Read lambya LUKA 3 Bible Online

LUKA 3 - lambya bible

LUKA 3

¹Ghukaba mwaka uwa 15, bo u Kesale u Tibeliyasi akulaghila; u Pontiyo Pilati akaba mulaghili uwa chigaba icha Yudeya; u Helodi akaba mulaghili uwa chigaba icha Galileya, sona uwamwabo u Filipu akaba mulaghili uwa chigaba icha Ituliya nu Tilakoniti; u Lusaniya akaba mulaghili uwa chigaba icha Abileni,

²sona u Anasi nu Kayafa bakaba Baputi Abasongo nkani. Pakabalilo kala-kala u Chala akanena amazyu kwa Yohani umwana uwa Zakaliya munkolongo.

³Po u Yohani akenda muchigaba chosi icha lusoko ulwa Yolodani nukulumbilila pakasi pa bantu ukuti, “Pinduka nukuzileka imbibi zyinyu nukoziwa, po u Chala akwiza pakubahobokela imbibi zyinyu.”

⁴Pakuti zisimbiwe mwibuku ilya mulaghuzi u Yesaya ukuti, “Umuntu akukolomoka munkolongo akuti, ‘Yannya umusebo uwa Mwene; gholosya izila ukuti endemo!

⁵Amakombe ghosi ghafukiliwe, utughamba tosi na maghamba vitenganiziwe. Izila zyosi inyongane zigholosiwe, sona utuzila utwa tubanka tutenganiziwe.

⁶Abantu aba inko zyosi bakwiza pakwennya ubupoki ubwa Chala!’ ”

⁷Ichilundilo icha bantu chikiza kukwache ukuti choziwe. Po akababuzya akati, “Amwe mwe bana aba njoka! Nkimba we wenu abasokite pakuluchimbila ulufundo ulwa Chala lulo lukwiza?

⁸Bombagha imbombo izyakulanjizya ukuti naloli mwapinduka nukuzileka imbibi zyinyu. Mutakinenaye mwebene ukuti, ‘U Abulahamu we munyenya witu.’ Inkubabuzya ukuti u Chala angaghapela amabwe agha pakuba baluko aba Abulahamu.

⁹Intemo yiyaniziwe kale pakudumula amakwi pasi pamagululuzi. Ikwi lyosi lilyo litakwela iseke inyiza likwiza pakudumuliwa nukusumbiwa pamoto.”

¹⁰Po ichilundilo icha bantu chikamulaluzya chikati, “Nkimba tubombaye ichoni?”

¹¹U Yohani akamula akati, “Umuntu wesi yuyo ali na menda mabili amupeko ghoka uwamwabo yuyo ate nagho, sona umuntu wesi yuyo ali ni chakulya amugabileko uwamwabo.”

¹²Bope abasonkezya sonko bakiza pakoziwa nukulaluzya ukuti, “Mumanyisi, nkimba tubombaye ichoni?”

¹³U Yohani akabamula akati, “Mutakasonkezyanje umusonko ukuchila mumo mukalamuliliwa.”

¹⁴Abasikali abankondo bope bakiza bakalaluzya bakati, “Po nkimba aswe, tubombaye ichoni?” Akati, “Mutakabafyulaye indalama abantu pamo ukumutamantila umuntu na yumo-yumo. Mwikutaye na malipilo ghinyu.”

¹⁵Ulusubilo ulwa bantu lukanda pakukula, sona bakanda pakuswigha ukuti pamo u Yohani angaba we Kilisitu.

¹⁶Po u Yohani akababuzya abantu bosi akati, “Ane inkubozya na mizi, loli pisinda papane pakwiza yumo uwamaka ukunchila. Ane intabaghiye napo panandi pakwinama nukusatula utupinyilo utwa nkwato zyache. Akwiza pakubozya nu Muzimu Umuzelu, sona nu moto.

¹⁷Ali nu luselo munyobe zyache ulwakupetela ingano. Po akwiza pakubika ingano muntamba, loli ilyelelo likwiza pakochiwa nu moto, ghugho ghutakuzimapo nalumo-lumo.”

¹⁸U Yohani akalumbilila Amazyu Amiza muzila inyinji izyakulekana-lekana pakasi pa bantu nukubasoka nkani.

¹⁹Loli u Yohani akamunena nkani umwene u Helodi umulaghili, ichifukwa akamusenda umuchi uwa wamwabo u Helodiya, sona akabomba ivintu ivyinji ivibibi.

²⁰Pisinda pache u Helodi akabomba ichintu ichibibi nkani ukuchilapo pakumubika u Yohani mujele.

²¹Bo abantu bosi boziwa, u Yesu wepe akoziwa. Bo akwiputa, kumwanya kukighuka,

²²sona u Muzimu Umuzelu akamwikila ngati yo nkunda. Po izyu likivwika kumwanya likati, “Awe we Mwana wane umughaniwa. Ihobokite nkani nawe.”

²³Bo u Yesu anda imbombo yache akaba na maka 30. Abantu bakinong'onagha ukuti akaba mwana uwa Jozefu, yuyo akaba mwana uwa Heli,

²⁴nu mwana uwa Matati, nu mwana uwa Levi, nu mwana uwa Meliki, nu mwana uwa Yanayi, nu mwana uwa Jozefu,

²⁵Umwana uwa Matatiya, nu mwana uwa Amosi, nu mwana uwa Nahumi, nu mwana uwa Hesili, nu mwana uwa Nagayi,

²⁶nu mwana uwa Mati, nu mwana uwa Matatiya, nu mwana uwa Semeni, nu mwana uwa Yozeki, nu mwana uwa Yoda,

²⁷nu mwana uwa Yohanani, nu mwana uwa Lesa, nu mwana uwa Zelubabelo, nu mwana uwa Shelatiyele, nu mwana uwa Neli,

²⁸nu mwana uwa Meliki, nu mwana uwa Adi, nu mwana uwa Kosamu, nu mwana uwa Elimadamu, nu mwana uwa Elo,

²⁹nu mwana uwa Yoshwa, nu mwana uwa Eliyezeli, nu mwana uwa Yolimu, nu mwana uwa Matati, nu mwana uwa Levi,

³⁰nu mwana uwa Simiyoni, nu mwana uwa Yuda, nu mwana uwa Jozefu, nu mwana uwa Yona mu, nu mwana uwa Eliyakimu,

³¹nu mwana uwa Meleya, nu mwana uwa Mena, nu mwana uwa Matata, nu mwana uwa Natani, nu mwana uwa Devedi,

³²nu mwana uwa Yese, nu mwana uwa Obedi, nu mwana uwa Bowazi, nu mwana uwa Salimoni, nu mwana uwa Nashoni,

³³nu mwana uwa Aminadabu, nu mwana uwa Adimini, nu mwana uwa Alini, nu mwana uwa Heziloni, nu mwana uwa Pelezi, nu mwana uwa Yuda,

³⁴nu mwana uwa Yakobo, nu mwana uwa Yisaki, nu mwana uwa Abulahamu, nu mwana uwa Tela, nu mwana uwa Naholi,

³⁵nu mwana uwa Seluki, nu mwana uwa Lebu, nu mwana uwa Pele, nu mwana uwa Ebelo, nu mwana uwa Shela,

³⁶nu mwana uwa Kayinani, nu mwana uwa Alifakisadi, nu mwana uwa Shemu, nu mwana uwa Nowa, nu mwana uwa Lameki,

³⁷nu mwana uwa Metusela, nu mwana uwa Enoki, nu mwana uwa Yaledi, nu mwana uwa Mahalalele, nu mwana uwa Kayinani,

³⁸nu mwana uwa Enoshi, nu mwana uwa Seti, nu mwana uwa Adamu, nu mwana uwa Chala.