Read lambya MALIKO 13 Bible Online

MALIKO 13 - lambya bible

MALIKO 13

¹Bo u Yesu akwepamo mu Nyumba iya Chala, yumo uwa bamanyili bache akati, “Mumanyisi! Ennya, ubwiza ubwa mabwe ni nyumba izi!”

²U Yesu akamula akati, “Nkimba ukwennya inyumba inkulu izi? Nalimo-limo ibwe lilyo likwiza pakusyala pamwanya pa lyamwabo; lyosi likwiza pakugumuliwa.”

³U Yesu akikalagha pighamba ilya Misyunguti, umwakwenannya ni Nyumba iya Chala, bo u Pitala nu Yakobo nu Yohani sona nu Andeleya biza kukwache nukumulaluzya bo biyekeye bakati,

⁴“Tubuzye, ivintu vinivi vikwiza pakuboneka liyi? Nkimba choni chicho chikwiza pakuboneka ukulanjizya ukuti akabalilo kali papipi ukuti vinivi vibombiwe.”

⁵U Yesu akanda pakubabuzya ukuti, “Mubanje maso, ukuti patakabepo nayumo umuntu uwakubazimbula.

⁶Pakuti abantu abinji bakwiza pakubombezya itabwa lyane nukuti, ‘Ane ne Kilisitu,’ sona bakwiza pakubazimbula abantu abinji.

⁷Bo mukwivwa nizya nkondo papipi pamo imbili iya nkondo, mutakapasyanje. Ivintu vinivi vibaghiye vibombiwe, loli kute kokuti ubumalilo bwafika.

⁸Ichisu chikwiza pakulwana ni chinji; ubumwene bukwiza pakulwana nu bunji. Kukwiza pakuba utusenyenta posi na posi, sona kukwiza pakuba zala. Ivintu vyosi vinivi bo bwandilo bulo ubwa ntamyo.

⁹“Mubanje maso. Abantu bakwiza pakubalema nukubabika pamaso pa balongi, po bakwiza pakubasyempa munyumba izyakwiputilamo. Pachifukwa icha nene bakwiza pakubasitaka pamaso pa balaghili na pa bamwene ukuti mubikile ubwakaboni nizya ane.

¹⁰Loli bo ubumalilo butafikite, Amazyu Amiza ghalumbililiwanje pakasi pa bantu aba inko zyosi.

¹¹Bo mwalemiwa nukulongiwa, mutakapasyanje ukuti, ‘Nkimba tukwiza pakunena ichoni?’ Bo akabalilo kakwana nena bulo zizyo zipeghiwe kukwinyu, pakuti mute mwemwe mukwiza pakanenagha, loli u Muzimu Umuzelu.

¹²Abantu bakwiza pakubabika abawamwabo ukuti baghoghiwe, sona na bawise bope bakwiza pakubabombela bunubu abana babo. Abana bakwiza pakubasambukila abapapi babo ukuti baghoghiwe.

¹³Abantu bosi bakwiza pakubabenga pachifukwa icha nene. Loli umuntu wesi yuyo ajimba umoyo mupaka pabumalilo akwiza pakupona.”

¹⁴“Mukwiza pakwennya Ichinyazu Ichipala-pala, chicho chikunangannya chimiliye pabuyo bubo chitabaghiye.” (Umuntu yuyo akubelenga, ivwisye.) Po babo bali mu Yudeya bachimbililaye mumaghamba.

¹⁵Umuntu yuyo ali pachisonje icha nyumba yache atakikaye nukwinjila munyumba ukuti asende chimo.

¹⁶Umuntu yuyo ali mumughunda atakanyokelaye kunyumba pakusenda inkazo yache.

¹⁷Kukwiza pakuba bupala-pala nkani mumasiku ghanagho na bakolo babo bali ni nyanda, sona na ku bamayi babo bakonkezya abana!

¹⁸Mwiputaye kwa Chala ukuti ivintu vinivi vitakaboneke pachisiku!

¹⁹Pakuti intamyo izya masiku ghala zikwiza pakuba mpala-pala nkani ukuchila zyosi zizyo ichisu ichapasi chikomanitepo nazyo ukwandila ko kubwandilo, bo u Chala apela ichisu ichapasi mupaka ilelo. Po zite zikaboneke nalumo.

²⁰Loli u Mwene akisyako ubwinji ubwa masiku ghala; nanti atakisyanga, nayumo umuntu yuyo angapona. U Mwene isizyeko amasiku ghala pachifukwa icha bantu bache abasaliwa.

²¹“Po nanti yumo akubabuzya ukuti, ‘Ennya, u Kilisitu ali pano,’ pamo, ‘Ali pala!’ mutakazisubile zizyo akunena.

²²Pakuti abantu abinji abamyasi bakwiza pakuboneka nukuti, ‘Nene Kilisitu,’ pamo, ‘Nene mulaghuzi.’ Bakwiza pakupela ivyika ni viswigho ukuti nanti chingabombiwa babazimbule na basaliwa aba Chala bulo.

²³Mubanje maso! Imbabuzizye vyosi bo akabalilo katakwanite.”

²⁴Mumasiku ghala-ghala, bo intamyo zyamala, izuba likwiza pakuba muchisi, umwezi ghute ghukalame nalumo,

²⁵intondwa zikwiza pakuwa kumwanya, sona ivintu ivya maka kumwanya vikwiza pakuyingana.

²⁶Po abantu bakwiza pakumwennya u Mwana uwa Muntu, akwiza mumabingu na maka nu buchindamu.

²⁷Akwiza pakubatuma abantumi bache kunkuto zyosi folo izya chisu ichapasi nukubungannya abantu bache abasaliwa ukwandila ko kubumalilo ubwa chisu ichapasi mupaka kubumalilo ubunji.

²⁸“Mumanyilepo pachikuyu. Nanti mwennya bulo isamba zyache zyanda pakulemba, mukumanya ukuti ichisiku chili papipi.

²⁹Umwakuyana bulo, nanti mukwennya ivintu vinivi vikuboneka, manya bulo ukuti u Mwana uwa Muntu ali papipi, pamulyango.[21]

³⁰Naloli inkubabuzya ukuti ivintu vyosi vikwiza pakuboneka bo abantu abankulilo iyi batafuye bosi.

³¹Kumwanya ni chisu ichapasi ichi vikwiza pakumala, loli amazyu ghane ghakwiza pakuba na maka bwila na bwila.”

³²“Loli nayumo umuntu yuyo akumanya isiku pamo akabalilo, bate bantumi kumwanya, ate Mwana; Utata mwene we yuyo akumanya.

³³Muchebaye, sona mubanje maso pakuti mutakumanya akizile aka kabalilo.

³⁴Chiyanite bulo nu muntu yuyo akuchula nukuvileka vyosi munyobe izya bambombo bache. Akamupa umuntu wesi imbombo iyakuti abombe nukumulayizya umulindilili uwa nyumba ukuti abanje maso.

³⁵Po mubanje maso pakuti mutakukamanya akabalilo kako umwenecho uwa nyumba akwizila. Angiza pachamabwila, pamo pakasi pabusiku, pamo bo ukolwe uwakwanda akukokolika, pamo bo izuba likufuma.

³⁶Nanti akwiza umwakuchenusya, atakaghe mughonite.

³⁷Zizyo inkubabuzya amwe, inkunena sona namwe mwebosi ukuti, ‘Mubanje maso!’ ”