Read lambya MATAYI 2 Bible Online

MATAYI 2 - lambya bible

MATAYI 2

¹U Yesu akapapiwa mukaya aka Betelehemu muchigaba icha Yudeya, pakabalilo aka Mwene u Helodi. Bo pachilapo akabalilo panandi, kukiza abamanya ntondwa aba kubufumilo ubwa izuba ubwa kaya akakulu nkani aka Yelusalemu.

²Bakalaluzya bakati, “Ali ko kwiyi umwana yuyo apapiwa pakuba we mwene uwa ba Yuda? Tukennya ulutondwa lwache kubufumilo ubwa izuba. Po twiza pakumuchindika.”

³Bo u Mwene u Helodi, poka na bantu bosi aba mu Yelusalemu bivwa zinizi, bakavulala mumoyo.

⁴U Helodi akabitizya abaputi abasongo na bamanyisi aba Ndaghilo izya Mozesi nukubalaluzya ukuti, “Nkimba ko kwiyi kuko u Kilisitu akwiza pakupapiwa?”

⁵Bakamula bakati, “Mukaya aka Betelehemu muchigaba icha Yudeya. Pakuti ivi vyo vivyo umulaghuzi akasimba ukuti,

⁶‘Betelehemu, muchigaba icha Yudeya ute we munandi uwabumalilo mutwaya tosi utwa mu Yudeya. Mumwako mukwiza pakufuma umulongozi, yuyo akwiza pakubalongozya abantu bane aba Izilayeli.’ ”

⁷U Helodi akabitizizya kubusyefu abayeni aba kubufumilo ubwa izuba ukuti amanye akabalilo akenecho kako ulutondwa lukaboneka.

⁸Akabatuma ku Betelehemu na mazyu aghakuti, “Bukagha mumulondelezye nkani umwana yunuyu, nanti mwamwagha mwize mumbuzye ukuti nane imbuke pakumuchindika.”

⁹Bo bivwa kwa mwene bakabuka, po ulutondwa lulo bakalwennya kubufumilo ubwa izuba lukalongolela nukwima pamwanya pabuyo bubo umwana akabapo.

¹⁰Bo balwennya ulutondwa lula, bakahoboka nkani.

¹¹Bakinjila munyumba nukwennya umwana poka nu nyina u Maliya, bakafughama nukumuchindika. Bakafumya ivyabupi vyabo ivya golide, ni vyakununkila ivya lubani, sona na mafuta agha mila nukumupa umwana.

¹²Po bakanyokela kuchisu chabo pakwendela izila iyinji, pakuti u Chala akabasoka muchilota ukuti batakanyokele kwa Helodi.

¹³Bo babuka, uwantumi uwa Mwene akamubonekela u Jozefu muchilota nukumubuzya ukuti, “U Helodi akwiza pakulonda ukuti amughoghe umwana. Nyamuka musende umwana nu nyina nukuchimbilila kuchisu icha Ijiputi. Wikale kunuko mupaka inkubuzye ukuti wepeko.”

¹⁴Po u Jozefu akanyamuka pabusiku, akasenda umwana nu nyina nukubuka nabo kuchisu icha Ijiputi,

¹⁵kuko akikala mupaka u Helodi akafwa. Izi zikabombiwa pakukwanilisya zizyo u Mwene akanenela mu mulaghuzi ukuti, “Inkamwitizya umwana wane ukuti epemo mu Ijiputi.”

¹⁶Bo u Helodi azyaghannya ukuti abayeni aba kubufumilo ubwa izuba bala bamuzimbula, akakalala nkani. Akalamula ukuti utwana tosi utulumendo mu Betelehemu na mutwaya utupalamani tosi, tuto tukaba na maka mabili nukwika pasi tughoghiwe. U Helodi akabomba zinizi ukuyana na mumo akamanyilila ku bayeni aba kubufumilo ubwa izuba nizya kabalilo kako ulutondwa lula lukaboneka.

¹⁷Zizyo umulaghuzi u Yelemiya akalaghula zikakwanilisiwa ukuti,

¹⁸“Inkuto yikivwika mukaya aka Lama, inkuto iya bubavu nu kufwifwitila ukukulu. U Lakelo akulilila abana bache akukana pakumupumizya pakuti bafuye.”

¹⁹Bo u Helodi afwa bulo, uwantumi uwa Mwene akamubonekela u Jozefu muchilota mu Ijiputi.

²⁰Akati, “Nyamuka, senda umwana nu nyina nyokela kuchisu icha Izilayeli, pakuti babo bakalondagha pakumughogha umwana bafuye.”

²¹Po u Jozefu akanyamuka, akasenda umwana nu nyina nukunyokela ku Izilayeli.

²²Loli bo u Jozefu ivwa ukuti u Alikelabu amupyanite uwise u Mwene u Helodi muchigaba icha Yudeya, akanyila pakubukako. Akasokiwa muchilota, po akabuka muchigaba icha Galileya

²³nukwikala mukaya aka Nazaleti. Po zizyo abalaghuzi bakalaghula zikakwanilisiwa ukuti, “Uyu akwiza pakwitiziwa umu Nazalini.”