Read lambya LUKA 1 Bible Online

LUKA 1 - lambya bible

LUKA 1

¹Muchindikiwa Tiyofilasi: Abantu abinji bayezya nkani pakulingannya ivintu vyosi vivyo vikabombiwa pakasi papitu.

²Bakasimba vivyo tubuziwe na babo bakavyennya na maso ukwandila ko kubwandilo, sona na babo bakalumbilila Amazyu Amiza.

³Pakuti ane ne mwene nabuzikizya akiza ivintu vyosi ivi ukwandila ko kubwandilo, ninong'ona ukuti chizapo ukuti inkusimbile we Muchindikiwa, ivintu ivi mulubatiko lwache.

⁴Nabomba zinizi ukuti umanye ubwanaloli bosi ubwa vintu vivyo umanyiziwe.

⁵Pakabalilo kako bo u Helodi akaba we mwene uwa muchigaba icha Yudeya,[1] kukabako umuputi yuyo akaba we Zakaliya, yuyo akaba uwa kabukatila aka buputi ubwa Abiya. Umuchi akaba we Elizabeti, yuyo akaba waluko ulwa Aloni.

⁶Bosi babili bakaba bantu abagholosu pamaso pa Chala nukukonka akiza indaghilo na malamulo ghosi agha Mwene.

⁷Batakaba na bana pachifukwa ichakuti u Elizabeti akaba mughumba, sona yuyo nu Zakaliya bakaba baghosi.

⁸Isiku limo u Zakaliya akabombagha imbombo yache iya buputi mu Nyumba iya Chala, pakuti kakaba kabalilo aka kabukatila kache.

⁹Ukuyana ni nyiho izya buputi, akasaliwa pakupanga amayele ukuti oche ivyakununkila pachighemo. Po akabuka mu Nyumba iya Chala,

¹⁰bo ichilundilo icha bantu chikwiputa kuzi pakabalilo kako ivyakununkila vikochiwanga.

¹¹Uwantumi uwa Mwene akamubonekela, akimilila kunyobe indilo iya chighemo, papo ivyakununkila vikochiwanga.

¹²Bo u Zakaliya amwennya, akachenuka, po akanyila.

¹³Loli uwantumi yula akamubuzya akati, “Zakaliya, utakanyilaye! U Chala ivwa ulwiputo lwako. Umuchi wako u Elizabeti akwiza pakupapa umwana umulumendo, po ukwiza pakumwita ukuti we Yohani.

¹⁴Bo umwana uyu apapiwa, ukwiza pakusekela nu kuhoboka nkani, sona bope abantu abinji bulo bakwiza pakuhoboka nkani!

¹⁵Akwiza pakuba muntu uwapamwanya pamaso pa Mwene. Atakang'welepo nalumo-lumo uvinyo, pamo ichakung'wela chicho angakolwa nacho. Ukwandila pisiku lilyo apapiwa, akwiza pakwizula nu Muzimu Umuzelu

¹⁶nukubanyosezya abantu abinji aba Izilayeli kwa Mwene u Chala wabo.

¹⁷Akwiza pakulongolela kuntazi kwa Mwene mubuzimu na maka ngati we mulaghuzi u Eliya, sona akwiza pakubamanyannya abapapi na bana babo. Akwiza pakubapindula abasita ukwivwila ukuti babanje bantu bagholosu. Pakubomba bunubu akwiza pakubayannya abantu nizya ukwiza ukwa Mwene.”

¹⁸U Zakaliya akamulaluzya uwantumi yula akati, “Inkwiza pakumanya buli-buli ukuti vili bunubu? Ane ne muntu umughosi nu muchi wane bulo wepe mughosi.”

¹⁹Uwantumi yula akamula akati, “Ane ne Gabiliyeli, umubombi uwa Chala, yuyo akantuma pakunena nawe nukukubuzya Amazyu Amiza ghanagha.

²⁰Loli utakusubila amazyu ghane ghagho ghakwiza pakuba ghanaloli pakabalilo akiza. Loli pachifukwa ichakuti utasubiye, ukwiza pakuba we chinunu mupaka pisiku lilyo ilayizyo lyane kukwako likwanilisiwe.”

²¹Pakabalilo kako ivintu vinivi vikabombiwanga abantu babo bakamulindililagha u Zakaliya bakaswigha pakuti akakaba nkani mu Nyumba iya Chala.

²²Bo afuma, akapotwa pakunena nabo, po bakazyaghannya ukuti u Zakaliya akennya ichisetuka mu Nyumba iya Chala mula. Akanena nabo pakubombezya inyobe pakuti akapotwa pakufumya izyu.

²³Bo akabalilo kache aka mbombo mu Nyumba iya Chala kamala, u Zakaliya akanyokela kukaya.

²⁴Pisinda pache umuchi wache u Elizabeti akamela ulwanda nukulinda munyumba amezi fayivi.

²⁵U Elizabeti akati, “Ilelo pabumalilo u Mwene anyavwa. Anyefya isoni pamaso pa bantu!”

²⁶Mumwezi uwa sikisi uwa lwanda ulwa Elizabeti, u Chala akatuma uwantumi u Gabiliyeli kukaya aka Nazaleti muchigaba icha Galileya.

²⁷Akatumiwa ku mulindu yuyo akazingiliwa nu mwanavuli, yuyo akaba we Jozefu uwaluko ulwa Mwene u Devedi. Itabwa ilya mulindu yula akaba we Maliya.

²⁸Uwantumi yula akiza pakumulamuka nukuti, “Mwaghona! U Mwene ali nawe, sona akusayite nkani!”

²⁹U Maliya akatamiwa nkani mumoyo wache na mazyu agha uwantumi yula, sona akaswigha na chicho amazyu ghakang'anamulagha.

³⁰Uwantumi yula akamubuzya akati, “Maliya, utakanyilaye, u Chala akulanjizya ichisa chache.

³¹Ukwiza pakumela ulwanda nukupapa umwana umulumendo, sona ukwiza pakumwita ukuti we Yesu.

³²Akwiza pakuba mukulu nkani, sona akwiza pakwitiziwa ukuti we Mwana uwa Chala uwa Kumwanya nkani. U Mwene u Chala akwiza pakumuvwika impumpu iya munyenya wache u Devedi,

³³sona akwiza pakuba we Mwene uwaluko ulwa Yakobo bwila na bwila, sona ubumwene bwache bute bukamale nalumo!”

³⁴U Maliya akamulaluzya uwantumi yula akati, “Nkimba zinizi zingaba buli-buli? Ane intamumenye nalumo umwanavuli.”

³⁵Uwantumi yula akamula akati, “U Muzimu Umuzelu akwiza papako, sona ukwiza pakwizula na maka agha Chala. Pachifukwa chinichi u Mwana umuzelu yuyo ukwiza pakupapa, akwiza pakwitiziwa Mwana uwa Chala.

³⁶Ennya, umukamu wako u Elizabeti, yuyo akaneniwa ukuti mughumba, loli ilelo ali nu lwanda ulwa mezi sikisi, napapo mughosi nkani.

³⁷Pakuti chitalipo nachimo-chimo chicho chingamupota u Chala.”

³⁸U Maliya akati, “Ane ne wambombo uwa Chala. Leka zibombiwe zizyo wanena.” Po uwantumi yula akamuleka nukubuka.

³⁹Mumasiku ghala-ghala u Maliya akiyannya nukubuka umwalubilo-lubilo kukaya aka mwighamba aka Yudeya.

⁴⁰Akinjila munyumba iya Zakaliya nukumulamuka u Elizabeti.

⁴¹Bo u Elizabeti ivwa bulo ukulamuka ukwa Maliya, umwana akasakata mulwanda lwache. U Elizabeti akizula nu Muzimu Umuzelu

⁴²nukunena na mazyu agha pamwanya ukuti, “We musayiwa pa bakolo bosi, sona musayiwa umwana yuyo ukwiza pakupapa!

⁴³Nkimba ne wenu ane ukuti unyina uwa Mwene wane anyendele?

⁴⁴Pakuti bo nivwa bulo ukulamuka kwako, umwana mulwanda lwane akasakata nu lusekelo.

⁴⁵Musayiwa umuntu yuyo akusubila ukuti amazyu agha Mwene ghakwiza pakukwanilisiwa!”

⁴⁶U Maliya akati, “Umoyo wane ghukumupala u Mwene;

⁴⁷umuzimu wane ghuhobokite, pachifukwa icha Chala Umupoki wane.

⁴⁸Pakuti ankumbuka, ne wambombo wache uwakwiyisya! Ukwandila pakabalilo aka, abantu abankulilo zyosi bakwiza pakunyitizya musayiwa,

⁴⁹ichifukwa icha vintu ivikulu vivyo u Chala Uwamaka ambombela. Itabwa lyache lizelu;

⁵⁰ukwandila inkulilo yoka mupaka iyamwabo akubapelela ichisa abantu babo bakumuchindika.

⁵¹Abomba ivintu ivikulu nkani ni nyobe yache nukunyampannya abamituvyo ni mbatiko zyabo zyosi.

⁵²Abawisya abamwene abamaka pa vitengo vyabo, nukubakwezya abakwiyisya.

⁵³Abazala akubikutizya ni vintu ivyiza nukubabwezya abakabi ni nyobe zyene.

⁵⁴Amwavwa umubombi wache u Izilayeli pakumulanjizya ichisa,

⁵⁵u Abulahamu nu luko lwache losi bwila na bwila.”

⁵⁶U Maliya akikala poka nu Elizabeti amezi matatu, po akanyokela kukaya kache.

⁵⁷Bo akabalilo akakuti u Elizabeti asayiwe kakwana, akapapa umwana umulumendo.

⁵⁸Abapalamani na bakamu bakivwa mumo u Mwene abeleye ni chisa ichikulu kukwache, po bosi bakasekela poka nawe.

⁵⁹Bo umwana amala amasiku eyiti, bakiza nawe ukuti asilimuliwe, sona nukuti bamwite ukuti we Zakaliya, itabwa ilya wise.

⁶⁰Loli unyina akakana akati, “Awe! Itabwa lyache libanje we Yohani.”

⁶¹Po abantu bakamubuzya bakati, “Loli ute nu mukamu nayumo-yumo yuyo ali ni tabwa linili!”

⁶²Bakabombezya inyobe pakumulaluzya uwise uwa mwana itabwa lilyo akalondagha ukuti umwana itiziwanje nalyo.

⁶³U Zakaliya akalaba apakusimbapo nukusimba ukuti, “Itabwa lyache libanje we Yohani.” Bosi bakaswigha nkani!

⁶⁴Umwalubilo-lubilo ululimi ulwa Zakaliya lukasatuka nukwanda sona pakunena, po akanda pakumupala u Chala.

⁶⁵Abapalamani bakizula nu bogha, sona imbili iya vintu vinivi yikasata posi na posi muchigaba icha maghamba agha Yudeya.

⁶⁶Umuntu wesi yuyo akivwa zinizi akinong'ona nukwilaluzya ukuti, “Nkimba umwana yunuyu akwiza pakuba buli-buli?” Pakuti chikabonekela zila ukuti amaka agha Mwene ghakaba papache.

⁶⁷U Zakaliya uwise uwa Yohani akizula nu Muzimu Umuzelu, po akalaghula akati,

⁶⁸“Amapalo ghabanje kwa Mwene, u Chala uwa ba Izilayeli, pakuti iza pakubavwa abantu bache nukubasatula.

⁶⁹Atupa Umupoki uwamaka, uwaluko uwa mubombi wache u Devedi.

⁷⁰Ivi vyo vivyo akalayizya kale ukwendela mu balaghuzi abazelu.

⁷¹Akatulayizya ukuti akwiza pakutupoka munyobe izya balwani bitu ukufuma munyobe izya bosi babo bakutubenga.

⁷²Akanena ukuti akwiza pakubapelela ichisa abanyenya bitu nukukumbuka ulufingo lwache uluzelu.

⁷³Akamulayizya umunyenya witu u Abulahamu

⁷⁴ukuti akwiza pakutupoka munyobe izya balwani bitu nukutwitikizya ukuti tumubombele umwakusita ubogha,

⁷⁵umwakuti tungaba bazelu, sona bagholosu pamaso papache amasiku ghosi agha bumi bwitu.

⁷⁶We mwana wane, ukwiza pakwitiziwa mulaghuzi uwa Chala uwa Kumwanya nkani. Ukwiza pakulongolela kuntazi kwa Mwene pakumuyanizya umusebo wache.

⁷⁷Ukwiza pakubabuzya abantu bache ukuti bakwiza pakupokiwa pakuhobokeliwa imbibi zyabo.

⁷⁸U Chala witu wachisa nkani. Akwiza pakututumila ulukozyo ulwa kumwanya,

⁷⁹lulo lukwiza pakubalamila abantu bosi, babo bakwikala muchisi na mumuzyezye uwa bufwe pakutulongolela muzila iya mutende.”

⁸⁰Po umwana yula akakula nukuba wamaka mubuzimu. Akikala munkolongo mupaka isiku lilyo akabonekela pabuzelu pakasi pa ba Izilayeli.