Read lambya MATAYI 27 Bible Online

MATAYI 27 - lambya bible

MATAYI 27

¹Pandabi-ndabi nkani abaputi abasongo bosi na balongozi aba Chiyuda bakivwana ukuti bamughoghe u Yesu.

²Bakamupinya ni mpingu nukubuka nawe nukumubika munyobe izya Pilati, umulaghili uwa Chiloma.

³Bo u Yudasi yuyo akamubika u Yesu munyobe zyabo amanya ukuti kwadumuliwa ukuti u Yesu aghoghiwe, akiyaghannya ukuti ananga. Po akabanyosezya abaputi abasongo na balongozi aba Chiyuda isalabazya 30 zila.

⁴Akati, “Nananga pakumubika munyobe izya balwani umuntu umusita nongwa ukuti aghoghiwe.” Bakamula bakati, “Nkimba tuli nazyo ni mbombo?” Zyako zinizyo.

⁵U Yudasi akasumba indalama zila pasi mu Nyumba iya Chala nukubuka. Po akabuka nukwipinyilila mwene.

⁶Abaputi abasongo bakaseba indalama zila nukuti, “Izi ndalama izya libanda, po chitakwitikiziwa ni Ndaghilo zyitu ukuzibika munyambi iyakusungilamo indalama izya mu Nyumba iya Chala.”

⁷Bo bivwana ichakubombela ni ndalama zila, bakaghula umughunda uwa mumatasonta ukuti bubanje buyo ubwa mapumpa agha bayeni.

⁸Ichi cho chifukwa mupaka ilelo umughunda ghula ghukwitiziwa ukuti, “Umughunda uwibanda.”

⁹Po zizyo umulaghuzi u Yelemiya akalaghula zikakwanilisiwa ukuti, “Bakasenda indalama 30 zila, zizyo aba Izilayeli bakivwana pakumughulila nazyo,

¹⁰nukughulila umughunda uwa mumatasonta ukuyana na mumo u Mwene akandamulila.”

¹¹U Yesu akimilila pamaso pa mulaghili uwa Chiloma yuyo akamulaluzya akati, “Nkimba awe we Mwene uwa ba Yuda?” U Yesu akamula akati, “Wanena wemwene.”

¹²Loli atakanenapo nachimo pavivyo abaputi abasongo na balongozi aba Chiyuda bakamutamantila.

¹³Po u Pilati akamulaluzya akati, “Nkimba utakwivwa ivintu vyosi vivyo bakukunenela?”

¹⁴Loli u Yesu akasona umulomo wache, chicho chikamuswighizya nkani umulaghili yula.

¹⁵Pakabalilo kosi aka Lusekelo ulwa Pasa umulaghili uwa Chiloma akizubila pakumusatula umukayidi weka, yuyo abantu bamusala ukuti asatuliwe.

¹⁶Pakabalilo kala-kala pakaba umukayidi yumo umumanyikwe yuyo akaba we Balabasi.

¹⁷Po bo ichilundilo icha bantu chabungana, u Pilati akabalaluzya akati, “We wenu yuyo mukumulonda ukuti imbabulile? U Balabasi pamo u Yesu yuyo we Kilisitu?”

¹⁸U Pilati akazimanya akiza nkani ukuti abalaghili aba Chiyuda bamubikite u Yesu munyobe zyache pachifukwa icha kabini bulo.

¹⁹Bo u Pilati ikaye munyumba iya bulongi, umuchi akatuma amazyu ukuti, “Utakabombaye nachimo nu muntu umusita nongwa pakuti nayimba nkani nu busiku muchilota nizya muntu uyu.”

²⁰Abaputi abasongo na balongozi aba Chiyuda bakasonjelezya nkani abantu pakumulaba u Pilati ukuti amusatule u Balabasi nukumughogha u Yesu.

²¹Loli u Pilati akalaluzya ichilundilo icha bantu akati, “Nkimba we wenu pa bantu babili aba, yuyo mukumulonda ukuti imbabulile?” Bakamula bakati, “U Balabasi.”

²²Po u Pilati akalaluzya akati, “Nkimba imbombe nawe ichoni u Yesu yuyo mukuti we Kilisitu?” Bosi bakamula bakati, “Umukomele pachipinjika!”

²³Loli u Pilati akalaluzya akati, “Nkimba ananga ichoni?” Loli abantu bala bakakolomoka nkani ukuti, “Umukomele pachipinjika.”

²⁴Bo u Pilati ennya ukuti atakusendapo chimo, sona ukuti abantu bakaba papipi ukwanda ivyongo, akasenda amizi nukubasukusulila munyobe pamaso pa chilundilo nukuti, “Inte ni nongwa pibanda ilya umuntu umwiza uyu. Zyinyu zinizyo.”

²⁵Ichilundilo chosi icha bantu chikamula chikati, “Lileke ibanda ilya umuntu uyu libanje papitu na bana bitu.”

²⁶Po u Pilati akabasatulila u Balabasi nukulamula ukuti u Yesu asyempiwe. Pisinda pache akamubika ukuti akomeliwe pachipinjika.

²⁷Po abasikali aba Pilati bakinjila nu Yesu munyumba iya mulaghili uwa Chiloma. Mula-mula akabukatila kosi aka basikali abankondo kakamubunganila.

²⁸Bakamuvula amenda ghache nukumuvwika inkazo inchesamu.

²⁹Po bakaluka impumpu iya mivwa nukumuvwika kumutu nukumulemeka indisa munyobe indilo. Po bakafughama pantazi papache nukumobezya ukuti, “Mwaghona, we Mwene uwa ba Yuda!”

³⁰Bakamufwinila amati nukumufyula indisa yila nukumukoma nayo pamutu.

³¹Bo baleka pakumobezya, bakamuvula inkazo nukumuvwika sona amenda ghache. Po bakabuka nawe pakumukomela pachipinjika.

³²Bo bakwepamo mukaya akakulu nkani kala, bakakomana nu muntu yumo uwa mu Kileni, yuyo akaba we Simoni. Po abasikali abankondo bakamufyenga ukuti anyamule ichipinjika icha Yesu.

³³Bakafika pabuyo bubo bukwitiziwa ukuti we Gologota, chicho chikung'anamula ukuti, “Ubuyo bubo buyanite bulo ni fupa ilya kumutu.”

³⁴Kula-kula bakamupa u Yesu uvinyo uwakongannya na kanyongo ukuti ang'wele, loli bo aghonja, atakang'wela.

³⁵Bakamukomela pachipinjika nukugabana amenda ghache pakupanga amayele.

³⁶Bo babomba zinizi, bakikala pasi pala-pala nukumulindilila.

³⁷Pamwanya pamutu wache pakasimbiwapo ichimanyilo icha nongwa yiyo bakamughoghela ukuti, “Uyu we Yesu u Mwene uwa ba Yuda.”

³⁸Po bakamukomela pachipinjika poka na mavyondongo mabili, lyoka kunyobe indilo, sona ilinji kunyobe iyamongo.

³⁹Abantu babo bakadumusannyanga pala-pala bakapukuzya imitu yabo nukumusamula u Yesu ukuti,

⁴⁰“Ute wewe ukatinji, ‘Inkwiza pakumongolannya Inyumba iya Chala nukuyizenga sona mumasiku matatu!’ Nanti we Mwana uwa Chala, ipoka wemwene! Ika pachipinjika!”

⁴¹Abaputi abasongo na bamanyisi aba Ndaghilo na balongozi aba Chiyuda bope bakamobezya bakati,

⁴²“Akabapokagha abantu abanji, loli atangipoka mwene! Ate we Mwene uwa ba Izilayeli? Pene papo nanti ika pachipinjika, tukwiza pakumusubila.

⁴³Akumusubila u Chala nukwiyitizya mwene ukuti Mwana uwa Chala. Po leka twennye nanti u Chala akulonda pakumupoka ilelo.”

⁴⁴Amavyondongo ghagho ghakakomeliwa poka nawe ghope ghakamobezya bunubu.

⁴⁵Pakasi pamusanya ichisi chikawa muchisu chosi mupaka fili koloko pachamabwila.

⁴⁶Pachamabwila pakabalilo aka fili koloko, u Yesu akalila nizyu ilya pamwanya nukuti, “Eloyi, Eloyi lama sabakatani?” Ichi chikung'anamula ukuti, “Wee Chala wane, wee Chala wane, nkimba choni chicho wandeka?”

⁴⁷Abantu bamo babo bakimilila pala-pala bakamwivwa nukuti, “Akumwitizya u Eliya!”

⁴⁸Umuntu weka akachimbila nukusenda ichisilo. Akachidwibika muvinyo uwakusapa, akachisomeka kulutete nukumupa ukuti ang'wele.

⁴⁹Loli abantu bamo bakati, “Leka twennye nanti u Eliya angiza pakumupoka!”

⁵⁰U Yesu akalila nizyu ilya pamwanya nukufuta akabumalilo.

⁵¹Panapo na panapo umwenda uwakuzighila mu Nyumba iya Chala ghukazepuka pakasi ukwandila pamwanya mupaka muntende. Kukaba akasenyenta pachisu ichapasi, sona amabwe ghakalepunkana.

⁵²Amapumpa ghakighuka, po abantu abinji aba Chala babo bakafwa bakazyuka.

⁵³Bakafuma mumapumpa, po bo u Yesu azyuka, bakabuka Mukaya Akakulu nkani Akazelu, kuko abantu abinji bakabennya.

⁵⁴Bo usongo uwa basikali poka na basikali babo bakamulindililagha u Yesu, bennya akasenyenta na vyosi vivyo vikabombiwa, bakanyila nkani nukuti, “Naloli uyu akaba Mwana uwa Chala!”

⁵⁵ Pakabapo abakolo abinji, bakennyanga pabutalipo, babo bakamukonka u Yesu ukufuma muchigaba icha Galileya nukumwavwa.

⁵⁶Pakasi papabo pakabapo u Maliya Magadalena, u Maliya unyina uwa Yakobo nu Jozefu poka nu muchi uwa Zebediya.

⁵⁷Pachamabwila, kukiza u Jozefu uwa mukaya aka Alimatiya, umuntu umukabi, yuyo akaba mumanyili uwa Yesu.

⁵⁸Akabuka kwa Pilati nukulaba umuvimba uwa Yesu. U Pilati akalamula ukuti bamupe u Jozefu umuvimba ghula.

⁵⁹Po u Jozefu akaghusenda nukughunnyembetelela ni sanda.

⁶⁰Akaghubika mwipumpa lyache, lilyo likakumbiwa bulo kwibwe. Pisinda pache akabunguluzya ibwe ikulu nukwighalila pamulyango wipumpa nukubuka.

⁶¹U Maliya Magadalena nu Maliya uyunji bakikalagha pala-pala, pakwennya kwipumpa.

⁶²Ilyandabi, lilyo likaba Lisiku Ilyakutuzya, abaputi abasongo na ba Falisayi bakakomana nu Pilati.

⁶³Bakanena bakati, “Mwene, tukukumbuka ukuti bo umumyasi yula achili mumi akati, ‘Inkwiza pakuzyuka kubufwe, bo ghachilapo amasiku matatu.’

⁶⁴Lamula ukuti ipumpa lyache balilindilile akiza mupaka amasiku matatu, umwakuti abamanyili bache batakabuke nukwiba umuvimba wache nukubabuzya abantu ukuti, ‘Azyukite kubufwe.’ Ubumyasi ubwabumalilo ubu bukwiza pakuba bubibi nkani ukuchila ubwakwanda bula.”

⁶⁵U Pilati akababuzya akati, “Senda abasikali. Kalindililaye ipumpa ukuyana na mumo mumanyiye.”

⁶⁶Po bakabuka nukwighalila ipumpa pakumata mulubazu mwibwe nukubikapo abalindilili.