Read lambya LUKA 17 Bible Online

LUKA 17 - lambya bible

LUKA 17

¹U Yesu akababuzya abamanyili bache akati, “Injelo izyakumuwisya umuntu zibaghiye zibeko, loli chighune nkani nu muntu yuyo akwiza nazyo!

²Chingaba chizapo ukuti umuntu yula bamupinyilile ulwala ulukulu musingo nukumusumbila munyanja nukuchila ukuti amupelele weka uwa bana abanandi aba pakubomba imbibi.

³Po muchebaye. “Nanti umukamu wako akunanga, umuchemele, po nanti akupinduka nukuzileka imbibi zyache, umuhobokele.

⁴Nanti akunangila ka seveni pisiku lyoka, sona nanti akabalilo kosi akwiza kukwako nukuti, ‘Naleka,’ umuhobokele.”

⁵Abatumiwa bakanena kwa Mwene bakati, “Utonjelezye ulwitiko lwitu.”

⁶U Mwene akamula akati, “Nanti mukabanga nu lwitiko napapo lunandi bulo ngati ko kambeyu aka muzimwa, ngali mukulibuzya ikwi ilya tuntonongwa ukuti, ‘Nyunkuka nukwibyala munyanja!’ Po lingabivwila.”

⁷U Yesu akanena sona akati, “Buli nanti umuntu yumo mumwinyu, yuyo ali nu wambombo uwakulima, pamo uwakudima ing'ozi. Nanti abwelako ku mughunda, nkimba ukumubuzya ukuti, ‘Zagha lubilo-lubilo ukuti ulye’?

⁸Awe, atangabomba bunubu, loli akumubuzya ukuti, ‘Yannya ichakulya chane icha pachamabwila, sona wiyannye pakumbombela, bo indi pakulya nukung'wela. Bo nalya, po nawe ungalya.’

⁹Nkimba akumupalizya uwambombo yula pachifukwa ichakuti abomba imbombo, yiyo akamubuzya ukuti abombe?

¹⁰Chiyanite bulo namwe, nanti mwabomba vyosi vivyo mubuziwe munenaye ukuti, ‘Aswe twe bambombo bulo, twabomba bulo zizyo twabaghiye pakubomba.’ ”

¹¹Bo u Yesu akubuka mu Yelusalemu akendagha mumpaka iya Samaliya nu Galileya.

¹²Bo akwinjila mukaya kamo, akakomana na bamambombo teni. Bakima pa butalipo

¹³nukukolomoka ukuti, “Mwene Yesu, utupelele ichisa!”

¹⁴U Yesu akabennya nukubabuzya ukuti, “Bukagha nukwilanjizya mwebene ku baputi.” Bo bali muzila, bakapola.

¹⁵Bo yumo uwa bantu bala ennya ukuti apola, akanyokela nukumupalizya u Chala na mazyu agha pamwanya.

¹⁶Akisumba pasi munyayo izya Yesu nukumupalizya. Umuntu uyu akaba Musamaliya.

¹⁷U Yesu akati, “Abantu babo bakapola bakaba teni; nkimba abanji nayini bala bali ko kwiyi?

¹⁸Nkimba choni chicho umuyeni mwene bulo, we yuyo anyokela pakumupalizya u Chala?”

¹⁹Po u Yesu akati, “Nyamuka bukagha. Ulwitiko lwako lwakupozya.”

²⁰Aba Falisayi bamo bakamulaluzya u Yesu bakati, “Nkimba u Chala akwiza pakwikazya liyi Ubumwene bwache?” U Yesu akamula akati, “U Chala akwiza pakwikazya Ubumwene bwache umwakuboneka na maso.

²¹Nayumo umuntu yuyo akwiza pakunena ukuti, ‘Ennya buli kuno,’ pamo ‘Buli kula!’ Pakuti Ubumwene ubwa Chala buli mumwinyu.”[18]

²²Po akababuzya abamanyili bache akati, “Akabalilo kakwiza, bo mukwiza pakulonda pakwennya isiku limo mumasiku aghakwiza ukwa Mwana uwa Muntu. Loli mutakwiza pakulyennya.

²³Kukwiza pakubako babo bakwiza pakunenagha kukwinyu ukuti, ‘Ali pano,’ pamo ‘Ali kula.’ Loli mutakabukaye nukubakonka.

²⁴Akamesya kakumesya nukulama kumwanya ukwandila kulubazu loka mupaka kulubazu ulunji. Umwakuyana bulo, umu mo mumo kukwiza pakubela sona pisiku ilya Mwana uwa Muntu.

²⁵Loli u Mwana uwa Muntu abaghiye pakuyimba tasi nukukaniwa na bantu abankulilo iyi.

²⁶Ukuyana na mumo vikabela pakabalilo aka Nowa, momumo kukwiza pakubela sona pakabalilo aka Mwana uwa Muntu.

²⁷Abantu bakalyanga nukung'wela, bakasendanagha mupaka pisiku lilyo u Nowa akinjila mubwato ubukulu nkani. Po amizi ghakizula nukubaghogha bosi.

²⁸Vikwiza pakuyana bulo na mumo vikabela pakabalilo aka Loti. Abantu bakalyanga nu kung'wela; bakaghulagha nu kughulizya, sona bakabyalagha nu kuzenga.

²⁹Loli pisiku lilyo u Loti akafumagha mu Sodomu, u Chala akabasumbila umoto na mabwe aghakwaka agha sulufule nukubaghogha bosi.

³⁰Momumo kukwiza pakubela pisiku ilyakwizila kwa Mwana uwa Muntu.

³¹“Pisiku linilyo umuntu yuyo ali pachisonje icha nyumba yache atakikaye nukusenda ivintu vyache munyumba. Umwakuyana bulo wepe umuntu yuyo ali mumughunda atakabwelaye kunyumba.

³²Kumbuka nizya muchi uwa Loti!

³³Umuntu wesi yuyo akulonda pakubupoka ubumi bwache akwiza pakubutagha. Loli umuntu wesi yuyo akubutagha ubumi bwache akwiza pakubupoka.

³⁴Inkubabuzya ukuti pabusiku bula-bula abantu babili bakwiza pakughonagha pachitala choka, weka akwiza pakusendiwa, po uyunji yula akwiza pakulekiwa pala-pala.

³⁵Abakolo babili bakwiza pakusyanga poka palwala, weka akwiza pakusendiwa, po uyunji yula akwiza pakulekiwa pala-pala.”[19]

³⁷Abamanyili bakamulaluzya bakati, “Wee Mwene, nkimba zinizi zikwiza pakubombiwa kwiyi?” U Yesu akamula akati, “Papo pali ichintu ichifwe, amazwanga ghakubungana pala-pala.”