Read lambya MATAYI 1 Bible Online

MATAYI 1 - lambya bible

MATAYI 1

¹Ulu lo ulubatiko ulwa banyenya aba Yesu Kilisitu, uwaluko ulwa Devedi, yuyo akaba waluko ulwa Abulahamu.

²Ukwandila pakabalilo aka Abulahamu mupaka pakabalilo aka Mwene u Devedi, ulu lo ulubatiko ulwa banyenya: U Abulahamu akapapa u Yisaki. U Yisaki akapapa u Yakobo. U Yakobo akapapa u Yuda na bawamwabo. U Yuda akapapa u Pelezi nu Zela (unyina akaba we Tamala). U Pelezi akapapa u Heziloni, sona u Heziloni akapapa u Lamu. U Lamu akapapa u Aminadabu, wepe u Aminadabu akapapa u Nashoni. U Nashoni akapapa u Salimoni, sona u Salimoni akapapa u Bowazi (unyina akaba we Lahabu). U Bowazi akapapa u Obedi (unyina akaba we Luti). U Obedi akapapa u Yese, wepe u Yese akapapa u Mwene u Devedi.

⁶Ukwandila pakabalilo aka Devedi mupaka pakabalilo kako aba Izilayeli bakasendiwa pakubuka mu Babeloni pakuba bakayidi, ulu lo ulubatiko ulwa banyenya: Devedi akapapa u Solomoni (unyina akaba muchi uwa Yuliya). U Solomoni akapapa u Lehobowamu, sona u Lehobowamu akapapa u Abiya, wepe u Abiya akapapa u Asa. U Asa akapapa u Yehosafati, sona u Yehosafati akapapa u Yolamu, wepe u Yolamu akapapa u Uziya. U Uziya akapapa u Yotamu, sona u Yotamu akapapa u Ahazi, wepe u Ahazi akapapa u Hezekiya. U Hezekiya akapapa u Manase, sona u Manase akapapa u Amoni, wepe u Amoni akapapa u Yosiya. U Yosiya akapapa u Yekoniya na bawamwabo.

¹²Ukwandila pakabalilo akakwepela mu Babeloni mupaka pakabalilo akakupapiwa ukwa Yesu, ulu lo ulubatiko ulwa banyenya: U Yekoniya akapapa u Shelatiyele; u Shelatiyele akapapa u Zelubabelo; u Zelubabelo akapapa u Abihudi; u Abihudi akapapa u Eliyakimu; u Eliyakimu akapapa u Azolo; u Azolo akapapa u Zadoki; Zadoki akapapa u Akimu; u Akimu akapapa u Eliyudi; u Eliyudi akapapa u Eleyazala; u Eleyazala akapapa u Matani; u Matani akapapa u Yakobo; u Yakobo akapapa u Jozefu; u Jozefu umulume uwa Maliya, u Maliya we yuyo akaba nyina uwa Yesu, yuyo akitiziwanga ukuti we Kilisitu.

¹⁷Pakaba inkulilo izya bantu 14 ukwandila pakabalilo aka Abulahamu mupaka pakabalilo aka Devedi, sona pakabapo luko ulwa bantu 14 ukufika pakabalilo akakubukila mu Babeloni pakuba bakayidi, pakaba sona inkulilo izya bantu 14 mupaka pakabalilo akakupapiwa ukwa Kilisitu.

¹⁸Ukupapiwa ukwa Yesu Kilisitu kukaba ulu. Unyina u Maliya akazingiliwa nu Jozefu, loli bo batakomanitepo u Maliya akagha ukuti akwiza pakuba nu mwana ukwendela mu Muzimu Umuzelu.

¹⁹U Jozefu akaba muntu mugholosu, sona atakalondagha pakumukozya isoni u Maliya pabuzelu, po akinong'onagha pakusenda ivikole vyache ukusita ukuti abantu bazimanye.

²⁰Bo akwinong'ona zinizi, uwantumi uwa Mwene akamwizila muchilota nukuti, “Wee Jozefu, uwaluko ulwa Devedi, utakanyilaye pakumusenda u Maliya pakuba muchi wako, pakuti ulwanda lulo ali nalo lwa Muzimu Umuzelu.

²¹Akwiza pakupapa umwana umulumendo nukumwita ukuti we Yesu, pakuti we yuyo akwiza pakupoka abantu ku mbibi zyabo.”

²²Zyosi zinizi zikabombiwa pakukwanilisya zizyo u Mwene akanenela mu mulaghuzi ukuti,

²³“Umulindu yuyo atamumenye nalumo umwanavuli akwiza pakumela ulwanda nukupapa umwana umulumendo nukumwita ukuti we Imaniweli.” (Itabwa ili likung'anamula ukuti u Chala ali naswe).

²⁴Bo u Jozefu alamusya mutulo, akabomba vivyo uwantumi uwa Mwene akamubuzya, po akamusenda u Maliya pakuba muchi wache.

²⁵Loli atakakomanapo nawe nalumo-lumo mupaka papo akapapila umwana umulumendo. Po u Jozefu akamwita ukuti we Yesu.