Read lambya LUKA 18 Bible Online

LUKA 18 - lambya bible

LUKA 18

¹Po u Yesu akababuzya abamanyili bache ichili pakubamanyizya ukuti biputaye akabalilo kosi nukusita ukulita.

²Akati, “Mukaya kamo mukabamo umulongi yumo, yuyo atakamunyilagha u Chala, pamo ukubachindika abantu.

³Sona mukaya mula-mula mukaba umukolo umufwilwe, yuyo akizagha kukwache kabili-kabili pakumulambilizya ukuti, ‘Undongeleko inongwa nu mulwani wane!’

⁴Akabalilo akatali umulongi yula akakanagha pakulonga inongwa yila, loli pisinda pache akanena mumoyo wache akati, ‘Napapo intakumunyila u Chala, pamo ukubachindika abantu,

⁵loli pachifukwa ichakuti umufwilwe uyu akuntamya, inkwiza pakumulongela inongwa yache, umwakuti atakanditisye nu kukwiza kwache kabili-kabili.’ ”

⁶Po u Mwene akati, “Teghelezya vivyo umulongi uwamabeko uyu akanena.

⁷Nkimba u Chala atakwiza pakubalongela akiza abantu bache, babo bakumulilila umusanya nu busiku? Nkimba akwiza pakuzyela-zyela pakubavwa?

⁸Inkubabuzya ukuti akwiza pakubalongela akiza, sona akwiza pakubomba umwalubilo-lubilo. Loli bo u Mwana uwa Muntu akwiza, nkimba akwiza pakulwagha ulwitiko pachisu ichapasi ichi?”

⁹U Yesu akababuzya sona ichili ichinji abantu babo bakituvyanga ukuti bagholosu nukubasula abanji.

¹⁰Akati, “Kukabako abantu bamo babili, babo bakabuka pakwiputa mu Nyumba iya Chala. Weka akaba mu Falisayi, uyunji akaba musonkezyasonko.

¹¹“Umu Falisayi akimilila pamwene nukwiputa[20] ukuti, ‘Chala, inkukupalizya pakuti inte ne mupavu, sona inte ne mubomba mbibi, pamo mulowe ngati bo bantu bamo. Inkukupalizya pakuti intayanite nu musonkezyasonko yula.

¹²Ane inkutuzya pakulya amasiku mabili mwasabata weka, sona inkubika ichigaba choka pa vigaba 10 ivya vyosi vivyo inkupokela.’

¹³Loli umusonkezya sonko akimilila pa butalipo, sona atakalonda ukwennya na kumwanya. Loli akikoma pachifuba nukuti, ‘Wee Chala, umpelele ichisa, ane ne wambibi.’ ”

¹⁴U Yesu akati, “Inkubabuzya ukuti umusonkezya sonko akabwela kunyumba, bo u Chala amunena pakuba mugholosu pamaso papache, umu Falisayi yula, awe. Pakuti umuntu wesi yuyo akwikwezya mwene akwiza pakwisiwa, sona umuntu wesi yuyo akwiyisya mwene akwiza pakukwezyiwa.”

¹⁵Abantu bamo bakiza na bana kwa Yesu ukuti abasaye pakubika inyobe zyache. Loli bo abamanyili bache bennya zinizi, bakabachemela.

¹⁶Loli u Yesu akabitizya abana bala nukuti, “Baleke abana bize kukwane, mutakabakanizye pakuti Ubumwene ubwa Chala bwa bantu babo bali ngati bo aba.

¹⁷Naloli inkubabuzya ukuti umuntu wesi yuyo atakupokela Ubumwene ubwa Chala ngati we mwana, ate akinjilemo nalumo.”

¹⁸Umulongozi yumo uwa Chiyuda akamulaluzya u Yesu akati, “Wee Mumanyisi umwiza, nkimba imbombe ichoni ukuti impokele ubumi ubwa bwila na bwila?”

¹⁹U Yesu akamula akati, “Nkimba choni chicho ukunyitizya ukuti ne mwiza? Nayumo umuntu yuyo mwiza, loli u Chala mwene.

²⁰Ughamenye amalamulo aghakuti: Utakalowaye, utakaghoghaye, utakibaye, utakabanje we kaboni umumyasi, sona chindika ughuso nu nyoko.”

²¹Umuntu yula akamula akati, “Inkonkite amalamulo ghosi ghanagha ukwandila kubwana bwane.”

²²Bo u Yesu ivwa zinizi, akamubuzya akati, “Ukusobelwa ichintu choka bulo: Kaghulizye vyosi vivyo uli navyo nukubapa abapina indalama, po ukwiza pakuba nu bukabi kumwanya, po wize nukunkonka.”

²³Loli bo umuntu yula ivwa zinizi, akaba ni chitima pachifukwa ichakuti akaba mukabi nkani.

²⁴U Yesu akennya ukuti umuntu yula akaba ni chitima, po akati, “Chipala nkani ukuti abantu abakabi binjile mu Bumwene ubwa Chala.

²⁵Chipala nkani ukuti umuntu umukabi injile mu Bumwene ubwa Chala ukuchila ukuti ingamila yinjile mu kabwazi aka sindano.”

²⁶Po abantu babo bakamwivwa akunena bakalaluzya bakati, “Po nkimba we wenu angapokiwa?”

²⁷U Yesu akamula akati, “Zinizi zitangabombiwa nu muntu, loli nu Chala. Pakuti nu Chala ichintu chosi chipepe bulo.”

²⁸U Pitala akati, “Ennya, twavileka vyosi nukukukonka awe.”

²⁹U Yesu akababuzya akati, “Ee, naloli inkubabuzya ukuti umuntu wesi yuyo akalekite akaya, pamo umuchi, pamo abakamu, pamo abapapi, pamo abana pachifukwa icha Bumwene ubwa Chala,

³⁰akwiza pakupokela ivintu ivyinji ukuchilapo akabalilo aka, sona akwiza pakupokela ubumi ubwa bwila na bwila pakabalilo kako kakwiza.”

³¹U Yesu akabasendela abamanyili bache 12 bala palubazu nukubabuzya ukuti, “Ivwa kuno, tukubuka mu Yelusalemu, mumo vyosi vivyo abalaghuzi bakasimba nizya Mwana uwa Muntu vikwiza pakukwanilisiwa.

³²Akwiza pakubikiwa munyobe izya bantu babo bate ba Yuda, babo bakwiza pakumobezya, nukumutuka, sona nukumufwinila amati.

³³Bakwiza pakumusyempa nukumughogha, loli bo ghachilapo amasiku matatu, akwiza pakuzyuka kubufwe.”

³⁴Loli abamanyili bache batakivwisya nachimo-chimo pavyosi vinivi. Iching'anamulo icha mazyu chikafisiwa kukwabo, po batakamanya vivyo u Yesu akanenagha.

³⁵Bo u Yesu akupalamila ku Yeliko, kukabako umuntu umufwamaso yuyo akikalagha mulubazu ulwa musebo nukulaba-laba.

³⁶Bo ivwa ukuti ichilundilo chikudumusannya, akalaluzya akati, “Nkimba cho choni chicho chikubombiwa?”

³⁷Bakamubuzya bakati, “U Yesu uwa mu Nazaleti akudumusannya.”

³⁸Akakolomoka nkani akati, “Wee Yesu, u Mwana uwa Devedi, umpelele ichisa.”

³⁹Abantu babo bakaba kuntazi bakamuchemela nukumubuzya ukuti abanje myee. Loli akakolomoka nkani akati, “Mwana uwa Devedi, umpelele ichisa!”

⁴⁰U Yesu akima nukulamula ukuti bize nawe umufwamaso yula kukwache. Bo biza nawe papipi, u Yesu akamulaluzya akati,

⁴¹“Nkimba ukulonda inkubombele ichoni?” Akamula akati, “Wee Mwene, inkulonda pakwennya sona.”

⁴²U Yesu akamubuzya akati, “Ennya! Ulwitiko lwako lwakupozya.”

⁴³Panapo na panapo umuntu yula akanda pakwennya nukumukonka u Yesu, bo akumupalizya u Chala. Bo ichilundilo icha bantu chennya zinizi, chosi chikamupalizya u Chala.