Read lambya LUKA 12 Bible Online

LUKA 12 - lambya bible

LUKA 12

¹Mukabalilo kala-kala bo abantu amasabuzani na masabuzani bakabungana poka, umwakuti bakakanyanagha, u Yesu akanena tasi na bamanyili bache akati, “Muchebaye ni chilungo icha ba Falisayi, chicho chikung'anamula ubuzimbuli bwabo.

²Ichintu chosi chicho chivwinkiwe chikwiza pakuvwinkuliwa, sona ichintu chosi chicho ichakubusyefu chikwiza pakuboneka pabuzelu.

³Zyosi zizyo mwanena kubusyefu zikwiza pakwivwika pabuzelu, sona zyosi zizyo mwateketa mukasi muvipinda zikwiza pakufumusiwa pachulu.”

⁴Bamanyani bane, inkubabuzya, mutakabanyilaye abantu babo bangaghogha umubili, loli pisinda pache batangabomba nachimo-chimo ichinji.

⁵Leka imbalanjizye yuyo mubaghiye pakumunyila. Mumunyilaye u Chala, yuyo nanti amufyula umuntu ubumi, ali nu bulaghili ubwakumusumbila mu Gehena. Naloli we yuyo mubaghiye pakumunyila!

⁶Nkimba utwatiti fayivi tutangaghuliziwa ni salabazya zibili? Loli nakamo akatiti kako u Chala akaluvizye.

⁷Zyope ni sisi izya kumitu yinyu zibelengiwe. Po mutakanyilaye pakuti amwe mwe bapamwanya nkani ukuchila utwatiti utwinji!

⁸Naloli inkubabuzya ukuti umuntu wesi yuyo akunyitika pamaso pa bantu, u Mwana uwa Muntu wepe akwiza pakumwitika pamaso pa bantumi aba Chala.

⁹Loli umuntu wesi yuyo akunkana pamaso pa bantu, u Mwana uwa Muntu wepe akwiza pakumukana pamaso pa bantumi aba Chala.

¹⁰“Umuntu wesi yuyo akumunenela u Mwana uwa Muntu ivintu ivibibi, akwiza pakuhobokeliwa. Loli umuntu wesi yuyo akumusamula u Muzimu Umuzelu atakwiza pakuhobokeliwa nalumo-lumo.

¹¹“Bo babasitaka munyumba izyakwiputilamo, pamo pa basongo, pamo pa balaghili, mutakapasyanje ukuti, ‘Nkimba tukwiza pakunena ichoni? Nkimba tukwiza pakwiyimila buli-buli?’

¹²Pakuti u Muzimu Umuzelu akwiza pakubamanyizya ichakunena pakabalilo kala-kala.”

¹³Umuntu yumo mukasi muchilundilo icha bantu akamulaba u Yesu akati, “Wee Mumanyisi, umubuzye uwamwitu ukuti agabe ivyuma vivyo utata umuyazi akatulekela.”

¹⁴Loli u Yesu akamwamula akati, “Mumanyani, nkimba we wenu akampa imbombo iyakulongela, pamo iyakubagabannya ivyuma ivya muyazi yula?”

¹⁵Po akendelela pakubabuzya abantu bosi akati, “Muchebaye, sona mutakabanje nu bupavu ubwa luko losi. Napapo umuntu angaba ni vyuma ivyinji, ivyuma vila vitangabupoka ubumi bwache.”

¹⁶Po u Yesu akababuzya ichili akati, “Kukabako umuntu yumo umukabi, yuyo akaba nu mughunda ghugho ghukelagha ivyakulya ivyiza.

¹⁷Po akanda pakwinong'ona mwene akati, ‘Inte nu buyo nabumo ubwakusungilapo ivyakulya vyane vyosi. Nkimba ningabomba choni?’

¹⁸Po akanena mwene akati, ‘Ichi, cho chicho inkwiza pakubomba. Inkwiza pakumongolannya intamba zyane nukuzenga inkulupo, mumo inkwiza pakusungamo imbeyu nu katundu wane wesi uyunji.

¹⁹Po inkwiza pakughubuzya umoyo wane ukuti we walusako. Uli ni vyuma ivyinji vivyo vikwiza pakukusunga amaka aminji. Bupepule bulo, lyanga, sona ung'welaye nukuhoboka wemwene!’

²⁰Loli u Chala akati, ‘We mupunganu awe! Ubusiku bunubu ubumi bwako bukwiza pakufyuliwa, po we wenu akwiza pakusunga ivintu vyako vyosi vinivi?’ ”

²¹Pabumalilo u Yesu akati, “Momumo zibeleye na bantu babo bakwilundikila bene ivyuma, loli bate bakabi pamaso pa Chala.”

²²Po u Yesu akababuzya abamanyili bache akati, “Inkubabuzya ukuti mutakapasyanje nizya bumi bwinyu ukuti mukwiza pakulya ichoni, pamo mukwiza pakuvwala ichoni.

²³Pakuti ubumi bwapamwanya ukuchila ichakulya, sona umubili wapamwanya ukuchila amenda.

²⁴Ennya, abachigobe batakupesa imbeyu pamo ukwinula, sona bate ni nyumba, pamo intamba izya kusungilamo ivyakulya, loli u Chala akubalyesya! Amwe mwe bapamwanya nkani ukuchila iviyuni!

²⁵Nkimba alipo umuntu pakasi papinyu yuyo angonjelezya isiku[15] lyoka ilya bumi bwache pakupasya?

²⁶Nanti mutangabomba na kantu akanandi bulo ngati ko aka, choni chicho mukupasya ni vintu ivinji?

²⁷Ennya amaluba agha muzi mumo ghakukulila. Ghatakubomba imbombo, pamo ukwipangila amenda. Loli inkubabuzya ukuti u Mwene u Solomoni nu bukabi bwache bosi, atakaba na menda amiza ghagho ghayanite bulo ni luba limo ilya agha.

²⁸Nanti u Chala angaghavwika amasote, ghagho ghaliko ilelo nukughasumbila pamoto indabi, nkimba atangabavwika amwe. Mwe bantu aba lwitiko ulunandi amwe.

²⁹Polelo mutakapasyanje ukuti tukwiza pakulya ichoni, pamo tukwiza pakung'wela ichoni.

³⁰Pakuti abantu abakuzi aba muchisu ichapasi ichi bo babo bakuvilonda ivintu vinivi. Ughuso avimenye ivintu vyosi vivyo mukuvilonda.

³¹Loli amwe, mulondaye tasi Ubumwene ubwa Chala, po akwiza pakubapa ivintu vyosi vinivi.”

³²Amwe mwe kamudimo akanandi aka ng'ozi, mutakanyilaye pakuti chikamuhobosya Ughuso pakubapa Ubumwene bwache.

³³Ghulizya vyosi vivyo muli navyo nukubapa abapina indalama. Mubanje ni vikwama ivya ndalama vivyo vitakuzepuka nukwilundikila ubukabi kumwanya, bubo bute bukamale nalumo, pakuti abiba batangapankula nukwiba, sona impezu zitangabunangannya.

³⁴Pakuti kuko kuli ubukabi bwako, ko kuko kuli nu moyo wako.

³⁵“Mubanje bakwiyannya pachosi chicho chikwiza, sona mukozye inyale zyinyu ukuti zilamaye.

³⁶Muyane bulo na bambombo babo bakulindilila umwene wabo ukuti abwele ku lusekelo ulwa sendwa, umwakuti bo akwiza nukukong'osya umulyango bakumwighulila umwalubilo-lubilo.

³⁷Basayiwa abambombo babo umwene wabo akubagha bali maso bo abwelako! Naloli inkubabuzya ukuti akwiza pakwiyanizya mwene, akwiza pakubabuzya ukuti bikale pasi nukwanda pakubabombela.

³⁸Basayiwa abambombo bala nanti akubagha biyanizye, bo abwelako, napapo angiza pakasi pabusiku pamo pandabi-ndabi nkani!

³⁹“Loli mumanye ukuti nanti umwenecho uwa nyumba akamenye akabalilo kako umwiba akwizila ngali atitikizizye ukuti apankule inyumba yache.

⁴⁰Po namwe bulo mubaghiye pakuba bakwiyannya pachifukwa ichakuti u Mwana uwa Muntu akwiza pakabalilo kako mwiyekeye.”

⁴¹U Pitala akati, “Wee Mwene, nkimba ichili chinichi ukutunenela twebene, pamo na bantu bosi?”

⁴²U Mwene akamula akati, “Nkimba we wenu wambombo umusubiliwa nu wamahala? We yuyo u mwene wache akumubika pakuba we songo uwa vintu vyache vyosi nukubapa abambombo abanji ichakulya pakabalilo akiza.

⁴³Musayiwa nkani uwambombo yula nanti u mwene wache abwelako, akumwagha akubomba zinizi.

⁴⁴Naloli inkubabuzya ukuti umwene wache akwiza pakumubika uwambombo yula pakuba we songo uwa vintu vyache vyosi.

⁴⁵“Loli nanti uwambombo yula mubibi, akunena mwene ukuti, ‘U mwene wane akukaba nkani pakubwela.’ Po akwanda pakubakoma abambombo abanji, bosi abanavuli na bakolo bulo, sona akulya, akung'wela nukukolwa.

⁴⁶U mwene uwa bambombo yula akwiza pisiku lilyo bo uwambombo yula iyekeye na pakabalilo kako atakamenye. U mwene yula akwiza pakumudumulannya [16] nukumusumbila mubuyo ubwa bantu abasita ukwivwila.

⁴⁷“Uwambombo yuyo achimenye chicho umwene wache akulonda ukuti abombe, loli atakwiyannya mwene nukuchibomba akwiza pakufundiwa pakusyempiwa nkani.

⁴⁸Loli uwambombo yuyo atachimenye chicho umwene wache akuchilonda nukubomba ichinji bulo chicho abaghiye pakufundiwa nacho, akwiza pakufundiwa pakusyempiwa panandi bulo. Umuntu yuyo akapokela ivyinji abikaye ivyinji. Sona umuntu yuyo akapokela ivyinjipo nkani abikaye ivyinjipo nkani.”

⁴⁹“Inkiza pakukozya umoto pachisu ichapasi, sona nalondagha ukuti ngali wakite kale!

⁵⁰Loli imbaghiye pakoziwa mumayimba aminji, sona umoyo wane ghutakutuzyapo nalumo-lumo mupaka izi zibombiwe!

⁵¹Nkimba mukwinong'ona ukuti niza pakubika umutende pachisu ichapasi? Awe, umutende awe, loli ukugabinkana.

⁵²Ukwandila pakabalilo aka inyumba iya bantu fayivi yikwiza pakugabinkana; abantu batatu bakwiza pakubasambukila abantu babili, sona abantu babili bakwiza pakubasambukila abantu batatu.

⁵³Utata akwiza pakulwana nu mwana wache umulumendo, sona wepe umwana umulumendo akwiza pakulwana nu wise. Unyina akwiza pakulwana nu mwana wache umulindu, sona wepe umwana umulindu akwiza pakulwana nu nyina. Unyinavyala akwiza pakulwana nu mulasagha, sona wepe umulasagha akwiza pakulwana nu nyinavyala.”

⁵⁴U Yesu akababuzya abantu akati, “Nanti mukwennya amabingu ghakukwela kubwinjililo ubwa izuba, umwalubilo-lubilo nukuti, ‘Ivula yikwiza pakutima,’ po naloli yikutima.

⁵⁵Po sona nanti impepo iya kuntende yikukuka mukuti, ‘Kukwiza pakupya,’ po naloli kukupya.

⁵⁶Mwe bazimbuli mwee! Nanti mumenye pakusakizya akabonekele aka vintu ivya muchisu ichapasi na kumwanya, po nkimba choni chicho mutakusakizya vivyo vikuboneka akabalilo aka?

⁵⁷“Choni chicho mutakulonga mwebene pakubomba ichintu chicho chibaghiye pakubombiwa?

⁵⁸Nanti umuntu akusitaka, chizapo pakwivwana nawe umwalubilo-lubilo bo muli muzila. Pakuti nanti mutakwivwana, akwiza pakukubika munyobe izya balongi. Sona umulongi akwiza pakukubika munyobe izya musikali, yuyo akwiza pakukwighalila mujele.

⁵⁹Inkukubuzya ukuti ukwiza pakwikala mumo mupaka ulipile indalama iyabumalilo iya nongwa yako.”