetis de si sian kovrotukon kaj surmetis sur sin siajn vestojn de vidvineco.

²⁰Kaj Jehuda sendis la kapron per sia amiko la Adulamano, por preni la garantiajxon el la manoj de la virino; sed li sxin ne trovis.

²¹Kaj li demandis la homojn de sxia loko, dirante: Kie estas la publikulino, kiu sidis en Enaim cxe la vojo? Kaj ili diris: Cxi tie ne estis publikulino.

²²Kaj li revenis al Jehuda, kaj diris: Mi sxin ne trovis, kaj ankaux la homoj de la loko diris, ke tie ne estis publikulino.

²³Tiam Jehuda diris: Sxi prenu gxin al si, por ke ni ne estu mokataj; mi sendis ja cxi tiun kapron, sed vi sxin ne trovis.

²⁴Post la paso de tri monatoj oni sciigis al Jehuda, dirante: Tamar, via bofilino, malcxastigxis, kaj sxi ecx gravedigxis de malcxasteco. Tiam Jehuda diris: Elkonduku sxin, kaj oni sxin brulmortigu.

²⁵Kiam oni sxin kondukis, sxi sendis, ke oni diru al sxia bopatro: Mi gravedigxis de la viro, al kiu apartenas cxi tio. Kaj sxi diris: Rekonu, al kiu apartenas la sigelilo kaj la sxnuretoj kaj cxi tiu bastono.

²⁶Kaj Jehuda rekonis, kaj li diris: Sxi estas pli prava ol mi, cxar mi ne donis sxin al mia filo Sxela. Kaj li sxin ne plue konis.

²⁷Kiam sxi devis naski, montrigxis, ke gxemeloj estas en sxia ventro.

²⁸Kaj kiam sxi estis naskanta, elsxovigxis la mano de unu infano; kaj la akusxistino prenis kaj alligis al la mano rugxan fadenon, dirante: Cxi tiu eliris la unua.

²⁹Sed kiam li retiris sian manon, eliris lia frato. Kaj sxi diris: Kial vi faris por vi trasxiron? Kaj oni donis al li la nomon Perec.

³⁰Poste eliris lia frato, kiu havis sur sia mano la rugxan fadenon. Kaj oni donis al li la nomon Zerahx.