Read lambya LUKA 13 Bible Online

LUKA 13 - lambya bible

LUKA 13

¹Pakabalilo kala-kala pakabapo abantu bamo, babo bakamubuzya u Yesu nizya ba Galileya, babo u Pilati akabaghogha, bo bakubika ivyakwiyipa kwa Chala.

²U Yesu akabamula akati, “Nkimba mukwinong'ona ukuti abantu aba mu Galileya, babo bakaghoghiwa bunubu bakaba bambibi nkani ukuchila abantu aba mu Galileya bosi abanji?

³Awe! Inkubabuzya ukuti nanti mutakupinduka nukuzileka imbibi zyinyu mwebosi mukwiza pakufwa ukuyana na mumo bakafwila.

⁴Nkimba buli nizya bantu 18 bala babo bakafwila mu Silowamu, bo inyumba yiyo yighelesanizye yikabadilimukila. Nkimba mukwinong'ona ukuti bakaba bambibi nkani ukuchila abantu bosi, babo bakwikala mu Yelusalemu?

⁵Awe! Inkubabuzya ukuti nanti mutakupinduka nukuzileka imbibi zyinyu mwebosi mukwiza pakufwa ukuyana na mumo bakafwila.”

⁶Po u Yesu akababuzya ichili akati, “Kukabako umuntu yumo yuyo akaba ni ikwi ilya ikuyu, lilyo likaba mumughunda wache uwa mampesya. Akabuka ukuti ayabemo iseke, loli atakazyaghamo.

⁷Po akamubuzya umulimi yula akati, ‘Ennya, nizagha kuno amaka matatu pakulonda iseke, loli intakuzyaghamo. Chidumule! Choni chicho chendelelaye pakunangannya umuvundo?’

⁸Loli umulimi yula akamula akati, ‘Wee Mwene, chileke tasi umwaka ghoka. Inkwiza pakukumba ichiliba mulubazu umwakuzyungulila nukubikamo umuvundo.

⁹Po nanti ikwi lyela iseke umwaka ghugho ghukwiza chizapo, loli nanti litakwela iseke po ungalidumulalyo.’ ”

¹⁰Pisiku limo Ilyakutuzya u Yesu akamanyizyanga munyumba iyakwiputilamo.

¹¹Mula-mula mukaba umukolo yumo, yuyo akaba nu muzimu umubibi, ghugho ghukamupela ukuti abine amaka 18. Akapetama umusana, umwakuti akapotwanga pakugholoka napo panandi.

¹²Bo u Yesu amwennya, akamwitizya nukumubuzya ukuti, “Wee mukolo, wasatuka muntamyo zyako.”

¹³Akabika inyobe zyache pa mukolo yula, umwalubilo-lubilo akagholoka nukumupalizya u Chala.

¹⁴Usongo uwa nyumba iyakwiputilamo akakalala nkani, pachifukwa ichakuti u Yesu amupozya umuntu Pisiku Ilyakutuzya, po akababuzya abantu akati, “Pali amasiku sikisi ghagho tubaghiye tubombaye imbombo, po mwizaye pa masiku ghanagha ukuti mupole, loli Pisiku Ilyakutuzya, awe.”

¹⁵U Mwene akamwamula akati, “Mwe bazimbuli mwee! Nayumo umuntu mumwinyu, yuyo akusatula ing'ombe pamo impunda pakubuka nayo ukuti ayipe amizi Pisiku Ilyakutuzya?

¹⁶Ilelo pano pali uwaluko ulwa Abulahamu, yuyo apinyiwe nu Satana amaka 18; po nkimba atangasatuliwa Pisiku Ilyakutuzya?”

¹⁷Bo u Yesu anena zinizi, abalwani bache isoni zikabalema. Loli abantu bosi bakahoboka ni vintu ivyakuswighizya nkani vivyo akabomba.

¹⁸U Yesu akalaluzya akati, “Nkimba Ubumwene ubwa Chala buyanite ni choni? Ningabombela ichoni pakubufwanikizya Ubumwene ubwa Chala?

¹⁹Buyanite bulo nu muntu yuyo akusenda imbeyu iya muzimwa nukupesa mumughunda wache. Ichibyalwa chikukula nukuba ikwi, umwakuti utuyuni tukwiza nukulukamo ivivumbo vyabo musamba zyache.”

²⁰U Yesu akalaluzya sona akati, “Nkimba ningabombezya ichili choni pakubufwanikizya Ubumwene ubwa Chala?

²¹Buyanite bulo nu mukolo yuyo akusenda ichilungo nukongannya ni ndobo zibili izya busu mupaka ichinyenya chosi chikatutumuka.”

²²Bo u Yesu akubuka mu Yelusalemu muzila akamanyizyanga abantu mutwaya utukulu na mutwaya tosi.

²³Umuntu yumo akamulaluzya akati, “Wee Mwene, nkimba bantu abanandi bulo babo bakwiza pakupokiwa?” U Yesu akabamula akati,

²⁴“Yezya nkani pakwinjila pamulyango umufinye. Pakuti abantu abinji bakwiza pakuyezya nkani ukwinjilapo, loli bakwiza pakupotwa.

²⁵Umwenecho uwa nyumba akwiza pakunyamuka nukwighalila umulyango. Po amwe mwe muli kuzi mukwiza pakukong'osya pamulyango nukuti, ‘Wee Mwene, twighulileko.’ Loli u Mwene akwiza pakwamula ukuti, ‘Awe, intamenyeko kuko mwafuma.’

²⁶Po mukwiza pakwamula ukuti, ‘Tukalyanga nukung'wela poka nawe. Ukamanyizyanga mutwaya twitu utukulu.’

²⁷Loli akwiza pakunena sona ukuti, ‘Intamenyeko kuko mwafuma. Epako, mwe bantu ababibi amwe.’

²⁸Mukwiza pakulila nukusyeketula amino bo mukumwennya u Abulahamu, nu Yisaki, nu Yakobo, sona na balaghuzi bosi mu Bumwene ubwa Chala, bo amwe mukusumbiwa kuzi.

²⁹Abantu aba kubufumilo naba kubwinjililo ubwa izuba, sona naba kumitu na kuntende bakwiza pakwikala pasi palusekelo mu Bumwene ubwa Chala.

³⁰Po bosi babo babumalilo bakwiza pakuba bakwanda, sona bosi babo bakwanda bakwiza pakuba babumalilo.”

³¹Pakabalilo kala-kala aba Falisayi bamo bakiza kwa Yesu nukumubuzya ukuti, “Wepeko kuno nukubuka kumo, ichifukwa u Helodi akulonda pakukughogha.”

³²U Yesu akabamula akati, “Kamubuzye ukambwe yula ukuti inkwefya imizimu imibibi nukupozya ababine ilelo ni ndabi bulo, sona pisiku ilyabutatu inkwiza pakumalizya imbombo yane.”

³³Loli imbaghiye pakubuka pa bulendo bwane ilelo, indabi ni siku ilinji pakuti chitabaghiye ukuti umulaghuzi afwile kubuyo uyunji, loli mwene mu Yelusalemu.

³⁴“Wee Yelusalemu, wee Yelusalemu! Ukughogha abalaghuzi nukutiza na mabwe intumi zizyo u Chala akutumiye! Akabalilo akinji nalondagha pakubabungannya abana bako ukuyana na mumo inkuku yikufukatilila utwana twache muvipapande, loli utakanyitikizya.

³⁵Ennya ilelo Inyumba yinyu iya Chala yikwiza pakuba chisami. Inkubabuzya ukuti ukwandila pakabalilo aka, mute mukanyennyepo nalumo-lumo mupaka munene ukuti, ‘U Chala amusaye yuyo akwiza mwitabwa ilya Mwene.’ ”