Read La Sankta Biblio, sen Ĉapelo esparanto Nombroj 12 Bible Online

Nombroj 12 - La Sankta Biblio, sen Ĉapelo esparanto bible

Nombroj 12

¹Kaj ekparolis Mirjam kaj Aaron kontraux Moseo pro la edzino Etiopino, kiun li prenis; cxar li prenis al si edzinon Etiopinon.

²Kaj ili diris: Cxu nur kun Moseo parolis la Eternulo? Li parolis ja ankaux kun ni. Kaj la Eternulo tion auxdis.

³Sed Moseo estis homo tre modesta, pli ol cxiuj homoj sur la tero.

⁴Kaj subite diris la Eternulo al Moseo kaj al Aaron kaj al Mirjam: Eliru vi tri al la tabernaklo de kunveno. Kaj ili eliris cxiuj tri.

⁵Kaj la Eternulo mallevigxis en nuba kolono kaj starigxis cxe la pordo de la tabernaklo, kaj Li vokis Aaronon kaj Mirjamon, kaj ili ambaux eliris.

⁶Kaj Li diris: Auxskultu Miajn vortojn: se iu el vi estas profeto de la Eternulo, Mi aperas al li en vizio, Mi parolas kun li en songxo;

⁷sed ne tiel estas kun Mia sklavo Moseo: en Mia tuta domo li estas konfidato.

⁸Busxon kontraux busxo Mi parolas kun li, kaj malkasxe, ne per enigmoj; kaj la bildon de la Eternulo li vidas. Kial vi ne timis paroli kontraux Mia sklavo Moseo?

⁹Kaj ekflamis la kolero de la Eternulo kontraux ili, kaj Li foriris.

¹⁰Kaj la nubo forturnigxis de super la tabernaklo, kaj jen Mirjam kovrigxis per lepro, kiel per negxo. Kaj Aaron turnigxis al Mirjam, kaj li ekvidis, ke sxi estas lepra.

¹¹Kaj Aaron diris al Moseo: Mi petas, mia sinjoro, ne kalkulu al ni kiel pekon, ke ni agis malsagxe kaj ke ni pekis;

¹²ho, sxi ne estu kiel malvivulo, cxe kiu tuj post la eliro el la ventro de sia patrino forkonsumigxis jam duono de la korpo.

¹³Kaj Moseo ekkriis al la Eternulo, dirante: Mi petas Vin, ho Dio, sanigu sxin.

¹⁴Kaj la Eternulo diris al Moseo: Se sxia patro estus kracxinta sur sxian vizagxon, cxu sxi tiam ne hontus sep tagojn? sxi estu do ensxlosita dum sep tagoj ekster la tendaro, kaj poste sxi revenu.

¹⁵Kaj Mirjam estis ensxlosita ekster la tendaro dum sep tagoj; kaj la popolo ne elmovigxis, gxis Mirjam revenis.

¹⁶Poste la popolo ekvojiris de Hxacerot kaj haltis tendare en la dezerto Paran.