Read La Sankta Biblio, sen Ĉapelo esparanto Sentencoj 22 Bible Online

Sentencoj 22 - La Sankta Biblio, sen Ĉapelo esparanto bible

Sentencoj 22

¹Nomo bona estas pli preferinda, ol granda ricxeco; Kaj bona estimo, ol argxento kaj oro.

²Ricxulo kaj malricxulo renkontigxas: Ilin ambaux kreis la Eternulo.

³Prudentulo antauxvidas malbonon, kaj kasxigxas; Sed naivuloj antauxenpasxas, kaj difektigxas.

⁴Por humileco kaj timo antaux la Eternulo Oni ricevas ricxecon kaj honoron kaj vivon.

⁵Dornoj kaj retoj estas sur la vojo de malbonagulo; Kiu gardas sian animon, tiu malproksimigxas de ili.

⁶Instruu knabon konforme al lia vojo, Kaj ecx maljunigxinte li ne deklinigxos de gxi.

⁷Ricxulo regas super malricxuloj, Kaj kiu prunteprenas, tiu estas sklavo de la pruntedoninto.

⁸Kiu semas maljustajxon, tiu rikoltos suferon, Kaj la kano de lia krueleco rompigxos.

⁹Bonokululo estos benata; Cxar li donas el sia pano al malricxulo.

¹⁰Forpelu blasfemulon, kaj foriros malpaco, Kaj cxesigxos malkonsento kaj ofendo.

¹¹Kiu amas purecon de koro kaj agrable parolas, Al tiu la regxo estas amiko.

¹²La okuloj de la Eternulo gardas la prudenton; Sed la vortojn de maliculo Li renversas.

¹³Mallaborulo diras: Leono estas ekstere, Mi povus esti mortigita meze de la strato.

¹⁴La busxo de malcxastulino estas profunda foso; Kiun la Eternulo koleras, tiu tien enfalas.

¹⁵Malsagxeco forte sidas en la koro de knabo; Sed vergo punanta gxin elpelas el gxi.

¹⁶Kiu premas malricxulon, por pligrandigi sian ricxecon, Tiu donas al ricxulo, por ke li malricxigxu.

¹⁷Klinu vian orelon kaj auxskultu vortojn de sagxuloj, Kaj direktu vian koron al mia instruo;

¹⁸Cxar ili estos agrablaj, se vi gardos ilin en via interno; Ili estos cxiuj pretaj sur viaj lipoj.

¹⁹Ke al la Eternulo estu via fido, Tion mi instruis al vi hodiaux.

²⁰Cxu mi ne skribis al vi tion trifoje Kun konsiloj kaj scio,

²¹Por sciigi al vi la gxustecon de la paroloj de vero, Por ke vi transdonu la parolojn de vero al tiuj, kiuj vin sendis?

²²Ne prirabu malricxulon, pro tio, ke li estas malricxa; Kaj ne premu senhavulon cxe la pordego;

²³Cxar la Eternulo defendos ilian aferon Kaj dispremos iliajn premantojn.

²⁴Ne amikigxu kun homo kolerema, Kaj ne komunikigxu kun homo flamigxema;

²⁵Ke vi ne lernu lian vojon Kaj ne ricevu reton por via animo.

²⁶Ne estu inter tiuj, kiuj firmigas per mano, Kiuj garantias por sxuldoj.

²⁷Se vi ne havos per kio pagi, Oni ja prenos vian litajxon de sub vi.

²⁸Ne forsxovu la antikvajn limojn, Kiujn faris viaj patroj.

²⁹Se vi vidas homon lertan en sia profesio, li staros antaux regxoj; Li ne staros antaux maleminentuloj.