Read lambya MALIKO 4 Bible Online

MALIKO 4 - lambya bible

MALIKO 4

¹U Yesu akanda sona pakumanyizya mulubazu ulwa Nyanja iya Galileya. Abantu babo bakamuzyungulila bakaba binji nkani, umwakuti u Yesu akinjila mubwato nukwikala mula-mula, bo abantu bimiliye mulubazu ulwa Nyanja.

²Akabamanyizya ivintu ivyinji muvyili akati,

³“Ivwa kuno! Kukabako umuntu yuyo akabuka pakupesa imbeyu mumughunda wache.

⁴Bo ali pakupesa, imbeyu zimo zikawila muzila, po iviyuni vikiza nukuzizompola.

⁵Zimo zikawila pilyalabwe pakuti pakaba itope linandi. Umwalubilo-lubilo imbeyu zila zikamela pakuti patakabapo itope ilyinji.

⁶Loli bo izuba lyakwela, imbeyu zila zikababuka pakuti amagululuzi ghakaba ghachili ghatayiye nkani pasi, sona imbeyu zila zikuma.

⁷Imbeyu zimo zikawila pakasi pamivwa, ghagho ghakakula nukufyululusya imbeyu zila, po imbeyu zitakela iseke.

⁸Loli imbeyu zimo zikawila pitope ilyiza, zikamela nukukula, po nukwela iseke; zimo zikela iseke 30, zimo 60, izinji 100.”

⁹U Yesu akati, “Yuyo ali na makutu aghakwivwila, ivwe!”

¹⁰Bo u Yesu ali mwene, bamo babo bakamwivwa bakiza poka na bamanyili 12 nukumulaluzya ukuti abalingannye ivyili.

¹¹U Yesu akamula akati, “U Chala abavumbulila vivyo vifisiwe ivya Bumwene bwache. Loli abantu babo bali kuzi bakwivwa vyosi muvyili,

¹²ukuti, ‘Bangennya nukwennya, loli bate bavyennyanje. Bangivwa nukwivwa, loli batangivwisya. Nanti bangamanya, bangapinduka nukuzileka imbibi zyabo, po u Chala angabahobokela imbibi zyabo.’ ”

¹³Po u Yesu akabalaluzya akati, “Nkimba mutakwivwisya ichili ichi? Po mukwiza pakwivwisya buli-buli ivyili ivinji?

¹⁴Umupesambeyu yula akupesa amazyu agha Chala.

¹⁵Abantu bamo bayanite bulo ni mbeyu zizyo zikuwa muzila. Panapo nanti bivwa amazyu agha Chala, umwalubilo-lubilo u Satana akwiza nukwefyamo amazyu ghagho ghapesiwe mumwabo.

¹⁶Abantu bamo bayanite bulo ni mbeyu zizyo zyawa pilyalabwe. Nanti abene bivwa bulo amazyu agha Chala, bakughapokela nu buhobosu.

¹⁷Loli pakuti amazyu ghatakwinjila mukasi mumoyo ghabo, ghatakwikala akabalilo akatali. Po nanti intamyo pamo ukuvwimiwa kwafika pachifukwa icha mazyu, bakuwa umwalubilo-lubilo.

¹⁸Abantu bamo bayanite bulo ni mbeyu zizyo zikuwa pakasi pamivwa. Aba bo bantu babo bakwivwa amazyu agha Chala.

¹⁹Loli ukwikolezannya nivya muchisu ichapasi pano, ukuchighana ichuma, sona ni vinyonywa vyosi ivyakulekana-lekana vikwinjila nukufyululusya amazyu ghala ukuti batakape iseke.

²⁰Loli abantu bamo bayanite bulo ni mbeyu zizyo zyapesiwa pitope ilyiza. Bakughivwa amazyu nukughitikizya nukupa iseke; bamo 30, abanji 60, sona bamo 100.”

²¹U Yesu akabalaluzya akati, “Nkimba alipo umuntu yuyo akusenda inyale nukuyikupikila ni sonta pamo ukuyibika kusi kuchitala? Nkimba atakuyibika pabuzelu?

²²Ichintu chosi chicho bachifisite chikwiza pakuvumbuliwa, sona ichintu chosi ichakubusyefu chikwiza pakuboneka pabuzelu.

²³Yuyo ali na makutu aghakwivwila, ivwe!”

²⁴Akababuzya sona akati, “Muchebaye nkani na zizyo mukwivwa! Ichipimilo chicho mukubombezya pa bantu abanji, cho chicho u Chala akwiza pakubombezya papinyu, loli umwakuchilapo.

²⁵Umuntu wesi yuyo ali nako kale kamo, akwiza pakumonjelezyapo ivyinji ukuchila. Loli umuntu wesi yuyo ate nako kamo, akwiza pakufyuliwa na kanandi bulo kako ali nako kale.”

²⁶U Yesu akababuzya sona akati, “Ubumwene ubwa Chala buyanite bulo nu muntu yuyo akupesa imbeyu mumughunda wache.

²⁷Akughona pabusiku nukulamusya pandabi-ndabi, pakabalilo kosi kanako izyene imbeyu zikumela nukukula, loli atakumanya namumo zikumelela nukukulila.

²⁸Itope ilyene likumezya imbeyu nukwelezya, chikwanda tasi ichipembezannya, pisinda pache akamutu, pabumalilo akankoso kako kakwizula ni seke.

²⁹Po iseke zyaghoma, umuntu yula akusenda ichipeni nukwanda pakudumula pakuti akabalilo akakwinulila kakwana.”

³⁰U Yesu akalaluzya akati, “Nkimba Ubumwene ubwa Chala buyanite ni choni? Cho choni chicho tungabombezya pakulingannya Ubumwene ubwa Chala?

³¹Buyanite bulo nu muntu yuyo akusenda imbeyu iya muzimwa, yiyo kambeyu akanandi nkani pachisu chosi ichapasi nukuyipesa mumughunda.

³²Loli bo ayipesa bulo, yikumela nukukula pakuba chibyalwa ichikulu nkani ukuchila imbeyu zyosi. Yikuba ni samba inkulu izyakuti ni viyuni vikulukamo ivivumbo vyabo.”

³³U Yesu akalumbililagha amazyu ghache pakasi pa bantu pakubombezya ivyili ivyinji nkani.

³⁴Atakanenaghapo nachimo-chimo na bantu pakusita ukubombezya ichili. Loli bo ali mwene na bamanyili bache, akabalingannyanga vyosi.

³⁵Pachamabwila pisiku lila-lila, u Yesu akababuzya abamanyili bache akati, “Twende tulobokele kwisila ilinji ilya nyanja.”

³⁶Po bakachileka ichilundilo icha bantu; abamanyili bache bakakwela mubwato mumo u Yesu akaba ikaye kale nukunyamuka poka nawe. Amabwato aghanji ghakabakonka.

³⁷Umwakuchenusya bulo impepo iyakoghofya yikanda pakukuka, po amayigha ghakanda pakunyelela mubwato mula, umwakuti ubwato bukanda pakwizula na mizi.

³⁸Loli u Yesu akaba kwisinda ku bwato kuko akaghona utulo, bo umutu wache ghuli pachinulilo. Abamanyili bakamunyamusya nukuti, “Wee Mumanyisi, nkimba utakupasya ukuti tuli pakudwiba?”

³⁹U Yesu akanyamuka nukuyilamula impepo yila ukuti, “Banga myee!” Akaghabuzya amayigha ukuti, “Ima!” Impepo yikaleka, uwakuti panyanja pakaba myee nkani.

⁴⁰U Yesu akabalaluzya abamanyili bache akati, “Nkimba choni chicho mukunyila? Nkimba mupaka nilelo bulo muchili mute nu lwitiko?”

⁴¹Loli bakanyila nkani nukulaluzannya ukuti, “Nkimba muntu wenu yunuyu, umwakuti impepo na mayigha ghope vikumwivwila!”